Spraken

vun Karl-H. Nissen


"Hest du dat leest?" Korl harr richtig rode Placken in't Gesicht, so weer he in Rage, "Mit uns Plattdüütsch geiht dat to End. Dat hett nu en Fru Professor rutfunnen, so hett dat in't Blatt stahn."

"Korl, maak di keen Sorgen. Kiek mal, wi köönt uns all mal irren, ok en Fru Professor. —
Ik kenn twors Lüüd, de wahnt meist ehr ganz Leven hier baven bi uns in'n Norden, se hebbt hier ehr Kinner groot trocken, se hebbt hier ehr Geld verdeent, un de seggt, dat se keen Woort Plattdüütsch verstaht. Dat is trurig, meist nich to glöven, aver wohr.
Man, up de anner Siet: Föhr mal mit den Bus, loop mal över'n Wochenmarkt, överall höörst du Lüüd, de Plattdüütsch mit'nanner snackt. Kinner lehrt uns' Spraak nu ok wedder in de School, dat gifft plattdüütsch Vereine. Du kannst mit den Förster dörch dat Holt lopen, du kannst en Stadtführung maken, allens up Plattdüütsch. Un de Vörstellen vun uns plattdüütsch Theater sünd meist jümmers utverköfft, all Plätze besett.
Un denn, Korl, gifft dat en Gesett, ene "Charta", de schrifft vör, wat uns Regierung allens doon mütt för uns plattdüütsch Spraak. Du müsst di gor keen Sorgen maken. Uns Böversten, de kümmert sik dor üm. Kannst di to verlaten: Plattdüütsch geiht nich ünner."
So begöösch ik mienen ollen Fründ. Un denn vertell ik em vun de — ganz annern — Sorgen, de ik mi maak:
"Wi sünd doch nu "Europa". Du büst en Lübecker un du büst ok en Europäer. Wi hebbt in Brüssel en groot Verwaltung mit ganz vele Büros un ganz vele düchtige Beamte. Wat de all to doon hebbt, du glöövst dat nich. Se kümmert sik, as Exempel, dorüm, wo dick en Appel sien mütt un wo krumm en Banaan.
Man — dat grote Problem is, de snackt all ehre Spraken vun to Huus. Süh, un dat geiht doch nich, de verstaht sik ja gegensiedig gor nich.
Wi bruukt en Europa-Spraak. Mi hett een vertellt, dor warrt al düchtig an knobelt. Dat warrt wohrschienlich Finnisch orrer Bulgarisch. Un denn, Korl, denn verswindt uns hoochdüütsche Spraak.
Un dat is uns grote Chance: Denn snackt wi hier wedder alltohoop Plattdüütsch!"



na baven