Schoolalldag 2023
— As en Oma ut Neddersassen dat beleevt —

vun Meike Balzer-Fraun

Recht op Billen — Schoolplicht — Ganzdagsschool — Scholen mit Verlaat. All dat dücht uns so kloor un wichtig, man wo süht dat jüst dormit ut?

Heel praktisch, dat uns Corona dat ‚Home office' brocht hett. Passt ja allerbest!
Mama kann tweemaal de Week to Huus arbeiden, wenn oppen Stünnenplan mal wedder ‚Entfall' steiht, oder wenn de Kinner to Huus blieven mööt, wieldat se en lüttjen Snööv hefft.
In Papa sien Beroop is ‚Home office' nich begäng, geiht ok bie'n besten Willen nich.
Ne, de Öllern speelt nich morgens al Golf, se mööt arbeiden, un dat nich to knapp.
Överstünnen sünd ok bi ‚Home office' nix Besünners nich. (Blangenbi: ‚Home office' un Kinner to Huus is nich dat, wovun een dröömt!)
Uns Kinner arbeidt ok för de Rentenkass un hööpt, dat ehr Rente later mal henlangen deit.
Generatschonenverdrag nöömt sik dat.

Torüch na School:
För Hölp bi de Huusopgaven oder Freetietsanbotten gifft't keen Lüüd (oder keen Geld?) mehr. Köönt sik ja Mama un Papa avends fein mal wedder op ehr Schooltieden besinnen. Na't Eten natürlich, denn Middageten inne School gifft dat bi ‚Entfall' ok nich. Schaad, aver nich würklich, smeckt so un so nich mehr, mutt ja jümmers allens billig sien.
Utflöög, Wannerdaag, Besöök in't Museum, Schoolfesten, allens Tüünkraam ut de
Vör-Corona-Tieden. Verlaten kannst di blots noch op Klassenarbeiden, de zentrale Afslusspröven un Tüügnissen. Un dat heet: unafhängig vun ‚Entfällen'.

Männichmal gifft dat bi ‚Entfall' tominnst ‚Homeschooling'. Faken sünd dat wohrhaftig blots Henwiesen op YouTube-Films. Düsse Schoolmeesters för Vertredensünnerricht sünd ja ok meist Corona-Nablievels. Ofschoonst Lehrer Schmidt to'n Bispiel di de Mathematik fein utenannerpuult. Aver richtig lehren is ja nich blots tokieken un luustern, lehren bruukt Gespräken, öven, Fehlers maken, fragen, diskeren, een, de di tohöört un antert. Dat kann de beste YouTube-Film nich.

Uns Enkel lehrt geern mal bi Oma un Opa. Dor gifft dat denn ja ok leefste Spiesen un to'n Nadisch veel Tiet för Brettspelen an'n Kökendisch.
Opa is jüst Siedeninstieger för Atomphysik un de Geschicht vun Bosnitt, Bostoffen un Bomeesters. He is al neeschierig, wat nahstens kümmt. Den Taschenreekner, de ok teken kann, den harr he dunnmaals ok geern harrt.
Oma kümmert sik fackfrömd üm Schiller sien Röver, den ‚binneren Dialog' un Balladen. In Engelsch is se nich fackfrömd; man wo dat nu lehrt warrt, dor mutt se sik negen Johren na ehr Penschoneren ok eerst mal rinfinnen.

Wi hefft Tiet, wahnt dicht bi, köönt noch hölpen, hefft Spaaß dorbi un sünd dankbor, dat wi noch so fein bienanner sünd.

Wo blifft aver all de Jungs un Deerns, de ehr Öllern keen ‚Home office' maken köönt, de ehr Grootöllern nich hölpt, de keen Nahölp betahlt kriegt? Wat maakt de Lüüd, de keen Düütsch nich snackt? Wo veel Familjen hefft to Huus keen Togang to Internet, Computer un Drucker? Wo veel Öllern hefft keen Tiet, Geld oder Intress, sik üm en Sportvereen to kümmern? Un, un, un,….????

Torüch na School? Mit 73 un 75? Ne, so goot geiht uns dat denn doch nich mehr.

Recht op Billen — Schoolplicht — Ganzdagsschool — Scholen mit Verlaat.

De Kinner bruukt de böverste Positschoon in uns Finanzpolitik, denn dat bruukt doch massig plietsche junge Lüüd, de all den Schiet, den wi jem nalaat, wedder op Schick bringt.

Uns Kinner sünd uns Tokumst. Wi dörvt ehr Schoolbillen unmööglich vermasseln.