Olympia-Tratsch

vun Behrend Böckmann

Nådem Paris 1900 un 1924 Olympiastadt wier, is sei dat nu 2024 taun drüdden Mål — un dat süll dei Welt in't digitale Tietöller ok mitkriegen. Dei sik as "Medien" utgäben, sünd œwerall tau Stell, wo dat wat tau seihn un tau beklœtern gifft. Up 52 Hektar an't Äuwer vonne Seine würn 82 Hüs hensett't, in wecker dei 14.000 Sportler mit Begleitung ünnerkåmen. Dortau noch dei Deinstlüd, dei för Äten un Drinken, för dei Gesundheit un Ünnerhollung un dei Säkerheit taustännig sünd — inne Mensa, Klinik, Post un Spälschaul, inne Waschsalongs mit 600 Waschmaschinen un dei Schönheitssalongs — un för dei mit 220.000 Lümmeltüten füllten Kondomspenner.

Dat Patent op dat Buun mit Pappe hett Slott Ludwigslust — dei Sülen un Statuen
dor sünd all vun Ooltpappeer. Dei Idee, muttst taugeven, is nich vun Pappe!

Dat Olympisch Dörp anne Seine hett 2024 mihr Inwåhners as taun Bispill Bergen up Rügen. Un denn is dat Dörp intünt — un åhn Kontrollen, as man dat von'n Aeroport kennt, geiht dat hier nich rin un nich rut. Ganz nie is, dat Betten, Schappen, Regålen, Stäuhl un Schäselongs ut Papp sünd un nå dei Spälen tau Schauhketongs, Eierpappen un villicht sogor Klopopier ümwannelt warden. Vonne Bedden ward secht, dat dat Anti-Sex-Betten sünd, dor's twei Minschen bi'n Sex nich œwerståhn. Wecker Sportslüd dat woll utprobiert hemm...?

"Nu mal nich so wild op mien Matratz! Ik späl dor nich mit! In mi warrt bloots slåpen.
Juun Hööchstleistungen höört op den Sportplatz!"

Nie is ok, dat 'n inne Seine un nich in Schwemmbecken üm Afteiken schwemmen will. Man hett väl Geld utgäben, üm inne Seine gefohrlos tau schwemmen. Un dei Spälen hemm ehrn fieerlichen Anfang nich in'n Stadion, sonnern ünnern Häben an't Seine-Äuwer nåhmen. Un denn pladdert dat, wat von Häben blot rünnerkåmen künn! Dat Wåder löppt nich so af, as 'n sik dat dacht harr. Schwemmen inne Seine is ierst mål för Stunnen orrer Dååch nich mœglich.

Bye-bye! Dat Schwemmen is in't Water fullen!

40.000 Mann, dorünner 800 Elitesoldaten, sünd vör Urt för dei Säkerheit vonne Sportler ut 204 Natschonen un dei 32 neutralen Sportler, dorünner 14 Russen un 11 Belarussen, dei kein Verbinnung taun Ukrainekrieg nåtauseggen is. Sülfst Palästina is in Paris dorbi — mit acht Athletinnen und Athleten, dei noch nie 'n Faut up'e Ierd von Palästina sett't hemm'. Den Anfang nähmen dei Späl mit 'n Bootskorso von 94 lütte un grote Schäpen up'e Seine. Dei Paradestreck is söss km lang, un 300.000 Besäuker kœnen dit Spektakel bi strömenden Rägen beläben. Un dor — dei Utrauper verwesseln Nuurd- un Südkorea! Œwer dat måkt nicks, in'n Rägen hemm' up'e Seine-Brüggen 3000 Künstler danzt un sungen. Un wedder Gekriesch: 'n Dänzer rutsch bi'n Rägen dei Büdel ut'n Schritt. Dat kann Lady Gaga un Céline Dion nich passiern. Sei singen in'n Rägen un warden bewunnert — un denn sticht dei Olympisch Flamm mit 'n Montgolfjäh inne Hööchde. Bunt? Verrückt? Œwerkandidelt? Stimmt allens. Œwer alltauhoop hett't doch teemlich schönen Indruck måkt.

In uns digitale Welt kümmt allens an't Licht un af un an möt 'n denken, dat dei Sport blot Näbensåk is, wenn man denn dei Biller un Berichten glöben dörv. Woans sünd Sportler ut Länner ünnertaubringen, dei in't politisch Läben nich gaut upeinnanner sünd? Un wat is tau måken, wenn dei iersten Sportler klågen, dat dat Äten in't Olympisch Dörp nich so is, as dat sien sall? Klågen oewer't Äten! Utrekent in Frankriek! Wat'n Blamååsch!

Rund teihn Milljonen Intrittskorten tau Priesen twüschen 15 un 980 Euros würn verköfft; vör dei Fieern taun Anfang un tau't Enn vonne Spälen an't Seine-Äuwer kost't 'n Kort 90 Euros.

Dat is dat offizielle Späl. Dornäwen gifft't noch dat minschliche Späl, un dei Sportsminschen sünd so minschlich as annere. Dat Ut twüschen den Goldjungen Lukas Märtens un sien Leiwste Isabel Gose, dei ok as Schwemmerin in Paris is un villicht blot wägen dei Trennung up 'n sössten Platz keem, ward beklœtert. Un 'n anner Sportlerin — 'n Fechterin — hett in'n sœbenten Månd 'n Kind ünner dei Schört; un noch 'n anner lött ehrn Schatz up't Treppchen weiten, dat hei bald Vadder von'n Diern ward. Bi 'n Boxerin is man sik nich ganz säker, ob s' as Transminsch würklich 'n Fru is, denn sei boxt as 'n Kierl. Macron diniert mit so anne hunnert Staats- un Regierungschefs in'n Louvre. Dei Utgåwen warden sik up bummelig nägen Milljarden US-Dollars belopen. 'N Goldafteiken is nich ut puret Gold, sonnern hett bäten Iesen von'n Eiffeltorm in sik un deit so üm 950 US-Dollar kosten. Offiziell; den ideellen Weert för dei Olympioniken kannst nich in Dollar mäten.

För noch mihr Upseihn hettbi dei Optaktfier dei Szene mit den nåkelten un blågen hellenistischen Gott Dionysos sorcht, dei von queere Minschen un Dragqueens umzingelt wür un an dat "Letzte Åbendmåhl" von Leonardo Da Vinci erinnern süll.

Dat Olympisch Dörp blifft för dei Paralympics ståhn, dornå sallen dat Wåhnungen för dei Pariser warden. Œwer villicht kümmt man in uns verdwatsche Welt ok noch up den Infall, "Queerlympics" för dei Rägenbågengesellschaft aftauhollen. Dor boxt denn dei intersexuelle Boxerin allens fidel an dei Wand. Bloots dei Betten, dücht mi, mœten denn stabiler warrn. Oder geiht dat bi dei Queeren etwa ok so züchtig, trüchhöllern, abstinent tau? Dor wier ik denn doch enttäuscht.