De Teuro

vun Silke Frakstein

Kümmst an dat Thema nich vörbi. 50% Inflation hebbt wi. Dor köönt de Politikers sabbeln so veel as se wüllt — dat is so.
Woso köönt de dat eegentlich nich begriepen? Orrer — wüllt se dat gor nich?

Klor, wenn in de Knieptasch € 10.000,00 rin kümmt un noch so annere bummelige "Euros" ut so'n dicken Bohntje in'n Vörstand orrer Utschuß, dennso markst du dat nich so, de Inflation. Obers bi Hartz I - IV orrer bi de Renties, de kriggt se bi de Büx.
2% weniger in de Knieptasch in dree Johren!! Fang dat mol op. Un wo fang ik an mit dat Sporen? Strom — ward dürer, Gas — ward dürer, Fohrgeld — ward dürer.

Köhlschapp, jo dor goht se mit de Priesen rünner. Na und? Bruuk ik villicht jedeen Moond 'n neet Köhlschapp? Nee. Niege Sohlen för de Scheuh bruuk ik, un dat sünd locker € 25 = bummelige 50 Mark. Hartklabastern heff ik 'n Loden, so reeg ik mi op. "Ich kann nichts dafür" seggt de Schooster. "Ik mutt ok de hogen Priesen betohlen."
10 Mark för 'n Stück Kees. "Ich kann nichts dafür", seggt de Hollandsmann. 100 Mark för 'n ganz eenfache Bluus. "Ich kann nichts dafür", seggt de Verkeupersch in'n Loden. So geiht dat wieder. In't Lokol ward di övel bi de Reken, de de Kellner präsentiert.

Un wat steiht in't Blatt? — De Wirtschaft boomt. Mag jo angohn. Villicht bi 30% vun de Lüüd. De Rest dreiht den Teuro dreemol üm. Köfft bi Feinkost Albrecht un all de annern Billiglodens. Se weern seker ok geern dorbi: In der Schlemmermeile für höchste Ansprüche im neu renovierten Kaufhaus...

Obers dat, wat in de Knieptasch rinnkümmt, bestens vun Vadder Stoot kuntrullert, dat dor ok würklich allens den rechten Weg geiht, dat ward weniger, jümmers weniger.
Se köönt gor nich anners, se mööt to Feinkost Albrecht, wiel dat allens dürer ward.
Un wat seggt Dürer dorto?

"Ein Glück, daß ich das nicht mehr erleben muß!"