Dat sneet

Düt Protokoll vun langsam tonehmen Snee-Wahnsinn kannst al lang op Hoochdüütsch in't Web finnen. Op Platt novertellt hett dat Heinz Tiekötter.


8.Dezember

Buten hett dat anfungen to sneen. De eerste Snee düt Johr! Karin un ik hebbt uns 'n Grog mookt un stünnenlang an't Finster seten un tokeken, wenn de groten Sneeflocken sutje vun Heben doolkemen un allens mit'n weket, wittet Loken todecken däen. Seh meist ut as in en Märken.

9.Dezember

As wi hüüt opwookt sünd, hett en riesige, wunnerscheune Deek ut glitzern Snee de hele Landschop todeckt. En wunnerbore Anblick. Gifft dat an elkeen Steed op düsse Welt een scheuneren Platz?! Hierher an den Rand vun uns Sassenwoold to trecken, weer een gode Idee. To'n ersten Mol siet Johrn heff ik wedder en Schüffel in mien Hannen un so as en lütte Jung Snee schüffelt. De Infohrt un de Footweg is nu free.

Hüüt Nomeddag keem de Stadtreinigung mit en Sneeploog un hett allens wedder toschoben. Ik nehm mien Schüffel un allens noch eenmol. Wat'n scheunet Leben!

12.Dezember

Wie schood, de Sünn hett all mienen Snee wegsmolten! Ik bün richtig truurig. Mien Naber seggt, ik sall mi kenen Kopp moken: Wi ward ganz sekerlich witte Wiehnachen kregen. Wiehnachen ohn Snee weer jo gruslig. Mien Fründ Hein seggt, dütt Johr kriegt wi soveel Snee, dat ik em bald nich mehr sehn kunn. Ik gleuv nich, dat sowat bi mi meuglich sien kunn.

14.Dezember

Snee, wunnerbore Snee! Dottig Zentimeter in de letzte Nacht. Buten is dat ünner teihn Grod koolt. Dat glitzert as mit dusend Diamanten. De Küll deit mi nix, mi is warm worrn bi dat Schüffeln. De Sneeploog keem hüüt nomeddag un hett allens wedder toschoben. Ik heff nich wusst, dat ik soveel to schüffeln heff. Man dat bringt mi in Form, doch langsom blifft mi de Puust weg.

15.Dezember

In Radio hebbt se seggt, wi kriegt sosstig Zentimeter Neesnee. Ik heff mien Kombiwogen verschüert un mi Gelännewogen kofft. Een mit Allrad. Un twee grote Schüffeln heff ik anschafft. Uns Keulschapp is bit bobenhen vull. Karin harr geern 'n Holtoben, för den Fall, dat de Strom utfallt. Wat en narrschen Gedanken, wi leevt doch hier nich op Grönland!

16.Dezember

Hüüt morrn harr'n wi Iesstorm. In de Infohrt bün ik dull op mien Mors fullen, as ik Solt streien wull. Dat deit asig weh. Karin, dat Oos, hett dat ut uns Finster sehn un en halve Stünn lang lacht.

17.Dezember

Jümmers noch wiet ünner fief Grod. De Stroten sünd blank vun Ies un nich to befohrn. Fief Stünn harrn wi keen Strom. Wi hebbt uns in Wulldecken inwickelt. Ans weern wi erfroren. Keen Telefon güng, keen Fernseher un keen Radio. Wi harrn man doch en Holtoben keupen sulln. Man togeben wull ik dat nich. Ik kann dat nich lieden, dat se jümmers Recht hett. Un ik hass dat, in mien gode Stuuv to erfreren.

20.Dezember

De Strom is wedder dor. Man letzt Nacht sünd veertig Zentimeter vun düssen verdammten Snee dortokomen. Schüffeln, jümmers wieder schüffeln. De beschetene Sneeploog is tweemol wedder vörbikomen. Ik heff versöcht uns Noberkinners to'n Schüffeln to öbersnacken. De harrn keen Tiet un wulln to'n Ies-Hockey. Ick gleuv, de löögt mi an. Ik weer in Buumarkt un wull mi 'n egenen Sneeploog keupen. De harrn kene mehr. In März kriegt se wedder welk. Ik bün seker, dat se mi anlögen doot.

Mien Fründ Hein meent, dat ik schüffeln mutt, ansonsten mookt dat de Gemeende un ik krigg de Reeknung. Ik gleuv, Hein lücht ok.

22.Dezember

Hein hett Recht hatt mit de witten Wiehnachen. Letzt Nacht kregen wi nochmol dottig Zentimeter vun düt beschetene witte Tüüg un buten is dat so koolt, dat dat wull bit August nich wegtaut. Ik heff een dreeveddel Stünn bruukt, mi för de Schüffelee antotrecken — un denn heff ik pinkeln musst. As ik mi opletzt uttrocken harr, ton Pinkeln west bün un mi wedder antrocken heff, dor weer ik to meud to'n Schüffeln. Mien Naber Hein heff ik beden, mi mit sienen LKW un sienen Sneeploog gegen gode Betolung to helpen. He seggt, he harr toveel to doon. Ik gleuv, he lücht!

23.Dezember

Blots tein Zentimeter düsse Nacht. Buten hett dat null Grod. Karin will, dat ik uns Huus dekorier. De is wull unkloog. Ik heff keen Tiet, ik mutt schüffeln!!! Harr se mi dat nich all letzten Moond seggen kunnt. Se seggt, se harr dat seggt. Ik gleuv, se lücht!

24. Dezember

Hilligen Obend is door. Twintig Zentimeter. De Sneeploog hett denn Snee so fast tosomen schoben, dat ik miene Schüffel afbroken heff. Ik kreeg Hartklabastern. Krieg ik jichtenswann den Sauhund foot, de den Sneeploog fohrt, denn treck ik em an'n Ast hooch. Ik weet genau, dat he mit sien Laster achter de neegste Eck steiht un mit hundertfofftig Soken de Stroot doolkummt, wenn ik mit dat Schüffeln fardig bün. Un denn haut de Hund mi den Snee tünnenwies in miene Infohrt.

Hüüt Nacht wull Karin mit mi Wiehnachtsleeder singen. Man ik harr keen Tiet. Ik mutt op den Kerl mit sien dorige Sneeploog passen.

25.Dezember

Frohe Wiehnachten. Sosstig Zentimeter vun den witten Saukrom. Wi sünd insneet. De Gedanken an Sneeschüffeln bringt mien Blood in Wallung. Ik hass nix mehr as Snee. Hüüt Meddag keem de Sneeploogfohrer un hett üm en Spenn för siene Arbeit froogt. Ik heff em de Schüffel op den Kopp haut. Karin meent, ik harr slechte Manieren. Ik gleuv, se is mall worrn. Wenn ik mi noch eenmol ehr "White Chrismas" anheurn mutt, bring ik se üm.

26.Dezember

Wiederhen sünd wi insneet. Worüm to'n Dübel sünd wi hierheer trocken? Dat weer ehre Idee! Se geiht mi an mien Nervenkostüm.

27.Dezember

De Küll liggt nu bi minus 30 Grod. De Woterrohren sünd infroren.

28.Dezember

Buten is dat warmer wornn un hett sik op fief Grod minus steigert. Jümmers sneet dat. Miene Olsch mookt mi rosend!

29.Dezember

Wedder dottig Zentimeter. Hein meent, dat ik mien Dack freeschüffeln mutt, ans ward dat inbreken. So veel Dummerhaftiget heff ik lang nich heuert. Meent de, dat ik mall bün?

30.Dezember

Uns Dack is inbroken. De Fohrer vun denn Sneeploog hett mi op fofftigdusend Euro verkloogt. Karin is to ehre Modder trocken un dat Radio seggt fiefuntwintig Zentimeter neen Snee vörrut.

31.Dezember

Ik heff denn Rest vun uns Huus anstoken. Nienich wedder schüffeln!

8.Januar

Mi geiht dat good. Ik mag düsse lütten Pillen, de se mi anduernd geevt. Man worüm hebbt se mi blots an dat Bett fastbunnen?


Fotos vun de Sneekatastrooph 1978: Rudi Witzke

28.2.2018


na baven