Skizze för en Schölerdemo-Resoluschoon

vun Marlou Lessing

Opstunns demonstreert allfriedääglich de Schölerschen un Schölers överall in Düütschland gegen de Klima- un Ümweltpolitik un för en levenswerte Tokumst — toletzt sogor ganz groot in Hamborg mit Greta Thunberg (de en kaptale Deern is). De Reden weern good; ik kunn mi dat avers noch klorer denken un heff hier as Anregen dree Pünkt opstellt.

De Junglüüd maakt künnig:

1. An de politischen Parteien:

Wi warrt nienich en Partei wählen, de Natuur un Levensgrundlagen nich konsequent, nahaltig un ut Övertügen schulen deit. Överleggt sik dat. Mennig vun uns kaamt bald in't Wahlöller. Kultur, Weerschap, Lifestyle sind för uns narangig. Wi laat uns nich köpen un besteken. De Schuul vun de Eer hett för uns de eerste Priorität. Wi warrt uns Wahlentscheiden dorna utrichten.

1. An de Industrie:

Wi warrt nienich juun Kunden un Konsumenten warrn, wenn ji nich Produkte anbeden doot, de wirklich nahaltig un natuurverdreeglich sünd un nau so herstellt warrt. Wi warrt juun Produkten ok denn nich köpen, wenn se billiger sünd as de ümweltgerechten Produkten. Se sünd nämlich nich billiger, sünnern dürer; avers den Pries betahlt de Eer, un dat heet, den Pries betahlt de Tokumst. Dat warrt wi nich düllen.
Wi warrt uns aktiv dorför insetten, dat all Waren, de wi bruukt, ümweltverdrääglich sünd un herstellt warrt. Un wi warrt dorför sorgen, dat schädliche Waren den Pries hebbt, de ehr Schädlichkeit tokümmt. Solang dat nich so is un solang schädliche Waren billiger sünd as gode, warrt wi uns aktiv dorför insetten, dat ok ärmere Lüüd de Produkten köpen köönt, de een mit good Geweten bruken kann. Dorto mutt denn de sellschapliche Riekdom passlich ümverdeelt warrn.

3. An uns sülvst:

Wi sünd ok redig, to verzichten. Wenn dat to en Produkt orr Handlungswies keen ümweltgerechte Alternative gifft, denn warrt wi even sporen orr verzichten. Dat gellt t.B. för Floogreisen, Water in Plastikbuddeln un Fleesch. Wi köönt uns Konsum verringern. Wat uns Tokumst in Gefohr bringt, bruukt wi nich un hebbt wi nich nödig. Wenn wi seggt, dat de Schuul vun de Eer för uns Priorität 1 hett, denn meent wi dat ok so.