Süükdom ist Gold weert

vun Heinz Tiekötter

Fiete is privoot krankenversekert. Eenmol in'n Johr geiht Fiete to sien Teendokter un lett sik de Teen akkraat reinigen. Egol welk vun de twee Hölperschen dat mookt; beide sünd hübsch un verstoht sik op ehr Fack un se doot Fiete nich weh. Jedetmol, wenn se no de Behandlung dat Kleckerlätzchen afnehmt, will Fiete opstohn un jedetmol drückt em de junge Fro wedder in den Stohl: "Uns Herr Doktor mutt dat noch ankieken!"

De Doktor kümmt, drückt Fiete de Hann un kiekt em kott in't Muul un nickköppt tofreden. Un op de Reken steiht bobento: "Eingehende Untersuchung mit Befundaufnahme für €12,94 und Beratung, kann auch fernmündlich sein, für € 9,79." Fiete argert sik elkeenmol doröber.

Fiete siene Fro is nich privoot versekert; se droff no de Teenreinigung so no Huus gohn un de Spooß kost bi ehr ok bloots 40 Euro.
Bi Fietes Huus-Doktersche löppt dat jüst so. Se hett Fiete teihn Vitamin-Sprütten verschreben; elkeen Moond ene Sprütt. Dat sall Fiete gegen sienen Stress bistohn. Dormit hett se em för dat neegste Johr an de Lien. As Fiete sik de tweete Sprütt afhoolt, seggt de Hölpersche: "Vörweg will Fro Dokter se noch sehn."
"Woso dat denn, ik sall doch bloots en Sprütt kriegen."
"Fro Dokter will dat so, een Sprütt is jo 'n immerhen 'n körperlichen Ingreep!"
Fiete weet all Bescheed: Düsse körperliche Ingreep ward denn as twee Regen bobento op de Reken stohn.

Un richtig, an'n Enn vun dat Quartol find Fiete wedder de beröhmten twee Regen: "Beratung, auch fernmündlich, € 10,72".
Un denn steiht dor noch: "Symptombezogene Untersuchung € 10,72."

Dat reine Sprütten hett man bloots € 5,36 kost. Is doch priesweert, nich? Dat Serum harr he mitbröcht. Dat müss Fiete in de Aphtek süllmst keupen.

As Diagnose steiht "Prostatahypertrophie" op de Doktersche ehr Reken. Fiete is all 78 Johr un in dat Oller hebbt Mannslüüd oftens mol so'n Malesche. Hest du all mol heurt, worüm Vitaminsprütten di helpen köönt, dat du in'n Winter wedder 'n Hatt in'n Snee pinkeln kannst?

Ja, malen kann jedeen! Pinkeln! Du schast dat pinkeln!!