Schandaal!Niege Norichten

vun Silke Frakstein


Ik mutt mol wedder no'n Dokter. Hüüt överleggt man sik dat, bi 10 Euro. — Obers wat mutt, dat mutt. Keen kriggt nu den ersten Toslag? De Huusdokter notürlich. Vun dor geiht dat denn no alle Sieden mit'n Överwiesen no de annern.

Allens frisch?Bi den Huusdokter holl ik mi nich lang op. De hett blots Tietschriften vun'n Goorn un all son'n annern Fachkroom. Dat is mi to langwielig.

Bi den Durchgangsdokter is dat beter. Wenn ik Klock ölben dor bün, schaff ik de "Bunte", de "Gala" un villicht noch den "Stern". Je nodem, wat grod aktuell is.
De Tietschriften sünd obers vun de letzte Week, un dat is Schiet. Hett J. Roberts nu dat Kind orrer nich? Un wat hett se för dat Lütt's köfft?

Also mutt ik no den Ohrndokter. Dor liggt allens mit dat aktuelle Datum.

De Tiet löppt so gau un de Privatpatienten löppt man jümmers so an mi vörbi in de private Töövstuuv. Stört mi allens överhaupt nich.

Allens frisch!No twee Stünnen heff ik allens dörch. Tja, Bildung is wichtig.
Besünners gefallt mi in de "Bunte" de letzte Siet. — He mit ehr und se mit em.

All de Mannslüüd ut dat Showgeschäft mit de griesen Hoor un de groten Döchter, un dat Lütt's! Och wie nüüdlich antosehn, un wo stolt dat Mannsminsch dor steiht!! —
Ach du Schreck, dor heff ik wat dörchenanner kregen, dat's jo schaneerlich. Dat is nich de Dochter, dat is de niege Fro. Un dat Lütt's is sien egen Dochter/Söhn. Obers stolt is he jümmers noch — op wat eegentlich?!



na baven