En Angeliter vertellt:
De Schosteen mutt rooken

Vun Helmut Marxen


 

So as jede Johr harr sik annerletzt unse Schosteenfeger per Postkoort anmellt un geev Bescheed, dat he unse Heizungsanlaag överprüfen wull. He keem denn ok pünktlich, kreeg sien Instrumententasch paraat un söche na Manko bi de Heizketel. Poor Minuten, so weer he mit de dore Prüfung dörch.


Brenner. Foto Krallis/Wikimedia Commons

As "in Ordnung" afhaakt weern in dat Prüfprotokoll denn ok glieks "Verbrennungsluft, Brenner, Abgasabzug, Brennerhöhe, Abgasleitung" un noch so'n poor Kleenigkeiten mehr. Ok bi CO-Gehalt, Abgastemperatur un Abgasverlust geev dat schienbor nix to meckern, denn as Endresultaat harr de fründliche swatte Mann op sien lange witte Vördruck ankrüzt: Das Messergebnis entspricht der Verordnung.


Heizungsanlaag. Foto Rudi Witzke

Egentlich harr ik dat ohne Instrumenten ok al vörher vertelln kunnt. Ik harr man jüst de Wartungsdeenst för unse Heizung bi uns hatt, de Prozedur na Reinigung mit achteran glieks nü instellte Technik leep dorbi akkerat so af. Is jo binah so spannend as de TÜV-Termin för dat Auto oder de Checklist afhaken bi de Dokter, wenn de egen Mechanismus mal wedder vun Hack to Nack överprüft warrt.

Wenn't denn aver an de Ersatzdeele geiht, denn sind mi de Kosten för Instandsetten bi Heizketel oder Auto bi de Enn doch noch wat lever, ok wenn hier un dor mal wat utwesselt warrn mutt.

Bi Papierkraam sind unse Schosteenfegers de Krankenkassen so bilütten achterna. Tosätzlich to dat Prüfattest un as tweete Blatt de Johresreken mit mehr as en halve Dutz Eenzelpostens kregen wi nu as lange Text op fief Schrievmaschiensieden ok noch nüe Vörschriften för dat Schosteenfegerhandwark uthännigt.


Kellertank. Foto Rudi Witzke

Vun 2013 an, so sä de fründliche un sünst jo överall as Glücksbringer geern tituleerte swatte Mann to uns, mutt allns op EU-Recht ümstellt warrn. Dat düütsche Schosteenfegerrecht mutt an Europarecht anpasst warrn, kregen de klooke Experten in Brüssel utspiekeleert — un dat sall nu losgahn. Wat doch en Glück för uns, dat de Vörschriften för unse swatte Glücksbringers endlich reformeert warrn. Stell di mal vör, de EU-Bürokraten harrn uns in dit Rebeet översehn! Weer eenfach nich uttodenken, wo wi doch to grote Deel intwischen dormit dörch sind, överall in Köök, Keller un Kaamer jede elektrische Beer dörch örnlich wat dürere Energiespoorlampen to ersetten. Dank de dore EU is intwischen de gröttste Deel vun unse utwesselte unmoderne Lampen problemlos in de Mülltunn ballert wurrn. Jetzt mutt uns aver noch bibröcht warrn, dat wi uns an de nüe Lampen wegen Krebsgefohr nich so dicht ranwagen dörm un dat de as Sondermüll op de Reis bröcht warrn möten, wenn de mal in'e Grütt gahn. Aver dor is jo örnlich wat längere Levensduur bi de Quecksülverlampen, de hooln villicht länger as dorvun elennig wurrne Menschen.

Na de 1. Januar 2013 kümmt unse gewohnte Kaminfeger nich mehr vun alleen to uns. He kehrt sik üm Kehrarbeit vun Huus to Huus nur noch, wenn he tiedig vörher extra schriftliche Order kriegen deit. Grund is, dat de EU-Richtlinien in Tokunft ok Kehrbessenfachlüüd ut annere EU-Länner to uns bringen dörm. So is denn de Sott villicht sogor wat billiger ut de Schosteens to kriegen. Aver keensfalls mehr as dat, denn "hoheitliche Tätigkeit wie Feuerstättenschau, Feuerstättenbescheid, Abnahmetätigkeit" mutt bi unse gewohnte Schosteenfeger blieven. Eenzige Troost is, dat mank all de Papierkraam ok en Vordruck as Opdragzeddel weer, de mit Ünnerschrift afschickt warrn mutt. För eenfache Breefporto is dat ganze Problem sodennig to lösen.


Bringt de poolsche Schosteenfeger ok Glück mit? Hebbt de Bürokraten da över nadacht?

Mehr musst ok nich dorbiwagen, wenn du as friee Bürger in friee EU-Land vun 2013 an en Schosteenfeger irgendwo ut annere EU-Länner to di beordern deist, dormit de Schosteen rooken deit — bi di un natürlich ok bi de Kaminfeger ut Polen, Frankriek oder vun sünstwo her. Wenn de denn sogor wat billiger is as de gewohnte swatte Mann ut unse Gegend, denn brukst nich lang rätseln, wer du de dore gewaltige Stück vun noch mehr Levensqualität to verdanken hest. Fegen bringt Segen — de bannig överlastete Schrievdischlüüd bi de Europäische Union denken eenfach an alles!


19.6.2011


na baven