Niege Nåmen möten her

vun Behrend Böckmann



Wi hööpt, wi kriegt den Putin-Wladi na Den Haag maleins vör'n Kadi!
Man solange mööt wi maken niege Naams för mennig Saken!

Dei Putin drifft dat gor tau dull,
wi hemm' von em dei Schnut nu vull
un jeder Düütsch süll sik wat schämen,
russ'sche Wür in'n Mund tau nähmen!
Man kann nich mihr mit Nåmen läben,
dei eins würn Kaukenworen gäben
un männig Kunn' em giern mitnähm,
as russ'scher Plückkauken* upkeem,
un geef ok düchtig dormit an,
wat hei för'n Kauken backen kann.
Hüt ward hei näumt åhn grot Gewäs:
düütscher Kauken mit Wittkees,
denn ganz Plietsche weiten:
So hett hei all in Russland heiten!


"French Fries" heet in de USA
uns Pommes. Maleis föhrn se da
Krieg in'n Irak. Un de Franzosen
wulln nich mitdoon, de skrupellosen!
Batz woorn de "French Fries" anners döfft
un nu as "Freedom Fries" verköfft.
Wat böös is, dorna dörf nix heten!
Dat dörfst nich hören, lesen, weten!
So as de Amis dunntomaal,
so wiest ok wi hüüt uns Moraal!

Russisch Brot daun väle låben,
disse kroschen Ät-Baukståben,
dei mål ünnern annern Nåmen
von Russland sünd nå Düütschland kåmen.
As Schles'sche Wäber revoltierten
un den Upstand all probierten,
harr ein Dresd'ner Bäckergesell
mål in St. Petersborg 'n Stell.
As hei taurüch nå Düütschland keem,
hei dat Rezept nå Hus mit nähm
un backt ut Eiwitt, Zucker, Mähl
un mit Kaukau lütt Kauken gäl,
luder "rösch" Baukståben fien,
dei nich kroscher künnen sien.
Un Baukståben in lütt un grot
wiern nu bald düütsch Russischbrot.
Russisch sall'n wi nu vergäten.
blot wiederhen Baukståben äten!


Dat "Russisch Broot" maakt Russen füünsch, den all de Lettern sünd latiensch!
Laat uns dat Produkt verbetern: Vun hüüt an kyrillisch Lettern!

In Krüzwurtrådels kåmen's vör,
dei Eier von den russ'schen Stör,
un alle Welt deit weiten,
dat's bi uns ok Kaviar heiten;
as IKRA sünd sei sihr bekannt
in dat Krüzwurtrådelland,
doch kümmt dei Kaviar noch rut,
wenn dei Russlandhannel ut?
Will man äten mål ganz fien
un geiht as Gast in Grot-Berlin
in dei Wirtschaft "Pasternak"
is dat mit Kaviar son'n Såk.
Ward wiederhen dei Gast beläben,
dat dat "Happy Zor" ward gäben
orrer nu för vierdig Piepen
up "Happy Kiew" as Vörspies jiepen?


Wenn "Happy Kiew" happy weer, denn eet wi noch en Happen mehr!
'keen denkt, so'n Naam bedüüdt Moraal, is narrsch orr hüüchlerisch orr mall.

Johrelang taun lütten Pries
geef't hier dor Moskauer Ies,
doch dei Iesäter hemm' Pech:
dei olle Nåm hei möt nu wech
un inne Iesstuf up dei Kort
steiht nu "Ies nå Kiewer Oort",
doch in't brambörger Land
is ein Iestuf sihr bekannt:
"Samowar" deit dei noch heiten
un ganz väle Minschen weiten:
dor steiht noch ümmer up'e Kort
Ies mit Råhm nå Moskauer Oort.

Un dat leech mål välerurten
Russisch-Ei in Salatbuurten,
doch dormit is't nu ok vörbi,
dat Russisch-Ei erfinnt sik nie
un lannt as "Nuurdisch Ei mit Fisch"
as Fingerfuud up jeden Disch,
un as Blickfang för dei Ogen
kümmt up't Ei Seehasenrogen,
ok Hiringsrogen hier un dor
måkt "Ei mit Fisch" taun niege Wor.


Putin, hest du gor keen Hart? Nich mal Eier sünd so hart!!

Man ok giern den Wodka nähm,
dei direkt ut Moskau keem:
Stolitschnaya, dei Getreidebrand,
ward indüütscht un nu nie benannt,
kann em as "Oldesloer Osten"
bald bi Unkel Aldi kosten.


Un hier sühst Putins Russisch Ei: lerrig, utkippt, köppt un twei!

Dei Krimsekt blifft Schampanskoje,
nich russkoje, nich sowjetskoje
denn nägenteihnhunnert in Paris
geef't ierste Mål 'n Groten Pries,
hett alle Tieden œwerståhn
un so ward dat denn wieder gåhn,
denn dei Westen is sik wiss,
dat dei Krim ukrainisch is.

Päperkauken, dei ut Tula kåmen,
kriegen ok noch niege Nåmen —
denn "Prjaniki" tau russisch is
un dorüm is man sik nu wiss
un lött alle Welt denn weiten,
dat's bald Tula-Printen heiten.
Ut russ'sch Soljanka ward nu schwupp
miteins 'n fien ukrain'sche Supp,
Pelmeni, dei ut Sibirjen kåmen,
kriegen ok ganz niege Nåmen,
sei warden bald in't düütsche Land
as "Multaschen ut Kiew" bekannt.
Ut Schaschliksticken ward ganz lies
dei "Happensticken" as Sürpries**,
ok Borschtsch, dei Supp ut Rode Beten,
ward as ukrain'sche Supp nu äten.


Putin hett nu ganz verscheten ok bi blödig Rode Beten!

So wiet is't kåmen in uns Welt,
dat väl Hass sik hett instellt,
dat Fründschaft nie nich ewig höllt,
wenn dat einen nich geföllt.
In dei sülvstgerechte Wut
löscht wi alle Teken ut,
ännert alle Naams un nu
ok opletzt noch dat Tattoo...
Aver för Verleevte gellt
liek as in de grote Welt:
Enttäuschte Leevde is nu mal
nich datsülve as Moral!

* Plückkauken — Zupfkuchen
** surprise — frz. Überraschung


29.7.2022


na baven