Dunnemåls Pershing- un nu Tomahawkraketen

vun Behrend Böckmann

An'n 12. Julmånd (Dezember) 1979 hett dei NATO beschlåten, Pershing-Raketen un Marschflugkörper inne Bunnesrepublik tau statschonieren, wenn dei Sowjetunion nich dorvon aflött, ehr SS-20-Raketen up Westeuropa uttaurichten un taugliek dorœwer mit dei Sowjetunion tau verhanneln, woans dei Uprüstung mit Atomwaffen kontrolliert warden künn. Dat wier dei "Doppelbeschluss" un inne Bundsrepublik geiht man gägen den "Doppelbeschluss" up'e Stråt, dei Ostermarschbewägung, den iersten Ostermarsch gägen den Atomkrieg geef dat all an'n Stillen Fridach 1960, ward tau Frädensbewägung gägen denn Atomkrieg. An'n 10. Wienmånd (Oktober) 1981 trummeln politische un kirchliche Krings as "Akschon Sühneteiken" 300.000 Lüd taun Frädensdemostratschon in Bonn tauhop. Dorbi wiern ok dei iersten Gräunen, dei sik in Hartung (Januar) 1980 grünnt harrn un sik bald mit Knüddelsticken, Jesuslatschen un Sünnenrosen in'n Bundsdach för denn Fräden, gägen Atomwaffen un 'n gesunne Ümwelt insetten. Helmut Schmidt as Bunneskanzler harr den "Doppelbeschluss" mit infädelt, harr denn œwer in sien SPD nich den nödigen Tauspruch funnen, man vertrucht em nich mihr, un an'n 1. Wienmånd (Oktober) 1982 löst Helmut Kohl em as Kanzler af.

Af 1983 warden denn dei niegen amerikan'schen Raketen in Düütschland stationiert. Dat wier Fauder för dei Gräunen un sei würn öller, hemm' sik taun würklich politisch Kraft musert, sitten in Parlemente, stellen Burmeisters un Ministers...Dei Gräunen spennen Tauversicht un setten sik dorför in, nå Jane Fonda (Johrgang 1937) nich so mit uns Welt ümtaugåhn, as "...harr'n wi noch 'n Tweit in'n Kufferruum". Dat komodig gaude Läben möt sik so wanneln, dat dat nich uns Ünnergang ward. Un denn kümmt wull dat, wat's anner vörhollen: Radikalisierung. Allein ehr Denken un Hanneln is richtig, all annern sünd döschig, wenn's nich dei Tüffeln mit Schell äten, Kattunkledåschen an'n Lief hemm' un ehr Hüs wedder mit Leihm bugen...

Un denn kümmt dei Tiet, as 'n anfangt, mit denn amerikan'schen NATO-Kompangjon gägen denn Russen tau sticheln, em düchtig tau argern, tau verargern, wägen Nuurdstream tau strieden un is up eins mit all Russlandhasser œwerein, dat Putin doran Schuld hett, dat taun Bispill dei ut Sowjettieden ansässigen Russen inne Ukrain nich mihr russ'sch, sonnern ukrain'sch schnacken sallen. Un dat kümmt taun Gemetzel, dat kümmt taun "militärisch Operatschon", dat kümmt taun Krieg.
Dei Kanzler röppt dei Wenn' ut, dei Gräunen wennen sik ok. Sei weiten, dat Napoleon, dei düütsche Kaiser un ok dei Riekskanzler den Russen nich besiegen künn, un glöben nu, dat dat in't 21. Johrhunnert mit NATO-Waffen för dat ukrain'sche Versäukskaninken mœglich ward.

Un süll dat mit Hülp vonne Ukrain nich hentaukriegen sien, denn möt 'n sik up 'n russ'sche Gefohr instellen un kriegsdüchtig sien. Also möten nu amerikan'sche "Tomahawk" un niege Œwerschall-Raketen in Düütschland statschoniert warden, denn Düütschland licht so schön midden in Europa un von hier ut kœnen Raketen, dei 2000 km wiet fliegen un up 'n Punkt inschlågen, gaut un säker up Moskau taustüern. Un Börger, dei gägen dit niege Wettrüsten sünd un leiwers verhanneln willen, dei warden vonne gräunen Ideologen un ehr Frünn' as Populisten inne rechte Eck stellt.