Peer kriggt reinweg de Hasskapp...

Raab-Raab un dat Polit-Theoter

vun Jens-Peter Bey


För uns Polit-Junkies is de Wuch vör de Flimmerkist allerbest indeelt mit Sünndags-Jauch, Maandags-Plasbarg un Dingsdags-Illner. Middeweeks hest du dat Vergnögen mit Anne Will, dünnersdags lusterst du Paster Beckmann to. Un achteran gifft noch 'n lütt beten wat vun Laber-Lanz, denn is de Dag so richtig rund. Vun Sünndag bit Dünnersdag kannst Kubicki kieken, bit du den Kanal full hest. Freedags schall he sik verpusten, wenn nich grad Oliver Welke in sien Satire-Show eenen nieden blau-geelen Kasper bruken deit. Kubicki is överall un nirgends. He quasselt mit sien Koddersnuut de Fru von der Leyen an de Wand, opto noch — wenn't sien mutt — den Stasi-Gysi mitsamst Napoleon sien langhoorigen Wagenknecht. Wat'n Vergnögen: Dat Sülbige snacken, ümmer noch mal: vun vörn un vun achtern, vun ünnen un vun baben, vun linkerhand un vun rechterhand. Un immer dörchenanner. Dat is Talk-Show, Wuch för Wuch, sünnabends frie.


...wenn he den Raab süht

Ik kann dor liekers nich nuch vun kriegen, wenn de Klooksnackers räsoneert un Rad slagen dot, as en Pageluun, de imponeern will. Dat hett Format. Un denn giff dat in de Brangsche noch en Königsformat: Ik meen dat Kanzler-Duell. Wenn du un ik, as Suverän soteseggn, wenn wi as Wählers mit twee Krüüzen op'n Wahlzettel all uns Knööv bewiesen künnt, denn is na veer Johrn wedder High Noon in Berlin und in uns Republik.

Dormit wi nich vörbischeeten doot, gifft dat vörher — Kanal för Kanal — so'n fien uttareerte staatsche Talkshow, wo uns Kanzlersche sik mit Problem-Peer Steenbrüch mol düchtig afrangeln kann. Un du glövst nich, wat ik jieperig bün op düt Duell. Un dor is Edmund Stoiber an schuld.

De aftakelte Monarch vun Bayern harr Langewiel op sien Olendeel. He hett unvermodens en Polit-Talent in't Speel bröcht, dat nie nich to sehn un to hörn weer. Stephan Raab vun Pro 7 schall ok moderiern, meent Stoiber, de sik as Vörsitter vun'n Pro 7-Opsichtsrat noch 'n lütt Tobroot verdeent. Marks Müüs? "Waddehaddedudeda", leeve Edmund? Wat hest du denn opeens för snaaksche Ideen? Beten wat för de Quoten doon? Dat rekent sik! Plinker, plinker! Dat is mal 'n Innovatschoon, de dat in sik hett. Raab kann so drollig un prollig sien, nee ok doch. Veel beter as Cindy ut Marzahn. Dor smitst di hin vör Vergnöögen, kloppst op dien oder Naver sien Schenkel un büst anduernd bi to lol-len. Du kennst dat Lollen nich? So heet hüttodags dat luud Loslachen bi de Lüüd vun 14 bit 49. Un op de kümmt dat an bi dat Privat-TiVi.

Raab-Raab rundüm. Uns Billerblatt hett em Dag för Dag hochschreeben. De jungen Lüüd un sogor Sänger Campino vun de Doden Büxen, all sünd se för Raab, steiht dor mit groote Bookstaben. Ja wenn dat so is, denn geiht dat nich anners! Blots Steenbrüch hett glieks seggt: Raab kümmt nich in Fraag. Nich lang achteran sien Rull trüchwarts. De kann he good. He seggt: Wenn de Kanzlersche dat will, geiht dat kloor, ok mit Raab. So maakt Politikers de Komikers arbeitslos. De Show vör de Show is grulich. Sponti-Peer is wedder mol in de Bredullje, un de Kanzlersche höögt sik heemlich.


Raab schall sik warm antrecken! Steini ok

Ob Raab sik Undöög utdenken deit för dat Kanzler-Duell? Dor kannst op af. Paar Saaken sünd meist schon to dull affgrabbelt un to oldbacksch. Ik kann mi Fru Merkel bi'n besten Willen nich mit'n Achtersen op'n Wok oder op dat 10-Meter-Brett vörstellen. Un dat Boxen gegen Raab kümmt wohl ok nich in Fraag. Ehr Sakko blifft an, Raab sien Nees blifft heel. Liekers schüllt wi doch 'n beten juchen ok bi dat Kanzler-Duell: Wenn Stephan den Peer angrient as 'n Breetmuul-Pogg un seggn deit: "Wetten, dat ik mehr verdeenen do as Se un de Fru Bunnskanzlerin un Uli
Deppendörp tosamen?", denn kümmt dor Leben in de Buud un mien TV-Schöttel wackelt vör Vergnöögen. Steenbrüch ward sien leeve Not hem bi dat Thema, un he mutt sik bannig an'n Reemen rieten. Un de Kanzlersche kann grienen un doon wat se immer deit: Töven bit dat de Anner sik mal wedder üm Kopp un Kragen snacken deit.



na baven