Dei Mob bi't Utlüften

vun Behrend Böckmann

Nå Verklorungen in Würbäuker hett dat Wurt "Mob" sien Wöddel in't Latiensche, wo "mobile vulgaris" soväl as 'n unschlüssiger Deil von't Volk bedüden deit un låters ok mit Wür as Gesinnel, Pack un Pöbel belecht wür. Un wenn sik nu disse unschlüssig Deil gägen wat orrer gägen 'n Person upbömt, denn schnacken wi hüt von "Mobbing" un "mobben". Dat is ok dei Fall, wenn sik dei Mob tausåmenfinnt, mit Fackeln dörch Stråten treckt, up Hüs von Staatsdeiner taulöppt un ludhals dat gröölt, wat dei Mobanföhrer disse Mitlöpers intrichtert hett. So sünd's inne letzten Dåch vör dei Wåhnhüs von Ministerpräsident Kretschmar un sien Gesundheitsministersch in Sassen un bi Amtskollegin Schwesig in Mäkelnborg-Vörpommern upmarschiert, üm sei för dat tau mobben, wat sei as Böbelste vonne Regierungen in Såken Coronakris ünnernåhmen hemm'. Un dei Mop verlangt, dat furtsens männig Corona-Order utsett't ward bet hen, dat s' den Lannesvadder orrer dei Lannesmudder den Seißenmann an'n Hals wünschen, wenn dat denn nich so kümmt, as sei dat willen.

De Düvel drifft sien Speel mit de Covidioten

Disse Lü, dei Corona nich för'n schlimme Sük hollen, gägen 'n Sprütt sünd un as Dwass- un Dwerdenker Stimmung up'e Stråten un vör Ämter måken, sünd noch leger as 'n "Wåktormverköper" von'e "Tügen Jehovas", dei dörch sienen Globen anhollen is, wat gägen frömdet Blaut tau hemm' un ok dorgägen, sülben Hand antauleggen (denn dat is bi dei "Tügen Jehovas" as 'n unreigen Daun schierwech Sex-Gier un Lust un kein bäten as Leif antauseihn). Dei Ünnerschied is blot, dat dei Einen ganz still ehrn "Wåktorm" an'n Mann bringen willen un nüms anners schaden daun — un dei Annern ludhals so'n Oort Krawalltourismus organisieren, wo 'n Leithåmel sien Haud von Mitlöpern Lœgen- un Späukelgeschichten so vertellt, dat all insichtig warden, dat 'n wat gägen dei "Staatsschikanen" ünnernähmen möt. Disse Corona- un Sprüttengägners willen dei Welt wiesmåken, dat disse Sük nich schlimmer as 'n Gripp is, dat 'n natürliche Immunisierung bäder is as dei dörch 'n Sprütt, dat dei Näbenwürkungen nich bekannt sünd, dat all, dei 'n Sprütt krägen hemm', anner anstäken un dei Sük ok upfangen kœnen, dat 'n von 'n Sprütt Allergien kriegen kann orrer sik sogor dat Arfgaut verännern deit, dat dei Pharmaünnernähmen mit Sprütten blot väl Geld måken ... Un dor warden noch väl mihr unwohre Geschichten inne Welt sett't... Disse "Coronagägner" (as wiern wi dat nich all!) hemm' sik wull taun einen dei uprechten Börgerrechtler ut'e DDR taun Ogenspeigel nåhmen, dei dei DDR bädern wullen un upeins nicks mihr tau seggen harrn, as dei Mob dat Ruder an sik reet. Un taun annern weiten s' ok, dat dat lichter is, gägen wat as för wat tau demonstriern. Dei Düütschen gåhn gägen wat up dei Stråt, gägen tauväl Utlänner, dei up uns Kosten läben un uns noch dei Arbeit wechnähmen, denn mål gägen dei Klimapoletik vonne Regierung un mål gägen Strommœhlen vör dei Husdör...

Dei Coronadod œwerrascht vör Urt 'n œwerklauken Dokter för Operatschonen, bäten wieder wech is 'n Fru in anner Ümstänn' nich mihr tau redden, blot dat Kind künn dörch 'n Kaiserschnitt noch hålt warden un möt åhn Mudder upwassen un dei, dei sik blot dei Bein verpedden un dei Fackeldräger un Krakähler sünd, dei kåmen ut 'n Klinik. Dat sünd por Bispills von Minschen, dei ehr Œwereinsien mit uns Grundgesetz so utleggen, dat's sik gägen dei Coronsprütt wennen un so dei Sprütt för nich nödig hollen. Un dor man nå uns Grundgesetz 'n Demo inne Haud anmellen möt, dormit Gendarmen sei vör 'n Gägendemo schützen, kümmt 'n nu up den Dreih, dei Demo in'n Spaziergang dörch den Urt ümtauwanneln, üm bäten uttaulüften, üm sik dei Bein bäten tau verpedden. Un disse Dreih kümmt ut kein anner Eck as vönne
populistischen Gesinnungsbräuder Höcke un Co. Un ok por sik för Christen hollende Stiechbögelholler tuten in't glieke Hurn. Mål gäben's sik as Rottenfänger von Håmeln, mål mitfäuhlend mit dei "Spaziergängerin von Sanssouci" in den Kinofilm mit Romy Schneider un Michel Piccoli, mål as Honni, dei vör Tieden Mai-Losungen un "Winkelemente" vör sienen Berliner Lampenlåden utgeef.

In'n Nåmen von't Grundgesetz, dei dor fastschräben Frieheit un dat Recht sik uptauböömen, weddern disse Populisten gägen dei Sprütt, mit wecker dei Coronasük endlich bitaukåmen is. Un sei hemm' nu ut Bang vör Uplågen ehr Demos in Ütlüften, in'n Spaziergäng ümwannelt, denn son'n Gang dörch 'n Urt möt 'n ja man nich anmellen. Ok wenn't blot ein bet twei Gesinnungs-Börgers sünd, dei uns tau denken gäben un sik gägen uns Demokratie upböömen, denn sünd dat in Tieden vonne weltwiede Coronasük ümmer ein bet twei tauväl!