Rosenmaandag an'n Rhein

vun Karl-H.Nissen


Korl hett den Kopp schüddelt.
"Rosenmaandag is doch lang vergeten!"
Ik heff em dat verkloort.

"Uns oll Fründ Dieter harr Geburtsdag, en hogen, runnen. Un he hett uns inlaadt. Fein, nich? Nu is dat so, Dieter wahnt in de Gegend, wo Karneval to Huus is, un jüst in de Tiet is sein Geburtsdag. He harr gor keen Tiet to sien egen Fier. Dorüm hett he dat en beten later maakt. Wi sünd geern henföhrt. Dat heet, wie hebbt uns föhren laten vun enen vun uns Enkeljungs. Prima.
Dat is en feine Gegend dor. Keken wi ut dat ene Finster, denn hebbt wi den Rhein sehn, keken wi ut dat annere, harrn wi hoge Bargen vör uns.

Un denn de Geburtsdag! En Barg Lüüd, de wi all nich kennt hebbt. Weer keen Problem, wi kemen ut dat Snacken gor nich rut.
Denn hett Dieter en richtige Büttenreed hollen. Wi hebbt uns wunnert, wo good he dat trecht kregen hett.
Achteran kemen lütte Funken-Marikens, so acht Johr old, hebbt danzt, sünd koppheister schaten, weer ene Pracht.

To eten un to drinken geef dat rieklich. Musik weer dor, allens so ut de Johren 1960 bet 1970, dat richtige för unsen Johrgang.
Mit Marschmusik kemen Mannslüüd rin, hebbt danzt, harrn Fruunskleder an, kunnst di bögen för Vergnögen."

"Nu vertell mi doch blots mal, wi kaamt ji an so enen Fründ in de Gegend?", wull Korl weten.
Ik müss grienen.

"Dat is en wunnerlich Geschicht. Dieter leevt nu all recht en poor Johr in de Gegend. He is sogor een Johr Karnevalsprinz west, so in bunte Kleder mit so'n Mütz up den Kopp. Avers, du warst dat nich glöven, Dieter is en richtigen holsteener Jung. He kümmt ut Eutin."


25.3.2014


na baven