All wedder 'n Wenn'

vun Behrend Böckmann

Nu hett dei Kanzler 'n niege Wenn' an'n Wickel. Hei will, dat sik dei Ümgang mit dei välen Frömden ännert, un verlangt, dat wi endlich dei, dei nicks bi uns tau säuken hemm', in'n groten Stäl afwiesen un wedder dorhen schicken, wo's herkåmen sünd. Un so schnackt hei nu von'n "Migrationswenn'", üm Frömde "mihr un fixer aftauschuben", dei in Dütschland dat "Schlaraffenland" säuken. Nu tau Besäuk in Nigeria, will dei Kanzler bi dei Böbelsten in Nigeria för "Migrationszentren" Reklåme måken, in wecker Rückkihrer mit düütsche Hülp utbillt warden sallen.

Blot, hett Scholz ok doran dacht, dat von 14.000 Nigerianern, dei Düütschland verlåten möten, 12.500 'n "Duldungsschien" ergattern künnen, also wiederhen in Düütschland "residiern" dörpen? Un hett hei mitkrägen, dat dei JUSOs sien Infäll för "populistisch" un "rassistisch" hollen? Weit dei Kanzler nich, dat 48 Purzent von dei inwannerten Frömden in'n Momang "irreguläre" Migranten sünd un dat dorvon vier von fief åhn Popieren amkåmen un as Asylsäukende blot ehrn Nåmen, dat Öller un dat Land angäben, wo's dat as Minschen nich mihr uthollen künnen?
Weit hei ok, dat jeder föfte achter Trallen keinen düütschen Pass hett?
Weit hei, dat sik binå 'n viddel Milljon ukrain'sche Männer twüschen 18 un 60 Johr illegal inne EU-Länner un in Norwegen, inne Schwiez un in Lichtenstein uphollen, dei för 2000 $ dei nödigen Popieren köpen orrer, wenn's nich soväl inne Kniep hemm', œwer Moldau, Rumänien un Ungarn utrieten orrer gor Fluchtwääch dörch dei Theiß un dei Karpaten finnen?

"Welkeen wunnert dat? Dei Ukraine kennt ja noch kein Recht up Zivildeinst!
Un wi sünd Pazifisten! Wecker will denn an dei Front?!"

Weit hei nich, dat dat väle Migranten nich anners geiht as em, wenn hei in Peking mit sienen Amtsbrauder, den Staats- un Parteibaas Xi Jinping, up Chines'sch parlieren süll un denn as 'n dummer Jung dorsteiht? Un weit hei nich, dat dei Ünnerkünft för Frömde proppenvull sünd un dei Kommunen nich mihr weiten, woans sei dei välen Frömden ünnerbringen sallen?

"Also dat Scholz kein Chinees'sch kann, nehm ik em nich krumm!
Chinees'sch is ja noch lsimmer as Düütsch!"

Glöwt Scholz, dat ünner dei irregulären Migranten ut Eritrea, Afghanistan, Syrien un Palästina, dat dat as Staat noch gor nich gifft, orrer ok arabischstämmig Clans ut 'n Libanon, dei sik taun gröttsten Deil wiederhen bi uns uphollen dörpen —— glöwt hei, dat ünner düsse Lüüd dei nödigen IT-Spezialisten, Krankenpläger, Kellner un Handwarker sünd, dei wi säuken?

Weit uns Kanzler, dat in'n Prilmånd 2023 rund 3,9 Milljonen Minschen — 2,1 Milljonen Düütsche un 1,8 Milljonen Frömde, dei all 'n Arbeit någåhn künnen — Börgergeld affåten un dei Staat noch dei Hüer, dei Betriebs- un Heizkosten för dei Wåhnung orrer Ünnerkunft un ok dei Bidrääch för dei Krankenkass œwernimmt?

Künn dei Kanzler nich ok 'n Machtwurt räden, dat dei Goethe-Institute, dei nu wedder dat Baerbocksche Ministerium ünnerståhn, inne Plicht nåhmen warden,
Utlänner so dei düütsche Språk bitaubögen, dat's in Düütschland nich blot inköpen, sonnern ok arbeiden kœnen? Œwer nee, leiwer warrt dat Geld för dei Goethe-Institute weltwied tausamensträken (Stichwuurt: Schuldenbrems. Danke, FDP!). Nich dat dei Migranten etwa al mit Düütschkenntnisse hier ankåmen un etwa bäter hier Faut fåten koenen.

Œwer dei Kanzler hett ja noch Koalitschonspartner. Dei christlich-gräunen Kumpels in sien Taukunftskoalitschon hollen an "Multikulti" fast un klammern sik an't Grundgesetz, an dei europäische Grundrechtecharta un dei Genfer Flüchtlingskonventschon (GFK). För dei Gräunen is Asyl 'n Grundrecht, dat 'n all anne Butenscher vonne EU in't Ooch fåten süll, dormit dat Starwen in't Middelmeer 'n Enn nimmt. So as Düütsche ut'e SBZ/DDR un düütschstämmig Minschen ut'e SU, Polen, Rumänien inne Bundsrepublik upnåhmen würn, so süll man ok mit dei Frömden ut Asien un Afrika ümgåhn. Dei gräune Drom von'n Kuschelintegratschon geiht wieder. Sei hollen nicks dorvon, dörch Erlasse, Satzungen, Richtlininien, Verwaltungsvörschriften un Dörchföhrungsbestimmungen dei Gesetze un Konventschonen so antauwennen un ümtausetten, dat Utlänner von'n "irreguläre Migratschon" afseihn. Un wenn's denn dor sünd, denn möt Düütschland dei Grundrechten up Frieheit wohrn, dörf dei Staat dei "Irregulären" nich ut'e eigen Wåhnung orrer dei Wåhnung von Frünn' ruthålen, üm's för dei Utreis fasttausetten.
Dorbi denken väle, dat disse Taustrom all nålåten wüür, wenn ut Düütschland dei Nåricht keem, dat dat furtsens kein Borgeld mihr gifft, dat dat morgens un abends Schwattbrot mit Schmolt un as Meddachäten Arftensupp mit Schnuten un Poten gifft un jeder, dei arbeiten kann, all an tweiten Dach 'n Bessen inne Hand nähmen möt.

"Gegen dat Fegen heff ik ja nix, oewer Schmoltbrot?!
Denn wanner ik wirklich ut! Un ik bün borene Düütsche!"

Dei Gälen inne Koalitschon seihn, dat 'n Frömder nie gliek 'n Frömder is, dat dat weck gifft, dei dat würklich nödig hemm' un dat eigen Läben riskiern, üm Tauflucht in Europa tau finnen, un dat dat äbenso väle junge Mannslüd gifft, dei kein plausiblen Grünn' för ehr wåchhalsig Flucht œwer't Middelmeer orrer gor Atlantik hemm', as dat's nich deinen un sinnlos starwen willen orr dat's Börgergeld-Euros för 'n bäder Läben vonne Fomilie in'n Busch nå Hus schicken kœnen. Dei Gälen denken, dat 'n den Taulop von Frömde stoppen kann, wenn man bäten weniger spendabel wier (sei näumen dat "Leistungen afsenken") un anne Stell von Borgeld Betåhlkorden utgäben wür.

Dei gäle Basis œwerlecht all, ob dei FDP nich leiwers dei Koalitschon verlåten süll, üm sik sülben as Partei noch tau hollen, un denken an Tieden taurüch, as Genscher un Westerwelle noch würkliche Poletikers wiern.

Dei Kanzler verlangt 'n nieget hartet Dörchgriepen inne Frömdenpoletik, sien Parteifründ un Kriegsminister Pistorius verlangt, dat Düütschland wedder "kriegstüchtig" ward un sik in'n Kriegsfall gaut verdeffendiern kann.

"Ik verdeffendier mi mit'n Bessen!"

Orrer is doch blot allens Blöff? Blöff as bi't Inhollen vonne Europarat-Charta œwer Regional- un Minnerheitenspråken ut dat Johr 1992, tau wecker Düütschland dörch Ünerschrift dat Inverståhn geef — un liekers dat nich henkrägen hett, dat inne Landdåch von uns Nuurdlänner Platt schnackt ward, Gesetzen un Vörschriften up Hoch un Platt rutgäben warden, dat jedein Plattschnacker sien Stüerverklorung bi't Finanzamt orrer sien Föhrerschienutbillung up Plattdüütsch måken kann.

Un wenn dei Kanzler vermellen wür, dat dei "Global Dream" in Wismer as Wåhnkrüzleihner von'n Bund för dei Ünnerbringung von 9.500 Frömde œwernåhmen ward, güngen denn ok noch Minschen so as in Upåhl up'e Stråt? Dor hemm' denn dei JUSOs wull doch lütt bäten Recht, wenn's dat ganze Kanzlergeschrie von'n hartet Dörchgriepen för populistisch hollen.