Allens Stars

vun Heinz Tiekötter

Worüm haut de Lüüd enerwegens so op'n Putz? Gifft dat keen normole Minschen mehr? Wohen du heurst, allerwegens snackt se vun Stars. In uns Dörp leevt wi jo sotoseggen merrn in de Prärie. Gifft dat in uns Gegend jichtenswo 'n Heimotfest, denn müsst du mol de Gazetten lesen. Wat dat nu Sängers orrer Snackers sünd, de di wat vörsingt or di 'n Sketch vörspeelt; jümmers sünd dat Stars. Dor ward all een as'n Schauspeelstar hoochjubelt, wenn he eenmol as Besopenen in de Lindenstroot dörch dat Bild lopen is. To de Talkschau ward Gäst as Footballstars vörstellt, de harrn sik vör twee Johrn de Kneeschief demoliert un sietdem hebbt se nich mehr speelt.

Venus un Maand

Kottens harrn se in'ne Schüün in Holsteen to'n Musikfestival den bekannten Folklorestar ut Brasilien anseggt. Ik weet hüüt noch nich, woneem he würklich herkeem. Een Fründ vun mi, de in Brasilien leevt un op Beseuk bi uns weer, harr jedenfalls noch ninich vun em heurt. Un in dat Internet kunn ik ok nix öber em finnen. Nu is Brasilien jo 'n grotet Land.

De "Star" is dat minner Helle!

Du kannst moken, wat du wullt, se snackt vun Filmstars, Finanzstars, Politstars, Sportstars und un wat weet ik noch wat för Stars. Ik heff annerlest vun so'n Star leest, de freuher mol 'n Rekord opstellt harr. He hett mit'n Paddelboot vun Lünborg no Bardowik ne halbe Stünn weniger bruukt, as mien Vadder vör dottig Johrn. Blots mien Ool is dreben, denn he hett angelt.
Jo, dat gifft sogor Familjen, de produziert de Stars an Fließband. Un vele blieft för de Medien wiederhen Stars, ok wenn jemmer Höhepunkte lang trüch liggen. Männichmol seggt miene Fro öber so'n Star, wenn se sien Bild in de Programm-Zeitung sütt: "Och wo scheun, dat se den ok mol bringt; ik heff gornich wusst, dat de noch leevt."

Man Stars gifft dat nich blots bi de Minschen. Nee, dat gifft ok Stars ünner de Deerten. Denk doch mol an Lassie. In de twintig Johrn, wo se düsse Serie dreiht hebbt, harrn de Filmproduzenten soss ünnerscheedliche Collies. Welk vun düsse soss weer denn nu de Star? Un Tarzan hett ok fief Cheetas öberleevt. Man de arme Keerl müss jümmers mit de sülbige Jane utkomen.

Lassie, Lassie, Lassie, Lassie, Lassie un Lassie

Nee, nich so en Boxer...

Letzten Freedag geev dat kott vör Middernacht en Box-Weltmeisterkampf in Swoorgewicht. In'n Vörbericht hebbt se seggt, dat güng op Leben un Doot. Vun den Box-Verband harr ik noch ninich heurt. Een vun de Boxstars heff ik freuher all mol sehn. He is nu beten wat fetter worrn. Sien Gegner weer mi nich bekannt. He weer noch fetter un harr all 31 Kämpfe achter sik; dorvun harr he veer wunnen, fiefuntwintig hett he nich wunnen un tweemol geev dat ünentschieden. In de Zeitung schrieben se wat vun een gefährlichen Ringfuchs. De gefährliche Ringfuchs leeg in de dritte Runn platt op'n Bodden, schuul so'n beten no sienen Trainer hooch un de tock blots mit de Schullern. Un uns Boxstar keem nich wedder hooch; he bleef eenfach liggen. He weer eben doch 'n Fuchs. Liekers ward he neegstmol wedder as Star op de Plakoten ankünnigt.

...so een!

Un wenn du mi all froogst, worüm dat so veel Stars gifft, denn segg ik di: Is doch kloor, bi'n Star köönt se 'n heugeret Intrittsgeld verlangen.

Sünd even allens Vöss!