Sünndreier

vun Anke Nissen

"Also", vertell ik, "gistern heff ik en Buwark sehen, dat wörr di bestimmt interesseern. Dat is rund, hett en schrääg Dack un dat hele böverst Stockwark kann sik dreihen. Dat wendt sik nämlich jümmers na de Sünn, orrer na de ultravioletten Strahlen — ganz genau weet ik dat nich."

Up den Rundbu is dat grote Dack mit Solarkollektoren monteert

Mien leef Mann keek mi an, as wörr he denken, nu warrt disse Fru tüdelig; dat heff ik düütlich markt. Seggt hett he nix. Dorüm heff ik em poor Daag later inlaadt to en lütt Tour.

Wi sünd also bi strahlen Sommerweder up de Insel föhrt un ik heff denn jümmers mal seggt:
"Föhr hier man mal links, laat uns hier man rechts föhren——" un denn, in dat Dörp Schlagsdörp, reep he:
"Wat is denn dat?"
"Dat is de Sünndreier, vun den ik di vertellt heff."

Dat ganze Buwark schient bloots för dat Dack da to ween — dat Binnere schient meist lerrig

Da staunt de Herr Nissen!

He stopp uns Auto un steeg staunen ut. He leep rund üm dat Gebüüd. Beten afsiet stünn en Bank, dor seet ik un tööv. Un dor — miteens — hett sik de böverst Deel vun dat Huus würklich un wohrhaftig dreiht. Langsam un sinnig beweeg sik dat hele böverst Geschoss tohoop mit dat schrääg Dack, dat ganz un gor mit Kollektoren bedeckt is.

Ik sehg mienen leven Mann dat an, dit weer för em sowat as en technisch Phänomen. "Dat Dack is düchtig schrääg", sinneer he, "naja, so gifft dat veel mehr Quadratmeter för de Kollektoren un jümmer en goden Winkel för de Sünnstrahlen." Kollektoren sünd för 't Gewinnen vun Strom, dat weet sogoor ik. De maakt sowat as Ümwanneln vun Licht in Strom. Un wenn sik dat Dack nu jümmers na dat Licht hendreiht, denn kann vele, vele Stunnen an'n Dag Strom erzeugt warrn. Bloots daför schient dat Buwark bestimmt to ween. Dat is sotoseggen en Kraftwerk. Wat de Energiewenn nich allens vörtüüg bringt!

Tja, so 'n modeern Buwark kannst finnen, wenn du mal beten över Fehmarn bummelst.