vun Behrend Böckmann

In dei Tied vonne Hanse wier't so!

Vör Tieden, as Kooplüüd un Seefohrers dörch dei Hanse in Verbinnung stünnen, wier Platt dei „lingua franca“, ja: Plattdüütsch wier dei Mudderspåk an’t Nuurd- un Ostseeäuwer bet wiet in’t Hinnerland un wür so lang språken, bet dat „Missingsch“ upkeem un Wiessegger Plattdüütsch dod snacken wullen.

Vör nich all tau langer Tiet, an'n 21. Februar 1952, demonstrierten Minschen in Dhaka in't jüst frie worden Ost-Pakistan, dat nich Urdu as Språk vonne Böbelsten Teihndusend, sonnern Bengali as Språk vonne Mihrheit Amtsspråk warden süll. Un nich blot in Ost-Pakistan, sonnern ok annerswo wier dat Kulturgaut Språk as Teiken von Taugehörigkeit un Traditschon in Gefohr; un so hett dei Unesco af 2000 ut Erinnerung an den 21. Februar 1952 in Dhaka dissen Dach taun Internatschonalen Mudderspråkendach utraupen un föddert dei Minschheit up, dörch Akschonen allens tau daun, dat jede Språk — un wenn's blot von por hunnert Minschen snackt ward — as Mudderspråk erhollen blifft. Dat gellt ok för uns Platt!

Un ik keem in't Drömen un heff dit drömt:

Ik grünn' dei „Plattdüütsch-Partei vonne Wåderkant“, måk düchtig för un up Platt Wåhlkampf, ward hushoch dei Winner un sitt nu mit mien Plattschnacker in'n Landdach as Regierungspartei, dei von nu an dat Seggen hett un allein dat Ruder inne Hand hett —— un dit anordert:

• för Ämter, Verwaltungen, Karken, Kranken- un Ollenhüs gellt: in all disse Hüs is Platt tau schnacken, blot in'n Iernstfall kümmt 'n Hochdüütsch-Œwersetter hentau;
• Kark ward blot noch up Platt afhollen, dat gellt ok för dei Döp, Konfirmatschon, Heurat un den Dod;
• all dei välen Schiller anne Stråten möten up Platt Reklåme måken orrer up dit un dat henwiesen;
• Radio, Kiekkasten un anner Medien hemm' allens ut MV up Platt tau sennen, Tiedungen sünd up Platt aftaufåten;
• bi'n Deichknäder gifft dat wedder so as tau Reuters Tieden bi Mudder Schulten in Niegenbramborg Bodderpåmels, vierplütrige Semmeln, Twäschensemmels, Reigenpluten un för Kinner dei beleiwten Semmelpoppen;
• bi'n Schlachter sünd Nackenbråden, Schwattsuer un Mettwust dei Rönner...

...oder so'n Krabbenbroot!

Un up eins sitt ik in't MV-Institut tau München gliek näben dat Hofbräuhus un lihr por Bayern dat Plattschnacken, sei willen so giern in Lubmin 'n Anstellung finnen.

Dor heff'k mi in'n Drom düchtig verfihrt, wåk up un mark, dat allens blot 'n Drom wier. Ne, so wiet sall dat nich kåmen, dat all „Nich-Mäkelnbörger“, dei hier in'n Nuurden 'n gaude Arbeit någåhn, Wöddeln schlågen un 'n niege Heimat funnen hemm', von Hüt up Morgen so as in't Baltikum dei russ'schstämmigen Inwåhners tau „Nichtbörger“ afstempelt warden un 'n Inbörgerung ierst mœglich is, wenn s' denn dörch 'n Test nåwiesen kœnen, dat s' sik mit dei amtlich Landsspråk in Wurt un Schrift utkennen. Nee, Dwang schall dat nich geven.

Œwer beten höger schullen wi uns Hööft schon dregen!