Swienjack un Swattsuer
orr: Pershing III

vun Jens-Peter Bey

As Swien heff ik dat swoor. „Dummet Swien“ bölkt de een, „Swienjack“ de anner. Mit so’n Immitsch kannst meist den Bolzenscheeter sülm ansetten. Bumms, bist weg vun all dat Elend in dien Koben, de ok nich mehr dat is, wat he fröher weer. Mit mien hibbeligen Steert kann ik nich länger utdrücken, wie mi tomoot is. De is doch all lang afkneepen. Dor hett mien Buer blots’n lütten Stummel stahn laten.

Un nu vertellt Trump — dat is de Böbelste vun de Amerikaners —, dat he Swiensbloot bruken kunn. För Swattsuer? Vunwegen. In dat Swiensbloot, igittigittigitt, schüllt all de Patronen indükert warrn, de man för dat Ümleggn vun obsternaatsche Islamisten bruken kann. För de is de Weg in’t Paradies denn verrammelt. Un denn ward dat nix mehr mit de 70 Jungfruen för dat Mannslüüd-Pläseer in’n Heben. So geiht dat mit dat Afschrecken un miteens hett all de Islamisten-Terror öberall op de Eer en End. Dat glövt Trump. Un he twittert düsse Lögengeschicht forts in de Welt.

So hett he utsehn, de General Pershing

Sien Gewährsmann is de ol General Pershing. De schall dat utprobeert hem: 50 Lüüd fangen, 49 doot scheten un Nummer 50 lopen laten. Un de vertellt denn vun dat Swienspatronenblootbad in de islaamsche Welt. Keenen truut sik mehr optomucken. De Geschicht stimmt achtern un vör nich. En Super-Fake sotoseggn. Wat en Grootmuul is, sett se liekers wedder mol in de Welt un schert sich nich üm de amerikaansche Verfaten.

Wi Swattkittel sünd swatt un sööt! Un solidarisch mit de Huusswien! Gifft keen Ku Klux Klan bi Swien!

Dootscheten is leeg, bi de Swien, bi de Minschen — Trump, nu mark mal wat. Dien Mephisto, Mr. Bannon, hest du füert. Veelen Dank. Nu bliffst du sülm dat gröttste Problem. Dien Witt Hus is kontamineert, mit di, Donald. Wenn dat so blifft, seh ik swatt un bin suer.