RAWA (Organisaschoon
vun afghaansche Fruuns) schrifft to den Johrdag vun de Tragödie
an'n 11. September:
Fundamentalismus is de Fiend vun alle minschliche
Zivilisaschoon |
|
RAWA denkt tosaam mit de
ganze ziviliseerte Welt an de unschülligen Minschenleven, de an'n
11. September verlaren gungen, un an alle de annern, de dör Terrorismus
un Ünnerdrückung överall in de Welt doot bleven sünd.
Mit grote Trurigkeit seht wi, woans annere Minschen de Pien erfahrt,
de de afghaanschen Fruuns, Kinner un Mannslü al lang ünner
de Hannen vun fundamentalistische Terroristen to duren harrn.
Tein lange Johr wurr dat Volk vun Afghanistan - besünners Fruuns - brutaal ünnerdrückt, toeerst dör de Greuel vun de Fundamentalisten vun de "Nordallianz", denn dör de vun de Taliban. Düsse ganze Tied stüürn de westlichen Regeern dorop, Weeg to finnen, mit düsse Kriminelln "tosamentoarbeiden". De westlichen Regeern hebbt nich veel slaaplose Nächt hatt vunwegen de däägliche Quälerie vun hülplos Elend, de uns Volk ünner de Fuchtel vun düsse Terroristenbanden lieden dä. Dat maak jüm nich veel ut, dat Minschenrechte un demokraatsche Grundsätt dalpedd wurrn, dagdääglich, in unvörstellbare Wies. Wichtig weer bloots, mit düsse Religio-Faschisten "tosamentoarbeiden", domit Öl-Pipelines vun Zentraalasien na togängliche Havenstädte buut warrn kunnen. .......................... Foorts na de Tragödie vun'n 11. September is de amerikaansche Militärmacht op losgahn, ehr fröheren Mietlinge to bestrafen. Een fesselt, blöden, verwööst, hungern, verelendt, utdörrt un unglücklich Afghanistan wurr vun de foortschrittlichste Wapentechnik, de dat in de Minschengeschicht je geven dä, in Gruus un Muus bombt. Unschüllige sturven - veel mehr as in den Greuel vun'n 11. September. Sogoor fröhliche Hoochtiedssellschapen wurrn nich schoont. De Taliban un ehr Al-Qaida-Hölpers weern störrt - ahn veel Verlusten an ehr Kämper-Reservern. Man wat nich afschafft weer, dat is de kole Schadden vun terroristisch Draun över de ganze Welt un sin Alter Ego, de fundamentalistische Terror. Nich Opium-Anbuu un nich dat Marodeern vun "Warlords" sünd
in Afghanistan afschafft. In düt quälte Land gifft't nich
Freden noch Stabilität noch jichtenseen Atenholen vun de Geißeln
vun extreme Armoot, Prostituschoon un mootwillig Utplünnern.
Fruuns föhlt sik noch weniger seker as fröher. De bittere
Wißheit, dat nich mal de Sekerheit vun'n Präsidenten vun't
Land ahn utlännische Bodyguards ophollen warrn kann, un de letzten
terroristischen Daten in uns Land spreekt düüdlich vun de
chaotische un terror-plaagte Situaschoon vun't Land. De "Nordallianz" warrt nienich eernsthaft de totale Utlöschung
vun'e Taliban un vun Al-Qaida wünschen, denn dat weer ok dat
Enn vun de Nordallianz ehr Existenzberechtigung, ok dat Enn vun't
Ünnerstütten un Feddern, dat se nu dör de westlichen
Kräfft hebbt. Dorwegen hett RAWA ok jümmers feddert, dat
de Taliban un Al-Qaida dör een Opstahn vun't afghaansche Volk
afschafft warrn schullt. Man leider, ehrdat so een Opstand passeern
kunn, hebbt de Taliban un de Al-Qaida jümehr Macht un Posischoonen
an ehr "Bröder vun de Nordallianz" verlaren - ahn dat
se dorbi dull Schaden orrer Verluste an Kämpers harrn. ..........................
Dat ganze Land is vull vun Ünnerdrücken un Verbreken gegen
Fruuns. RAWA hett jümmers seggt, dat de Fundamentalisten ehr
wilder Hass op Fruuns as gliek-stahn Mitminschen (egaal, wat dat Fundamentalisten
vun de Taliban orrer vun de Jihad-Raaß sünd, as se in de
"Nordallianz" sünd) nich bloots vun jümehr unsunde
Kinnertied mit falsche Optrecken kümmt, ok nich bloots vun ehr
krankhaften Geistes-Verfaat, man sünnerlich vun ehr religio-faschistische
ideologische Weltsicht. Solang dat so een Ideologie gifft, opsett
un redig ünnerstüüt vun Militärkräfft, so
lang warrt nich wahnsinnige Fruunsfiendlichkeit noch Dusende annere
schandbore Mißstänn afschafft. Mit dat Schaffen vun een
"Fruunsministerium" ("Ministry of Women's Affairs",
as dat dat nu gifft) kümmt een düsse Saak gor nich bi, ok
nich mit een poor Alibi-Fruuns in hoge Regeerungsposten. Op Frieheit,
Demokratie un Gliekheit to höpen in een Staat un System, dat
korrupt, religioons-baseert un ethno-chauvinistisch is, dat is Sülvstbedregen
orrer Hücheln - orrer beed. ............. RAWAs Kämpen gegen den Fundamentalismus, sünnerlich in de letzten 10 Johrn, vermünnert us alle, noch taagnackiger to ween in uns Bemöhn, de Fruuns ok in de wietlöftigste Eck vun uns Land to Been to bringen. Togliek dröfft wi nich ophöörn, een unversöhnliche Politik gegen Fundamentalismus to maken un mit alle demokraatschen Kräfft tosaamtostahn. Wi sünd övertüügt, dat - babento, dat dat mihr as 3000 unschülliger Amerikaners dat Leven kost hett un Teindusende mehr üm ehr Leevstes bracht hett - de monströse terroristische Attack vun'n 11. September de Welt wiest hett, wat een schändliche Pest de Fundamentalismus is; dat hett de Welt wiest, in wat een Inferno de Minschen in Afghanistan, Iran, Algerien, Sudan un annere solk Länner leevt. Fundamentalismus is de Doodfiend vun minschliche Zivilisaschoon; em bitokamen brukt dat dat Tosamengahn vun alle frieheit-leven Naschoonen vun'e Welt. De nu bestahn "weltwiede Anti-Terror-Koalischoon" is verfälscht vun veel Tweedüdigkeit un falsche Zwecke, Telen un Motivaschoonen. De Wedderspröök twüschen de Weltmächt warrt ehr bilütten tonicht maken. Dorüm mööt anti-fundamentalistische Minschen un Organisaschoonen, de för Gerechtigkeit warkt, in alle Welt ahn Tögern tosamengahn un för alle Tied dat Gift vun'n Fundamentalismus utrotten, dat sik de Tragödie vun'n 11. September nienich wedderholen kann, nich in Amerika un nich annerswo. |
|
Revolutionary
Association of the Women of Afghanistan (RAWA) Düsse ungewöhnliche Organisaschoon besteiht siet 1977 un is een Tüüchnis vun'n entslaten Wedderstand vun afghaansche Fruuns. Dusende RAWA-Mitleder hebbt in'n Ünnergrunn un in't Exil warkt, binah 30 Johr lang - gegen dat Sowjet-Regime, de Mudschaheddin, de Taliban - un vundaag is RAWA so stark as nie tovöör. Avers schoonst RAWA nu mehr apen warken kann, is een groot Deel vun jümehr Wark noch anonym un in'n Ünnergrunn. Un liekers wat de Westen jümmers veel vun een liberalere Sellschap reedt, hett RAWA nienich jichtenseen Ünnerstütten vun een Regeern kregen. Een Gedicht vun de Grünnerin vun RAWA op Platt un Ingelsch: hier klicken |