Olle Schoh

vun Karl-H.Nissen

Wi föhrn up de Autobahn na Hamburg, as Korl dat Schimpen kreeg:

"Nu buut se al wedder an de Autobahn rüm. Dat is doch en Truurspeel. Jümmers is de twei. Un jümmers denn, wenn ik graad mal ünnerwegens bün."
"Korl, Jung, so en Autobahn, de höllt ok nich ewig. Un en poor Johr hett de al up ehren Puckel. De is 1937 buut worrn. Dat stell di mal vör, de is meist so old as du. Un denn müsst du bedenken, över de Johren sünd dor jümmer mehr un mehr Autos ünnerwegens un de sünd jümmer grötter un sworer worrn. Irgendwann geiht so'n Fohrbahn denn twei."
"Avers mütt denn graad in de best Johrstiet — as nu to Oostern — dor an arbeidt warrn, dat stöört doch bannig. Und dat duurt jümmers so lang. De kunnen doch ok sünndags arbeiden."
"Nu, in de best Johrstiet wullt du dat nich, un in de Ferientiet wullt du dat ok nich, un in de Wintertiet geiht dat nich. Wann denn?"
"Ach, allens Utreden!"

"Korl, ik vertell di wat. Ik heff so en poor feine Schoh, richtige Feld-, Wald- un Wischenschoh. De passt goot, de drückt nich. Ik kann dor goot up lopen. Bet vör en poor Daag. Dor harr ik doch in beide Schoh en Lock. Dat kunn doch nich angahn! Dat weern doch fast niege Schoh, villicht so söß orrer söven Johr old. Nee, wat heff ik mi argert. Ik hen na den Schooster. De hett miene feinen Schoh bekeken un denn hett he grient:
'De Gurken, de sünd up. De smieten Se man weg!'
Nee, Korl, wat weer ik in Brass! Ik heff de goden ollen Schoh nich wegsmeten. Man Anneke hett so lang drängelt, ik müss mi niege Schoh köpen. Wat seggst du dorto?"

Tja, to mien Schoh kunn Korl ja nix seggen, man dat Schimpen un Schandeern över de Autobahn-Buustellen, dat hett he nalaten.