Gemütliche Kneipe mit Stil

Denn hau ik af!

vun Heinz Tiekötter

Is dat nich scheun, wenn dat in en Dörp noch 'n Kroog mit'n Sool gifft? Dat sorgt doch bi de Inwohners jümmers för 'n godet Tosomenleben.
Un mi gefallt dat ok veel beter, wenn ik mi vör en Optritt an'n Tresen de Stimmbänner 'n beten befeuchten kann.
Un mit de Ankünnigung klappt dat bi'n Sool in'n Kroog ok veel beter. Sünnerlich, wenn de Kröger un de Veranstalter vörheer orrig op de Werbetrommel haut, damit de Sool vull ward. Dat is ok beter för de Stimmung un mi mookt en vullet Huus ok veel mehr Spooß.

Annerlest heff ik dat krasse Gegendeel beleevt: Dat geev en Neejohrsemfang in Bullrichhusen. Ik sull, ohn dat se mi vörheer ankünnigt harrn, as Öberraschungs-Gast 'n beten för Ünnerhollung sorgen.

De ungemütliche Aula-Atmosphäär

As alle Lüüd ehr Glöös vull harrn, fung de Börgermester mit sien Reed an. He schnack 'n halbe Stünn, denn de Kommunolwohl stunn vör de Döör. No den Applaus för em is noschenkt worrn un de Schoolleitersche — de Veranstaltung hett jo in ehr' Aula stattfunnen — holl en Vördrag vun man heugstens 20 Minuten öber "Die schulischen Anforderungen der Zukunft". As de Glöös wedder opfüllt weern, keem de Vörsittersche vun'n Kulturvereen. Se schnack nich länger as'n Veddelstünn. To goderlest wull de Hauptmann vun de Freewillige Füerwehr in Bullrichhusen wat seggen. As se mit dat Noschenken fardig weern, hett he dat Glas hoben un sik in Nomen vun siene Füerwehr-Kameroden för den neen Sprüttenwogen bedankt.

In düsse annerthalv Stünn heff ik mien Vördrag nochmol fievmol dörchleest, 'n beten wat utbetert un ünnerstreken un alle tein Minuten op de Klock keken. Un as de eersten Lüüd opstunnen un mit veel Trara hen un her lepen, üm ehre Jacken to seuken, dor geev mi de Tante vun den Kulturkring en Teken, ik sull man gau anfangen un de Flüchtigen ophollen.

Djä, wat sall ik seggen? Dor heff ik ok miene Jack ok antrocken, heff mi bedankt för dat ene Beer un bün no Huus fohrt. Vörheer weer ik ober noch in mienen Kroog, denn no soveel Anstrengung mutt een sik doch eerstmol verpusten.

Kene tein Peer kriegt mi nochmol op'n Neejohrsempfang in Bullrichhusen!