Klick op to'n Vergröttern!

Dat Rennen

vun Hannes Frahm

Wettrennen is en Spoort, de al in de Antike en heel wichtige Oort an Spoort weer un vundaag ok noch is. So köönt wi dat bi de olympischen Spelen all veer Jahr wedder sehn.

Doch middewiel ist dat Wettrennen al lang nich mehr bloots in uns Spoort to finnen. Düt Wettrennen hett sik överall rinmengeleert, so as al in de 50er un 60er Johren, wo de Höker in uns Dörp dat Wettrennen mit de Supermarkten un vundaag mit de Discounter leider verloren hett. Wat vundaag de Börgers vun so en Dörp eerst bannig later markt hebbt, dat nu doch en groot Stück an "sozialen Kuntakt" in uns Dörp fehlen deit. Datsülvige is mit de Spoorkass, mit den Melkmann, mit den Schooster un den Snieder.

Dat Wettrennen is denn aver noch wieder gahn un heet vundaag "Globaliseren". Un dat dore Wettrennen is nu so wiet kamen, dat wi to'n Anfang vun de Pandemie "Covid-19" keen Masken un ok keen Stoff to'n Impen harrn un ok nu noch nich so richtig kriegen doot. Aver is doch ok so egal as en "Muusköttel", de is ok egal, denn he is an beide Sieden spitz, as mien Opa jümmers see. Un över Muusköttel kümmert sik doch uns Politik nich. Bün nu mal spannt as en Flitzbagen, wat uns in de neegste Tiet noch fehlen warrt.

Aver uns Politikers hebbt ja jümmers den besten Rüker, wenn de Saak to hitt un to dull na anbrennte Kantüffeln anfangt to stinken.

Theaterschauspelers worrn do nienich in een un datsülve Theater op de Hauptbühn den Hamlet spelen un blangenbi op de Nevenbühn in den glieken Theaterruum dat Stück "Ein Herz und eine Seele" geven! Politikers schafft dat. De schafft dat, dat de Börgers vun dat Lamenteren vun de Parteien sik vun Politik un dormit ok vun de Demokratie torüchtrecken doot.

Uns Karkenlüüd, de minschlich in de verleden Johren na den Krieg veel verbuckt hebbt un Minschen nich as Minschen behannelt hebbt, sünnern as Veeh, de treckt sik tominnst bi den Kamp üm den Platzhirsch torüch. Eerst bi den witten Rook kaamt de wedder rut un maakt künnig, wokeen dat Wettrennen wunnen hett.

Muuloprieten hett Tradischoon bi de CSU...

In de Politik staht sik nu bi de CDU/CSU twee Achtteihnenner, en BMW 320 ut Bayern un en Ro80 ut NRW, gegenöver. Diesel- gegen Wankelmotor, wokeen maakt dat Rennen bi düssen Wettloop? Köönt nich ok düsse Achtteihnenner sik mit ehr Rudel in en grote Hall ahn Getöse, ahn Medien torüchtrecken un dat Rennen maken?

Ne! De bruukt de Nevenbühn, denn op de Hauptbühn speelt dat Stück vun Covid-19. Op de Hauptbühn geiht dat üm "Leven un Dood" un op de Nevenbühn üm ….., ja üm wat egentlich, fraag ik mi?

Politik?
Ne! Politik maakt de Parteien in de Gremien un de Utschüsse, dor sünd all an bedeeligt.
De Richten, woneem de Politik henföhren schall?
Ne! Dat maakt de Koalitschonen mit ehr Uthannel in en Verdrag! Un dorna kummt dat op de Menen vun de Fraktschonen un op de "Lobby" an.

So blangen bi: In Grekenland heet Lobby "fákelos"! Un kennt jüm en Koalitschoon ut CDU un SPD ahn CSU, oder CSU un Gröne ahn CDU?

Also, wat schall düt dösige överflüssige öffentliche Wettrennen bi de CDU/CSU? Sünd de Politikers so naiv, dat de gloven doot, dat dodörch mehr Börgers to de Wahlurnen kaamt?

Villicht steiht ja en ganz Annern al in de Startlöcker un töövt op den Knall to'n Loslopen. Tominnst heff ik al en Präsent as Wahlofferte kregen, ok wenn se dat "H" vergeten hebbt!

Hmmm, mal nadenken, woneem kunn dor en "H" fehlen...?