Dat Smart-Fon maakt Smaarten...

"Smartfoon"

vun Heinz Tiekötter

Vundoog is düchtig wat los in'n düütschen Bundsdag: Uns Bundeskanzlersche schnackt "to de Loog vun uns Naschoon".

De Fernsehkamera mookt een groten Schwenk dörch den Plenorsool. All sünd se anwesend un wiest uns, dat düütsche Afgeordnete flietig sünd, wenn dat üm uns Tokunft geiht.

...aver nich för de Afordneten hier!

Doch, nu stopp mol eben: Wat is dat? Wohen du ok kiekst, wat'n Bild vun Gemeensomkeit! Öberall hebbt de Afgeordneten jemmer Händies in de Hannen! Villicht speelt se "Schiffe versenken" orrer mookt Krüzwoortradels. Kunn ok angohn, dat de Plietscheren ünner jem ok Schach speelt. Jedenfalls, dat, wat uns Kanzlersche to berichten hett, interessiert jem nich sünnerlich. Se kieken knapp mol hooch, wat dor noch wat kümmt, wenn Änschie en Paus mookt, üm Luft to holen.

Wat is dat för'n unheuflichen Vereen in Berlin! Änschie deiht mi orrig Leed. Du müsst di dat mol vörstellen: De Bevölkerung söcht sik 709 Lüüd ut un schickt se no Berlin, dormit se dor de Regierung kontrolliert. Wenn de Böberste vun de Regierung — dat is nu mol uns Änschie — öber uns natschoonole Tokunft un uns Schangsen in de Welt schnackt, spelen de Kontrollöre mit jemmer Händies. Uns Scheffin is jo to bewunnern, wat se sowat doch geloten wegsteken kann.

Denn, so no dree bit veer Glöös Woter — dat mutt ehr doch op de Bloos drücken! — un gode annerthalf Stünn Redetiet, bedankt se sik höfflich för de grote Opmerksamkeit un geiht trüch to ehrn Platz in de Regierungsbank. En poor vun ehren Vereen leggt dat Händi kott ut de Hann, kiekt mol eben hooch, nickköppt un klatscht anerkennend. Dat weer en grote Reed düt Johr!

Merkel truut nüms, all schuucht se per WhatsApp un SMS rüm!

Nu kümmt de Oppositschoonsfeuhrer. He steekt sien Händi in de Jackentasch, denn he weet, dat Fernsehn mookt to Beginn jümmers en Totale vun den, de nu an is. He klamüüstert ut'neen, wat allens falsch in de Reed vun Änschie weer un dorvun, wat de Kanzlersche grod vördrogen hett. Siene Parteifrünnen heurt em fief Minuten lang opmerksom to un nickköppt, bevör dat se sik wedder üm ehre Händies kümmert.
De Afgeordneten vun de annern Parteien, de noch mit jemmer Schnackeree teuben mööt, hebbt jemmer Händi-Speel gornich eerst ünnerbroken. Ok se stoht wieder ünner Beobachtung vun de Fernsehkameras. Dat steuert jem ober nich bi dat "Schepen versenken" orrer bien Schach.

Un nu, in düssen Momang, kriegt de Tokieker een Ohnung vun de grootordige Suveränität un de Gelotenheit vun uns Kanzlersche: Änschie het sik vun ehre Reed verpuust, sitt nu op ehr'n Platz un speelt mit ehr Händi! Speelt se "Schepen versenken" orrer Schach?