Dei Wihnachtsboomkugel is ja schöön — œwer is sei nich al tau gräun? Gräune sünd igitt!

vun Behrend Böckmann

Wecke Diern twüschen Kap Arkona un den Fichtelbarch harr wull kein Sonni-Popp mit Schlåpogen, un wecker harr kein Kugeln för'n Wihnachtsbom ut Lauscha?

Dat Sonni-Spältüchkombinat mit bet tau 30.000 Spältüchmåker hett Spältüch för dei ganze DDR, denn Westen un dei Sowjetunion måkt. Nå dei Wenn' hemm' por ganz lütte Ünnernähmen as "Plüti" mit vier Lüd den Sprung in dei Markwirtschaft schafft, ut Sonnihallen wür 'n Logistikzentrum för Spälsåken ut China, süss is Sonni blot noch in't Museum tau beläben. In Lauscha wier't bäten anners. Dei Stadt dörchläwt ok dei DDR-Tieden un dei Kugeln ut Lauscha hemm' sik hollen un würn 2021 inne bundsdüütsche List von't "Immaterielle UNESCO-Kulturerbe" upnåhmen.

Hm, immateriell...? Heff ik mi anners vörstellt

Doch wat hett dei lütte Mann vör Urt von'n Spältüchmuseum un handmåkte Wihnachtsbomkugeln, dei dat Stück so üm teihn Euros kosten? Hei möt sik ok nich vör dei Bost kloppen, dat'n in'n lüttsten ostdüütschen Landkreis läwt un wurmœglich
in 't fränkisch Bavaria 'n niege Arbeit funnen hett un nu nå dörtig Johr Tiedenwenn' mit Inflatschon, Ukrainekrieg, Klimakris' läben möt... So as dei Vöröllerngeneratschon up "brun" rinfollen is, föllt dei itzig Generatschon up "gräun" rin. Doch dei Gräunen sünd as 'n Chamäleon — anne Macht ankåmen, warden's tau gröttere Dreihäls as männig "rode Sock". Dichter Robert Habeck bringt Klima un Wirtschaft inne Predulch, dei gäle Finanzminister möt Geld locker måken, dormit Düütschland 'n "düütschet Rammstein" in't Baltikum för 4000 Soldaten mit ehr Fomilien bugen kann, Ministersch Baerbock flücht inne Welt umher, üm all ehr Ministerkollegen bitaubögen, woans Poletik gägen Russland un Putin tau måken is, un dei rode Kanzler dröömt dorvon, dat Düütschland un nich Polen dei stärkst Kraft in Europa is.

Dat gräune Tüüchs is totål labberig un weekspöölt, œwer nich mal reinlich.
Voll "Mainstream" sünd sei worrn, hemm ehr Prinzipien verråden. Un is dat dor ünnen nich al NATO-Gräun? Militaristisch sünd sei nu nämlich ok noch

Un denn ümmer wedder Minnerheiten, dei in uns åbendlännisch liberale Demokratie bestimmen willen, wat all dei annern tau måken hemm', un man debattiert œwer Sexismus un Metoo, œwer Rassismus un Frömde, lött Dragqueens inne Schaul vörläsen un måkt lütte Kinner all wies, dat's ünner Ümstänn' all anners fäuhlen, as dei Natur dat vörseihn hett, un dat nu bald 'n Gesetz kümmt, nå dat dei Minsch sülben bestimmen kann, ob hei Paul orrer Paula sien will un wennehr hei nich mihr Paul sien will ok wedder Paula sien kann. Dor ward gennert, œwern Rägenbågenfåhn för't Rathus debattiert, dei Mohr ut'n Märken mit'n Bann belecht un ut dat "Zigeunergulasch" ward tau'n "Balkangulasch" up'e Menükort. Sogor hoge Beamten sorgen sik üm dei Rechten von disse Minnerheiten, doch ostdüütsche Staatssekretäre inne Regierungen un Professors anne Universitäten sünd wunnersåme Minschen. Weckern wunnert dat nu noch, wenn dei normale Börger, dei nich frömd un rassistisch un nich queer un annersrüm is, dei nich gennern un wiederhen Soljanka un Moskauer Ies äten will, dei nich von sexueller Belästigung un por dusend Euros as Utgliek för 'n Pimmelspäl inne Jugend drömt, dei Schnut von disse gräun-rod-gäle Blås vull hett!

Winnetou un Indianerspelen warrt as "kulturelle Aneignung" rünnermåkt — dorbi hett ein Düütscher dat œwerhaupt eerst erfunnen: Karl May! Winnetou schall sik mål bi uns bedanken! So! Un Winnetou sien Wihnachtsbomkugeln stammen natüürlich ut Lauscha! Un dat is "kulturelle Aneignung"! (Foto Jürgen Brake)

Man hett gor nich soväl Popier, üm all dissen Blödsinn uptauschrieben, œwer dit sall noch secht warden, dat dei Wählers, dei Robert Sesselmann as AfD-Kannedat taun Sonnebarger Landrat wählt hemm', deils ok mit 'n gesunnen Minschenverstand tau Wåhl gåhn sünd un nich glieks inne rechte Eck tau stellen sünd. Bäten plüschig hengägen dei Infall, dat sik alle annern Parteien von links bet rechts in Sonnebarch 'n "Bündnis gägen Rechts" schmäden wullen, üm Sesselmann den Landratsessel striedig tau måken — as gäv dat sünst kein Poletik un Meinungsstried miehr, allens egål, Hauptsåk kein AfD. Dorbi hemm s' vergäten, dat sik männigein noch an den Block von "Natschonale Front" bi DDR-Wåhlen besinnen kann. Un dat sall nu demokratisch sien?! Von dei Art Demokratie hemm dei Wählers dei Näs von vull, un so'n Block dwingt dei Minschen doch reinweg in dei Arms von dei AfD!

Un all, dei Sesselmann kritisiern, dat hei secht hett, dat Düütschland 'n "Marionettenstaat von Amerika" is, dei weit villicht ok, dat Macron ok dorvon schnackt hett, dat Europa kein "Vasall von Amerika" sien süll. Macron, dei lütte liberale Druuvappel. Is hei nu ok ein "Rechte"?

Dat brune Tüüchs is kein beten reinlicher, œwer nich weekspöölt! Dorför is dat dumm Tüüch.