De Plan för mien Öller

von H. Jürgen Grebin

Ick heff grad fastleggt: Ick will nie in en Hus för de ganz Ollen.
Wenn ick mal spärer old un klapprich bün, warr ick bestimmt nich in en Hus för de ganz Ollen gahn, ne: ick gah up ein Krüüzfohrtschipp.

Dei Grünn dorför hett mi uns Gesundheitsministerin Ulla Schmidt gäben: "De dörchschnittlichen Kosten för so'n Huus bedragen 220 €URO per Dach!"

Ick heff ene Reservierung för dat Krüüzfohrtschipp AIDA prüft un mütt för so ein Langtiedreis as Rentner oder Rentnerin 135 €URO per Dach betahlen — dat is kein Witz!

Na Adam Riese blieben mi denn noch 65 €URO för jeden Dach öwrich.

1. Ick heff mindestens teihn frie Mahltieden, wenn ick in een von de Bordrestaurants wackel orrer mi dat Äten von'n Room-Service in dei Kabien bringen lat. Dat heit mit anner Würd, ick kann jeden Dach in dei Woch mien Frühstück in't Bett äten.
2. Dei AIDA hett dree Swimming-Puhls, een Fitnessruum, friee Benutzung von Waschmaschien und Drööchrummel un sogor jeden Abend Shows.
3. Dat gifft up't Schipp kostenlos Tähnpaste, Rasierer, Seip un Schampu.
4. Dat Personal behannelt mi as enen Kunden, nich as ene Patienten. För 15 €URO Drinkgeld extra pro Dach läsen mi de Stewards jeden Wunsch von de Oogen aff.
5. Alle vierteihn Dach liern ick niege Lüüd kennen.
6. Fiernseiher kaputt, Glühbiern lücht nich? De Bettmatratz is tau hart orrer tau weik? Kein Problem, dat Personal wesselt dat kostenlos un bedankt sick för mien Verständnis.
7. Frisch Bettwäsch un Handdeuker jeden Dach sünd sülbstverständlich, un ick mütt nich mal dornah fragen.
8. Wenn ick in sonn Huus för Olle henfall un mi ein Ripp bräk, denn kümm ick in´t Krankenhuus un mütt noch na de niege Krankenkassenreform dachdächlich dick dortau betalen. Up dei AIDA krieg ick för denn Rest von dei Reis ein Suite un warr von den Buurdarzt umsünst behannelt.
9. Ick heff noch von keinen Fall hürt, bi den betahlende Passagiere von en Krüüzfohrtschipp von't Personal bedrängt orrer gor mißhannelt worden sünd. Von en Pläächheim kann man dat nich seggen.
10. Nu dat Best. Mit dei AIDA kann ich na Süüdamerika, Afrika, Australien, Japan, Asien un sünstwohin führn. Dorüm seukt mi in Taukunft nich in en Huus för de Ollen, sündern fraagt na en Schipp.
11. Up dei AIDA spor ick jeden Dach 50 €URO un mütt nich mal miehr för mien Beerdigung ansporen. Mien letzter Wunsch is denn bloots: Schmiet mi man eenfach öwer de Reling. Dat is nämlich ook kostenlos.

P.S. Wenn een orrer anner swienplietsch Räkner orrer Räknerin mit von de Partie sien will, besätt wi einfach dat ganze Schipp. Genuch oll Lüüd sün wi jo in Düütschland!