Mord un Dodslag

vun Wolfhard Sauerbrey

Knipst een dat Fernsehn avends an, de weit,
dat dat ahn Mord un Dodslag nich mehr geiht!
"Bones — Knochenjäger": rüükt na Moderfleesch,
bi "Stahlnetz" hangt di een un röchelt heesch,
bi "Mord mit Aussicht" hebbt se een versenkt,
bi "Nord Nord Mord", dor warrt jüst een gehenkt,

bi'n "Krimi Usedom" liggt een in't Watt,
bi "Soko Stuttgart" find't se een in'n Fatt,
"Großstadtrevier" — dor hebbt se een erschaten,
in'n "Tatort" kriegt se'n Kinnerschänner faten,
in "Crime for ever", dor warrt een verbrennt,
In'n "Staatsanwalt" — een Doden, den nüms kennt . . .

Los geiht dat, wenn de "Tagesschau" vörbi,
du knipst un söchst — wat anners finnst du nie!
So blifft de düütsche Bunnesbörger sitten,
drinkt Beer un fritt sien Corn Flakes orrer Fritten,

un süfzt, dat jümmers slechter so de Welt warrt,
bet denn "Se hebbt den Mörder funn!" vermellt warrt.
"Achtung vorm Tod!" — de warrt nu jümmers minner,
un Killerspeele maakt nu al uns Kinner,
un schütt mal een in'n Speel den annern doot,
schriggt Mudder: "Gott, was ist das Kind verroht!"

Man nu de Kuntrast:

Op'n U-Bahn-Trepp, dor steiht'n Fro
vun achtern kümmt'n Kerl dorto,
de hett ehr anstött orrer raken —
Da fallt se hen, ehr Arm is braken.
Man nu, nu warrt de Bläder wild:
AZ, TZ, Süddeutsche, Bild,
de schriegt dörnanner as verfehrt:
Wo hett de Kerl so'n Böset lehrt?

Dat he dat mitkriggt, avendlich! —
dat seht se nich!

Rudi Witzke: Kind un Kiekschapp. Klick op to'n Vergröttern!