Up un dål as Bülgen gliek

vun Behrendt Böckmann

Nu sünd wi all in't tweite Johr, dat dat mit dei Coronasük as Bülgen gliek up un dål geiht, dat sik Lockdaun un Schättdaun afwesseln un sik Minschen von'n Gesundheitsminister bet taun letzten Husdokter dormit befåten un noch mihr Minschen dormit ümgåhn möten. Schäulers möten von tau Hus ut lihrn, wecker süss in'n Büro an'n Klappräkner seet, möt nu tau Hus arbeiten un blot Minschen, dei as "systemrelevant" gellen, kœnen ehr Kinner taun "Notbetreuung" inne Spälschaul orrer Lihrnschaul afgäben.

Dei eerste, tweite un drütte Coronawell...

Un hett einer disse Sük upfungen, denn möt dat an't Gesundheitsamt äbenso mellt warden as taun Bispill Zeigenpeiter (Mumps) un Stickhausten (Keuchhusten) orrer Fäll von Rodplacken (Rubella-Röteln), Fladdern (Masern) un Luftsük (Diphtherie).

Op düütsche Gesundheitsämter hebbt se sachs noch düsse Rekenmaschinen! Se hebbt ja ok noch Faxe...

Un in't Gesundheitsamt geiht denn dat Räken los, üm ruttaukriegen, wurväl Minschen von Dach tau Dach ünner 100.000 Inwåhners disse Sük upfangen. Disse Nieanstäkungen an einen Dach hemm' in Afwandlung von't latiensche Wurt "incidere" den medizinschen Nåmen "Inzidenzwiert" krägen, denn "incidere" hett dei Bedüdung von "vörfallen, vörkåmen, siek wiesen". Un licht disse Wiert in'n Momang œwer hunnert, denn gellt näben all dei välen Vörschriften — wat Afstand, Schnutendauk un Hänn' waschen, Finster up un tau un stännig testen — ok noch dei Order, dat 'n nå Klock teihn an'n Abend bet Klock fief an'n Morgen blot noch mit'n Köter nå buten up'e Stråt dörp orrer man nåwiesen kann, dat 'n up'n Wech tau sien "systemrelevante" Arbeit orrer taun Notdokter is.

Un so as dat Wunner von Bern 1954 dei grote Œwerraschung in'n düütschen Fautball wier, keem 2020/21 fixer as süss 'n Sprütt as Apteikenwunner up'n Markt. Dat Vakzin gägen dei Coronasük is dor, un nu möten tauminnest vier von fief Minschen dei Sprütt kriegen, dormit dei Sük uns nix mihr anhemm' kann — un dat nich blot in Düütschland, sonnern œwerall up uns Welt, wo Minschen läben. Hentau kümmt noch, dat dei Würkung von dei Sprütt ierst insetten deit, wenn man nå'n bestimmte Tiet noch 'n tweite Sprütt kriecht. Bet dorhen is man in medizindüütsch noch nich vullstännig sprütt't. In mienen Fall hett dit tau bedüden, dat ik, wenn ik inne iersten Dåch von'n Heumånd (Juli) dewi tweite Sprütt wech heff, noch mål vierteihn Dåch täuwen möt, bet dei Fründschaft wedder bi mi inkieken dörp, wenn's dat denn sülben achter sik hett un nich dei vierte Well' up uns taurullt, dor wi wedder tau blåchögig vonne "Inzidenzen" ünner hunnert utgåhn sünd.

Weer nich eentlich de Veertall hier dat Glückssymbol...?

Sünd wi vull von Tauversicht, dat sik dat mit dei drei Coronabülgen so verhöllt as mit dei "Drei" inne Sagen- un Märkenwelt orrer in'n Globen un in'n Lüdschnack, in den dat heiten deit: "Aller gauden Dinger sünd drei". Dei drei steiht för Gott Vadder, Sœhn un Hillig Geist orrer Maria, Jesus un Josef, för drei Bräuder in'n Märken, för drei Birken, dei einer wedderseihn will, un för drei Liljen up'n Graff. Dreimål toi, toi, toi wünschen sik Spällüd, un dei Täuwerer hålt mit "Hokus — Pokus — Fidibus — dreimål schwatter Kåter" 'n witt Kaninken ut'n schwatten Zylinnerhaut.

Mit den drüdden Versäuk, dei Gesundheit von Milljonen antaugriepen, süll dat Virus dörch dei Sprütt upgäben un dei Minschheit mit "Toi, toi, toi" Gott Vadder, Sœhn un Hilligen Geist danken, dat dat nich noch leger kåmen is.