Mann in't Ohr

vun Heinz Tiekötter


Mi is opfullen, dat Donald Trump bi't Schnacken nienich en Manuskript hett. Dat is beindruckend, wenn een de hele Welt ünnerhollen kann un mutt nich vun'n Blatt aflesen. De blots vun't Blatt afleest, hebbt jo keen Ogenkontakt to ehre Toheurers un se bruukt ehr Hannen to'n Ümblädern. Dorüm wirkt se langwieliger as de, de free schnackt un so as Trump mit beide Hannen Biller in de Luft moolt.


Wenn he nich snacken mutt,
sünd beid Ohren to sehn...

Wat keen weten deiht: In dat "Witte Huus" in Washington gifft dat op'n Böön 'n Tonstudio. Un dor sitt jümmers de Referent vun dat Fack, öber dat Trump grod vertellt. Un so'n amerikoonsche Präsident hett jo för elkeen Fack 'n Referenten. Dat is ok de Grund, dat he so oftens wat anneret seggt as in de Week vörher. Denn ist de Referent vun de leste Week nämlich krank worrn orrer Donald hett em rutsmeten. Ik weet dat ut eerste Hand. De mi dat vertellt hett, lepert de Batterien för Trump sien Heurgeräte. Un jümmers denn, wenn Donald en Reed hollt, hett he ok so'n Knopp in't Ohr.


...avers wenn he snackt, is een Ohr jümmmers versteken!

 

 

 

 

Gegen Betohlung köönt ok Lobbyisten den Platz an't Mikrofon meden.

Ik geev mol en Bispeel: As in'n März in Florida en Verrückten 17 Schoolkinner afmurkst hett, demonstreerten de Scheuler öberall in Ameriko op de Stroten. An düssen Dag hett Trump jem in de Hand versproken, dat he den Hannel mit de Moordwarktügen inschränken ward. Annerlest hett he wedder doröber schnackt. Un düttmol harr he so'n Knopp in Ohr un hett dat seggt, wat de Stimm vun de NRA (National Rifle Association, de Scheetprügelvereen) em dorin totüstert hett. He hett seggt, wenn jede Amerikoner wiederhen sik sienen Ballermann an jede Stroteneck keupen kunn, denn bruken de Amis keen Sorgen wegen Terroristen to hebben. Wat de Soffleur vun de NRA achter dat Mikro nich seggt hett, dat is, dat in Ameriko mehr as 30.000 Minschen in elkeen Johr dörch düsse Wapen starvt.


Ok in den Trump-Tower gifft dat baven en Tonstudio! De hebbt den Överblick.

So löppt dat elkeenmol af: De Minschen demonstreert för 'ne Ansicht. Trump wart dat todrogen un he hollt en Ansprook. Wat he seggt, kummt bi de Minschen good an. En Barg wichtige Verbandsstrategen gefallt dat ober nich. Nu kümmt de Böberste vun den Interessenverband un will vun Donald weten, wann he nochmol öber düt Thema schnacken ward. De Mann vun den Verband harr denn geern den Slötel vun dat Studio.

Donald sall sik rechtiedig den Knopp in sien Ohr stöpseln un man keen Sorgen moken; de Vörsegger an't Mikro ward langsom un düütlich schnacken.


Donalds Frisur is so wolkig, wieldat mennigmaal en ganze Kopphörer ünner passen mutt!

Twee Wöör kann Donald all utwennig: "America first"!


Bild 1: geralt/pixabay
Foto 2 vun Trump: Marc Nozell/Wikimedia Commons
Foto Trump-Tower: Martin Dürrschnabel/Wikimedia Commons

29.5.2018


na baven