Mutanten-Stadl

vun Jens-Peter Bey

Karl Moik is doot, Andy Borg vertehrt sien Gnadenbrot un de Kastelruther Lünken kommt in de Johrn. Is immer vergnöglich west mit düsse Muskanten in de Flimmerkist. Man hüüttodags speelt Mutanten de Hauptrull. Se spökelt Abend för Abend dörch de Horrorshows vun Will, Illner un Plasberg. De hiddelige Lanz un sien Pandemikers koloreert den Weltünnergang in de düüstersten Farven.

De Show is in vullen Gang. De Gäst sitt dor brav in de Runn un töövt op dat Krützverhör. Vun wieter weg luert Polit-Promis op ehrn Insatz. So as Söder, de Alpenkönig, de düchtig utdeelt, wenn he an de Reeg ist. Kannst em meist an Churchill meten: "Bloot, Sweet un Tranen" seggt he uns vörut, wenn wi nich furts klook ward. He profileert sik as de isern Markus. De Mann för harte Tieden will op Düwel komm mal rut impen un "ver"impen laten, wenn he noog Middel to'n Sprütten kriggt. Dor verfehrt sik de Mutanten düchtig, kriegt noch mehr Tacken op ehrn Kugelbuuk un weet nich mehr, wie se mit Familiennamen heeten dot: alpha, beta oder sogor delta.

Trüch to de Show: Lauterbach nöölt op kölsch un geiht glatt as Miesepeter dörch. Ik wunner mi, dat Wonneproppen Altmeier partu nich begriepen will, dat Afriegeln un Insparren wenig för Minschen döcht un mehr wat för Höhner is. Ramelow, de verbiesterte Linken-Baas ut Thüringen, is bi Lanz to Krütz kropen un hett togeben, dat de Kanzlersche klöker weer as he. Alleen dorför lohnt dat Abendspektakel. Un för dat Gekappel mit Lüüd, de wat warrn wüllt. Baerbock, Laschet un Scholz hebbt dat wohrhafti nich licht bi den opdreihten Groot-Inquisitor Lanz. Anners as de Stars ut de eerste Riege vun de Wetenschoop, de nun öber en Johr rümrangeln dot, keen de Klöökste is in't ganze Land. In mien Kakel-Ranking liggt Drosten vörn un denn kümmt glieks Fru Brinkmann. Streeck fallt af un Kekülé kannst vergeten.

Talkshows künnt ok muteern. Miteens wannelt se sik to'n lütt Volkshochschool. Mathematik un Latiensch lehrt man op enen Slag. Exponentiell seggt di nix? Un linear ok nich? Wenn wat sutje anstiggt, is dat linear un half so leeg! Wenn de Tallen aber hochscheten un meist exploderen doot, is dat exponentiell un löppt op dat groot Malöör rut. Is nich schön, wenn du vulnerabel büst. Dat meent nix anners as klöterig.

Keen sik vun düsse Kupparbeit verhalen mutt, kann sünnerlich op Körperspraak un Benimm in den Stadel oppassen. Wenn Wippsteert Lanz opgeregt mit sien Wiesfinger den Schievenwischer namaakt, lohnt sik dat för de Gäst nich, gegenan to dibbern. Dat duernde Ringrätschen in anner Lüüd ehr Reed schull he sik fix afgewöhnen. — Wohr di weg, wenn Anne Will mit den Foot wippelt. Denn stüert se tomeist op dat Gender-Steern-Luftlock to, dat fällig is, wenn't toglieks üm Fruuns- un Mannslüüd geiht.

De Stadl maakt mi Dag för Dag klöker. Ik verwessel nix mehr un kann allens richtig utenanner holn: Biontech un Bioland, Astra un Seneca, Modörna un Kaloderma,
RKI un DRK. Hett 'n beten duert, spitz to kriegen, dat positiv leeg un negativ goot is
in de Pandemie. Denn bruk ik nich grantig to warrn, wenn de Naver mi toröppt: "Bliev negativ!"

Bilütten heff ik de Nees vull. Lanz un Konsorten mitsamt ehr Mutanten künnt mi geern hem. Ik dröm vun de goden olen Stadl-Tiden. Krützfohrtschipp un Ballermannfleegers kann ik missen, aber nich de Blasmusik, Kaptein Sülveriesen un uns Hit-Helene.