Schandarm mit Scharm

vun Jens-Peter Bey

Wenn de Kanzlersche mit de Oogen plinkert un ehr Botterlicker-Snuut opsett, kann dat sien, dat nich ehr Jochen Suer meent is un eerst recht nich Peter Altmeier, de Politklops. Fru Merkel speelt in de Champions-League un verschlitt veel vun de Böbelsten. Bush junior hett all lang utdeent. De hett dat ok ’n beten dull dreven. Huusbesöök in Mäkelnborg un Kuschelee in den XXL-Strandkorv in Hilligendamm, nix as Snee un Sünnenschien vun güstern. Mit DSF, de Dütsch-Soffjettische Fründschaap, is dat ok vörbi. Putin, de Dösbaddel, kriggt keen Grientjer mehr, wenn nich sien swatte Töle buten blifft.

Quell un grötter Verschoon: hier

Opletzt hett nu Barack Obama de Nees un de Ohrn vörn. Hier ’n Seuten, dor ’n Seuten för Fru Angela. Opto noch heemli strakeln, wenn de Kanzlersche vun de 3-D-Brill op de Hannels-Mess aflenkt is. In Hannover hett Barack sik bannig in’t Tüch leggt.

Achtersinnig weer dat ja mit sien Baggeree bi Angela. Lütten (T)Tipp vun em: Aflenken, anvietzen, klook snacken, düchtig eien — un furts sünd dütsche Suldaten dor, wo se nie wedder hin schulln. Man, de rolleert tohoop mit de NATO-Frünn blots so’n beten dörch dat Baltikum un Polen.

"Solang wi uns bewegt, kannst doch nich seggen, wi weern dor!
Un wenn dree Panzers sik dorbi afwesselt, is praktisch keen Panzer dor!"

De Lüüd dor sünd rein ut de Tüt vör Begeisterung, dat mit 250 Panzer miteens so veel Sekerheit produzeert ward, dat Putin sik düchtig verfehrt. „Substanzielle“ Statschoneerung is verbaden, seggt en olen Verdrag vun de NATO mit Russland. Wat scheert uns dat? Säbelrasseln mit Larm vun Panzerkeeden is Freeheitsmusik. Un roteern tellt nich, dat mutt Putin doch insehn.

He is liekers vergrellt? Keen Wunner. Putin speelt mit sien swatte Töle un gruvelt. Blots nich vun de Lien laten, Wladimir. Wi künnt doch so scharmant sien, wenn wi wüllt.

Schull Donald de Dösige anner Johr in Amerika dat Seggn hem, is dat wohl ut mit Fru Angelas Plinkeree. Schaad, wi harrn uns jüst doran gewöhnt.