De Trickser vun de Presse

vun Heinz Tiekötter


Lögen droffst du jem nich ünnerstellen; eher Tricksen. Se wickelt di in, smeert di Honnig üm't Muul un kittelt geschickt wat ut di rut, wat du beter för di beholl'n harrst. Froog mol Krischan Wulff, unsen Ex-Präsidenten un vele annere Promis or Minschen, de sik dorför hollt.

Ok wenn du gläuvst, so plietsch as so'n Presse-Schrieber weerst du all lang, du ünnerliggst dor 'n groten Irrtum. Se sünd gewiefter as normole Minschen! Wenn du noch dinkst, dat du egentlich gornix seggt hest, hebbt se ehre Story lang fardig. Un denn findst di an neegsten Dag in de Zeitung wedder un dien Frünnen lacht öber di.

Kannst' di noch op Karol Jozef Woytyla, orrer beter Poopst Johannes II., besinnen? He weer jo de Reisepoopst un jümmers ünnerwegens. Wenn he jichtenswo ankeem, denn hett he doch öberall eerst 'n Liegestütz mookt un den Bodden tüschert. Villicht much he nich flegen un weer nu dankbor öber de Lannung? Man, wohen he ok keem, jedet mol, wenn he jichtenswo op de Welt ut'n Fleger stegen is, hett de Presse all op em täuvt. Un he harr jo ok bannig veel an Bottschoppen in sien Gepäck.

Eenmol keem he no Montreal. So as jümmers steeg he ut sien Fleger, hett sien Liegestütz mookt, den Bodden een opdrückt un achteran harr he Tiet för de Presselüüd.

Een vun düsse schlitzohrigen Schriebers hett em so ganz nebenbi, so achtertücksch, so richtig stickum froogt, wat he in Montreal ok 'n Bordell beseuken ward. Nu kannst du jo bloots Poopst warrn, wenn du süllmst ok bannig plietsch büst. Johannes hett de Falle glieks erkannt, de em düt Schlitzohr vun Schrieber stellt harr, un anter heel geschickt un schienbor verwunnert mit en Gegenfroog: "Wat, gifft dat in Montreal denn ok Bordelle?" Harr he man beter gornich antert un weer stillswiegend öber de Froog henweg gohn! An'n neegsten Morgen keem sien Assi in siene Komer, legg em de Zeitung op'n Disch — un he kunn op dat Titelblatt vun den "Montreal Observer" lesen: "Eerste Froog vun Poopst Johannes II. op kanoodschen Bodden: "Hebbt Ji hier 'n Bordell?"


15.4.2018


na baven