De Mythos-Makers

De militäärsche Offensive hett Israeel in'e Welt alleen stellt. Düssen Vördeel wüllt de pälästineeschen Basen utnütten...


"Een kann keen Freden mit Herrn Arafat tostann kregen", sä de israeelsche Ministerpräsident Ariel Sharon an'n Friedag (12.4.) in'n Interview mit den Telewischensender CBS. Üm de Eck dacht, kritiseer he dormit den Willen vun'e US-Regeerung, fasttohollen an't Verhanneln mit den Baas vun'e palästineesche Autonomiebehöör (PA): "Dorüm harr dat man beter 'n Anstrengen geven schullt, een annern to finnen, mit de een to'n Freden verhanneln kann."

Nich veel Minuten nadem dat Interview opnahmen weer, spreng sik een palästineesche Sülvstmordattentätersch op'n Markt in Jerusaleem in'e Luft un bröch dorbi söß Israelis üm. An'n neegsten Dag distanzeer sik Arafat vun den Anslag: "Wi verurdeelt utdrücklich alle Angriepen op Zivillüüd op beed Sieden un sünnerlich den Angriep güstern op israeelsche Zivillüüd in Jerusaleem." Avers in een Video harr de Attentätersch Andaleeb Takataqah tovör ehr Afsicht klaarmaakt, een Anslag in Israeel för de Al-Aqsa-Märtyrerbrigaden dörtoföhrn, de mit Arafat sin Organisaschoon Fatah tosamenhangt.

"Sharon hett klaarmaakt, dat he, afsehn vun militäärsche Gewalt, nich to bruken is, wenn't dorüm geiht, anner Methoden ut dat Arsenal uttowählen, dat em praat steiht", kommenteer Uzi Benziman in dat israeelsche Bladd Ha'aretz. "Dat Problem is, dat Arafat Sharon jümmerto Vörwännen levert, dat he sik op de Method verlaat, de he wählt hett - de Gewalt."

Twoors hett Sharon in allgemeene Wöör jümmer wedder versekert, he weer redig för't Fredenmaken, un he hett ok den Beiruter Fredensplan vun'e Araavsche Liga 'n positiven Ansatz nöömt, avers nienich hett he egen Vörslääg dorleggt orrer seggt, mit wokeen he denn verhanneln wull, wenn nich mit Yassir Arafat. De Militäärangriep, de siet Märzmaand in'e palästineeschen Rebetten löppt, hett Israeel international op'n eensamen Posten stellt. Sogaar de amerikaanschen Maten sünd'n beten füünsch.

Eentlich hett de palästineesche Autonomiebehöör (PA) een gode Laag för'n Start vun niege Verhannlungen mit internaschonale diplomaatsche Rüüchdeckung. Liekers wat Arafat entweder'n duppeltes Speel drifft oder sin Kampftruppen nich ünner Kuntrull hett, man nadem he sik vun den Anslag distanzeer, hett de US-Butenminister Colin Powell doch tostimmt, sik mit em to drepen. Man bloots, de Snackeree twüschen de beden in Ramallah bleev ahn Ergeevnis.

"Wi seggt Nee to alle Verhannlungen, solang de israeelsche Besatzung besteiht", maak de PA-Sekerheetsbaas för Gaza, Mohammad Dachlan, na dat Drepen klaar. Ok Sharon sin Vörslag, de palästineeschen Kämpers, de sik nu all siet twee Weken in de Geboortskark in Bethlehem verschanzt hebbt, na'n anner Land utreisen to laten, woor trüchwiesen. Apensichtlich glöövt Arafat, he kunn de Sympathien, de sin Volk siet de israeelsche Offensive wunnen hett, för een Internaschonaliseern vun düssen Kunflikt noch wieder nütten.

Dat Arafat sin Kämpers sik in een militäärsch utsichtslose Laag de israeelsche Armee stellt, de jüm wiet vörbi is, - dat kriggt bloots denn Sinn, wenn se kalkuleert, de Märtyrer-Koort to spelen, dat se de westliche un islaamsche Lüüd un Medien mobiliseert. Dat üm un bi 200 Palästineesche man bloots mit lichte Waffen in'n Flüchtlingslager in Jenin negen Daag lang gegen de israeelsche Övermacht vun Kampfhubschraubers un Panzers dörchhollen hebbt, dat warrt sachs de Grunnlaag geven för'n niegen Mythos.

Bi den Angriep op dat Flüchtlingslager, dat man bloots 1 km² groot is, man 'neem 13000 Minschen in leven dään, sünd bi 500 Palästineesche doodmaakt warrn, seggt de PA-Informaschoonsminister Yassir Abed Rabbo. He beschüllig de israeelsche Armee, se harrn 50 Gefangene "exekuteert". Sprekers vun'e israeelsche Armee bestried dat; se harrn nienich Zivillüüd un Gefangene afsichtlich ümbracht; na jümehr Angaven sünd in Jenin 150 bet 200 Palästineesche storven. Dorbi weern ok zivile Opper ween, de Armee harr dat avers bloots op de Bewaffneten afsehn hatt. "Wi hebbt de Hüüs enkelt nananner afklappert, dat wi keen Zivillüüd doodmaakt", sä een israeelsche Panzerkommandant to de Los Angeles Times.

Ok in de Berichte, de bet nu vun palästineesche Oogentügen vörliggt, gifft dat keen Bewiesen för dat afsichtliche Ümbringen vun Zivillüüd. Avers dat Vertreters vun'e Medien un vun Hölpsorganisaschoonen nich in dat Kampfrebett laten warrn, dat weckt dat Misstruun, de israeelsche Armee wull Bröök vun'e Minschenrechten ünner'n Disch kehrn. Babento hett de Armee de Afsicht, dode palästineesche Kämpers in unkenntlich maakte Gräver jichtenswo in't Jordantal intobuddeln, an'n Plack, den se "Freedhoff för Fienden" nöömt.

Dütt Vörhebben wöör an'n Friedag vun Richter Aharon Barak op Andrag vun twee Knesset-Afordneten un vun'e Minschenrechtsorganisaschoonen Adalah un Law toeerst mal ünnerbunnen. "Wi wüllt seker stelln, dat de, de för Verbreken in't Lager verantwoortlich sünd, de Bewiesen nich tonicht maken köönt", sä Mohammad Baraka, een vun de twee Knesset-Afordneten. An'n Sünndag hett dat böverste Gericht denn fastsett, dat de Lieken twoors ut dat Lager Jenin wegbröcht, avers nich anonym begraven warrn dröfft.

Egaal wat dar noch allens unklaar is: De Kampf üm Jenin hett de antiisraeelsche Stimmung sünnerlich in de araavsche Welt anfüürt. In Ägypten, Jordanien, Jemen, Bahrain un anner araavsche Staaten keem dat to Protestdemonstraschoonen. Liekers wat jüst nu keen araavsches Regime akut op'e Kipp steiht, maakt de allgemeen Menen de Basen avers doch Buukweh.

De jordaanische König Abdullah II. hett dorüm 'n poor vun sin Ministern vergattert, dat se bi de propalästineeschen Demonstaschoonen mitgaht. Man wenn de "naschonaale Einheit" bedroht würr, dennso würr he dat verhinnern, hett de König künnig maakt. An'n Friedag erstick een Övermacht vun Polizei Proteste in de Hauptstadt Amman. Dat de Demonstranten nich tosamen kamen kunnen, woor sogaar de Togang to de Moscheen afriegelt. Ok in Kairo hett Polizei de Gegend vun'e al-Azhar-Moschee afschirmt, 'neem in'e verleden Weken mennig Demonstraschoonen ehrn Utgang nahmen hebbt.

As nu de mehrsten araavschen Staaten keen Kuntakten mit Israeel ünnerhollt, köönt se ok nich dör weerschapliche orrer diplomaatsche Sankschoonen jümehr egen Lüüd den Moot'n beten köhlen. Bloots Jordanien un Ägypten harrn de Mööglichkeit, de diplomaatschen Kuntakte aftobreken. Man ok sowat würr de naschonalistischen und islamistischen Hardliner nich tofreden maken. Dat dat Föhlen vun'e mehrsten Lüüd sik'n beten beruhigt, kunn dat ween, dat de araavschen Basen jüst den annern Weg gaht un jümehrn Fredensplaan, den se in Beirut verafscheedt harrn, wedder uttbuddelt, nadem se em toeerst vunwegen de Eskalaschoon op'e Sied leggt harrn.

Denn avers müß de Idee vun'e araavsche Einheit opgeven warrn. Denn tominnst de Irak un Syrien hebbt jüst nu keen Intresse, dat jümehr Verhollnis to Israeel wat normaler warrn schull. Avers ok för de "sünigen" araavschen Regeern un för Arafat sin PA is de Konfrontaschoon mit Israeel heel willkamen, as dat de Lüüd vergeten lett, dat de araavschen Basen sülm de drängen Problemen vun Lüüd un Staaten nich in'n Griff kriegt.


Schreven vun Jörn Schulz bi Jungle World, in Platt bröcht vun Marlou Lessing


na baven