Twinnig Johr ümsüss

vun Behrend Böckmann

Wat dei Russen in teihn Johr von 1979-1989 nich schafft hemm', dat süll nu dei NATO schaffen, denn in Afghanistan an'n Hindukusch würn dei utmåkt, dei 2011 so as einst 1944/45 Kamikazefleiger inne Twäschentorms von't World Trade Center in Manhattan/New York raasten un so up'n Schlach 2753 Minschenläben 'n Enn sett't hemm'. Dei rechte amerikaan'sche Weltschandarm harr un hett mit sien Ünnernähmen CIA ümmer dei Hänn in't Späl, üm mit all scharp aftauräken, dei sik mit ehr linke Poletik den Osten mit dat Moskauer Zentrum tau'n Ogenspeigel nåhmen harrn. Nähmen wi as Bispill blot Guinea, Chile un Mosambik:

• As Sékou Touré 1958 Präsident von den niegen Staat Guinea wür — bet dorhen franzöös'sch Kolonie in Westafrika —, hett hei Charles de Gaulle as den einstigen Lannesherrn secht: "Nous préférons la liberté dans la pauvreté à la richesse dans l'esclavage!" ("Wi trecken dei Povertäh un Frieheit den Riekdaum inne Slawerie vör!") Un dat künn dat Volk von Guinea ok mit väle Up un Dål bet tau Tourés Dod in't Johr 1984 beläben. Von dunn an wier dat mit den "afrikaan'schen Sozialismus" vörbi un dei åbenlännisch Wirtschaft un Kultur höll Intoch.
• Salvador Allende wür 1970 Präsident in Chile. Un wieldat hei bäten tau wiet nå links schuult harr, hemm' em nå drei Johr rechte Kräfte in't eigen Land mit Hülp von buten 'n Militärputsch inbröcht un hei hett sik denn sülben dei Kugel gäben un denn güng dei Terror gägen alle Linken los. Olle Mächte keemen wedder an't Ruder.
• Samora Moisés Machel wier as 'n plietscher Afrikaner mit Blick nå'n Ostblock dei ierste Präsident vonne Volksrepublik Mosambik. Dei Sozialismus inne DDR geföll em besonders gaut un hei hett sik an dei Honeckers 'n Ogenspeigel nåhmen un ok sien Fru Graça taun Billungsminister måkt. Sien Dod 1986 in'n Fleiger œwer Südafrika is bet hüt noch 'n Geheimnis. Dat Enn' von'n Börgerkrieg in't Johr 1992 un dat Verlåten vonne sozialistischen Infäll mit Blick in dei "frie Welt" hett hei nich mihr beläwt.

Un so dat grote Älend Afghanistan. 1978 kümmt dei Kommunistisch Volkspartei in Afghanistan dörch'n Staatsstriek anne Macht. Dat geföllt dei miersten allahhürigen Afghanen nich un dei niege kommunistische Regierung hålt sik 1979 Bistand ut Moskau. Dei Allahschäuler, dei Taliban, bömen sik gägen dei niegen Herrn in Kabul up. Un süh dor, dat fünn Amerika so gaut, dat's von nu an dei Taliban all dat taukåmen leeten, wat 'n in Kampf gägen den Russen un den Kommunismus nödig harr: Waffen un Utrüstung. Nå teihn Johr geiht dat den Russen so as den Amerikaaner in'n Vietnamkrieg: upgäben un grote Verluste hennähmen.

Ünner Gorbatschow würn dei Truppen ut Afghanistan aftreckt un sien Poletik von Perestroika un Glasnost måkte so den Wech frie, dat 1988 dat Afkåmen von Genf œwer atomare Afrüstung uthannelt un ünnerschräben wür. Nich bedacht harr man, dat nu in Afghanistan dei islamistischen Taliban, dei in Allah sienen Nåmen gägen den Russen kämpft hemm' un dorbi von den Amerikaaner uthollen würn, 1994 'n fundamentalen Gottesstaat grünnen un dei ganze Welt islamisieren willen. Un dat sall nich blot den Gottesstaat gäben, sonnern Gotteskrieger sallen von'n Hindukusch bet anne afrikan'sche Nigermünnung helpen, dissen Gottesstaat uptaubugen. Un disse Gotteskrieger wullen nu nich den Russen, sonnern den Amerikaaner wiesen, wotau sei in'n Nåmen von Allah mächtig sünd.

An'n 11. September 2001 wier't denn so wiet: So as twüschen den 13. un 15. Hornung 1945 Dresden von anglo-amerikaan'sche Bomber in Schutt un Asch lecht wür un binåh 25.000 Minschen den Dod funnen hemm', beläwt New York an dissen Dach dat Unheil as allbeschräben. Nu güng dat den Amerikaaner so as Goethe sienen Täuwermeister: "Herr, dei ik reep, dei Geister, ward ik nu nich los!" Also, up nå Afghanistan un den Täuwermeister utfinnig måken, dat Land wedder uprichten, 'n Regierung finnen, för dei Demokratie un Wohrung von Minschenrechte datsülwig as uns bedüden deit. Un dat finnt sik bald 'n Regierung, dei Amerika un anner NATO-Länner wilkåmen heiten deit, denn sei keemen ja mit Geld un Waffen, sei wullen ja tausåmen dei Gotteskrieger schassen un sik nich so sihr üm den Anbu von Mohn un dei Wirtschaft kümmern. Dei Afghanen süllen sik as Verihrer von Allah so an't Bäden, Fasten un Pilgern hollen, as sik dei Kathool'schen anne Bicht un dei Evangeel'schen an't Åbendmåhl hollen. Bi all dei Schnüffelie hett dei Westen sik keinen Kopp måkt, in den Välvölkerstaat mit bannig väl Språken dei Geschichte un Kultur, denn Globen un dat Stammesdenken för dat Verhollen von Minschen tau ünnersäuken. Dorbi leiwert dei Geschicht -zig Bispills.

Nähmen wi dei Weltbillungsministerkonferenz von 1965 in Teheran, as beschlåten wür, dat all Minschen in Taukunft Läsen, Schrieben un Räken kœnen süllen, doch nå mihr as föftig Johr hemm' ümmer noch 370 Milljonen Minschen kein Schaul von binnen seihn. In Länner, in wecker Allah dat seggen hett, sünd besonners Mäten vonne Billung utschlåten. So kœnen in Afghanistan nich mål 13 Purzent vonne Frugens läsen un schrieben. Un väl von dat, wat dei Unesco mit dat Johr vonne Fru (1975) orrer dat Johr von't Kind (1979) schaffen wull, is dörch dat Verhollen von Minschen nich taustann kåmen.

Naja, dat gifft ok rode Düwels... aver nienich un op keen Fall witte!

As dei kathool'sche Globen nå'n Kongo bröcht wür, hemm' ok väle Minschen iersts dei Hülp vonne Missionare annåhmen un sik denn mit den niegen Globen anfrünnt. Liekers künnen se in'n Kongo nich verståhn, dat Gott 'n witt Gesicht un dei Düwel 'n schwatt Gesicht hett. Un sei hemm' sik ehrn Gott mit 'n schwatt Gesicht målt un den Düwel — de Kolonialherrn gliek — 'n witt Gesicht gäben.

Œwer man deit sik ümmer schwor, mit Geschichte ümtaugåhn, un Insichten kåmen oft tau låt. Nich nauch, dat dei Gottesstaat dörch dat Ingriepen vonne westlichen Verbünnelten nich upbläuhn künn, nee — in Afghanistan süllen ok Demokratie un Minschenrechte so bläuhen, as man sik dat in Westen vörstellen däd. Un dorbi wür hulpen un hulpen, militärisch, üm Soldaten un Gendarmen uttaubillen un de ok mit dat nödige Material versorgen, un zivil as Entwicklungshülp för Billung, Gesundheit, Verwaltung un Wirtschaft. Düütschland hett so 12,5 Milljarden Euros för't Militär un jedet Johr so bet 500 Milljonen Euros för humanitäre Hülp. Dei amerikaan'schen Utgaben belopen sik up 3,2 Billjonen Dollar. Un in den Globen, dat nu allens inne richtige Richtung lopen deit un dei Gefohr von'n IS un dat "Kalifat" afwennt is, beschluten Amerika un sien NATO-Frünn, den Hindukusch tau verlåten.

Un ihrer as sei dat Land verlåten hemm', setten sik all dei Taliban in Marsch un måken in por Dåch all dat taunicht, wat nich blot väl Geld, sonnern ok 53 düütsche un nich ganz 2500 amerikaan'sche Soldaten dat Läben kost't hett. 20 Johr ümsüss — un so as sik 1945 Düütsche in Gotenhaben (Gdingen, pol. Gdynia) up Schäp drängelten, so drängeln sik hüt in Kabul up'n Fleigerhåben väle Minschen, dei sik as Helper för dei Düütschen un ut Bang vör dei Taliban in Säkerheit bringen willen.

Utsichten? Düüster

Lihren ut disse Geschicht trecken, dat is ansecht — orrer willen wi wiederhen so daun, as mössten wi "Demokraten" unkunnig Minschen inne warmen Länner bibögen, woans denn dei Winterdeinst Schneitüün inne Tropen upsetten möt?