vun Behrend Böckmann

Ein utwussen Minsch besöcht in'n Dörchschnitt fiefmål an'n Dach Tante Meier, den Afritt, dat WC, OO, den Abort orrer Lokus, dat Klo orrer Plumpsklo, up Hamburgisch dat Paddemang, dat Hart- un Schiethus orrer den Urt, wo dei Kaiser tau Faut hengeiht.

Wohr is œwer ok, dat ümmer noch twei von drei Minschen up unsen Planeten ehr Örtchen in Mudder Natur hemm'. Sei kennen keinen Deip- un keinen Flachspäuler, kein Pinkelbecken, kein Bidäh, kein Dusch-WC, nich mål 'n Hockklo, mit dat väle von uns in Moskau un in männig südlich Gägend Bekanntschaft måkten. Dei Minschen hemm' ok kein Dröch- orrer Chemieklosett, wat bi uns tau jede Bustell gehürt orrer œwerall anne Schnellstråten tau finnen is. Un dor, wo dat kein Späulung un kein Kanalisatschon gifft, dor sorgen dei „Utdoor-Pinkler“ nich blot för Arger, as dat bi uns dei Fall is, sonnern disse Outdoor-Geschäften von ümmer mihr Minschen lannen in't Grundwåder un sorgen so för ümmer mihr Keime, Bakterien un Viren, dei nu wedder nich gaut för dei Gesundheit sünd. Mal ganz tau swiegen vun dei Flüchtlingslagers in'n Sudan, 'neem butenrüm üm dat Lager Verbrekerbanden up dei Minschen luern, dei ehr Geschäft verrichten mœten un dat nich mang dei Telten daun willn. Kåmen Fruens, warden sei vun dei Kierls vergewaltigt un versleept. Fruens mœten ehr Schåmgeföhl överwinnen un ehr Geschäft vör all Lüüd måken, wenn sei överleven willn. Ok dat kann ein Aspekt vun den Toilettengang sien!

Wat dat akute Gefohr dörch Gewalt is orrer langsåme Gefohr dörch Keime: Dei säkere un gesunde Toilettengang is levenswichtig. Mit Blick up'e Gesundheit wür 2001 dei „Welttoilettenorganisatschon“ grünnt un an 'n 24. Juli 2004 beschluten den dei Vereinten Natschonen, dat dat ümmer an 'n 19. November 'n Toilettenweltdach gäben sall un dei Minschen dörch Akschonen rund üm Tante Meier 'n Sinn för Hygenie un Gesundheit kriegen un in Latrinen dat wedder afgäben, wat's mit un dörch dat Äten tau sik nåhmen hemm'. — Dei Minschheitsupdråg, dat dat nauch Äten för all Minschen gifft, geiht dormit Hand in Hand.