 |
|
Nu man fix! Weg mit CETA un TTIP! Demobericht vun Marlou Lessing Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
För all, de gistern an'n 17.9. nich hebbt dorbi ween kunnt, hier en lütt Bericht vun de grote Demo gegen TTIP un CETA in Hamborg. Fiefunsösstigdusend schallt dat west hebben — dat sehg aver na mehr ut, de Raadhusmarkt weer rappelvull. De Demo füng offiziell Klock 12 an, dor weer de Sünn al rutkamen — ik heff mi en lütten Sünnenbrand haalt —, man de hele Tied kemen Lü dorto, un ok as ik na Klock twee vun den wannern Toog weggahn bün, kemen mi noch Lü ut de Bahnstaschoonen tomööt mit Plakate ünnerwegens na de Demo. Dor sünd sachs welk Sünnertöög to laat west orr so.
De Reden will ik nich wedderhaaln; bi solk Veranstalten is ja tomehrst al Konsens. De Reden weern good, Fruuns vun de Kark, ut de Landweerschap un vun de Organisaschoonsgrupp hebbt spraken; un de Musik weer 1 a. Tovörderst avers gah ik na so'n Demo, üm Lü to drapen, ehrn Optoog un ehr Plakate to sehn, mit ehr to snacken un ehr Sichtwiesen wiestokriegen. Hier de schöönsten Plakate vun de Demo gegen TTIP un CETA (sünner Gewähr — mach ween, dat mi noch schönere dörchflutscht sünd). Sünnerlich gefallt mi ja jümmers de sülven maakten, handmaalten — mal mehr, mal minner originell.
Besünners toseggt hett mi bi de Optaktveranstalten Klock 12 op'n Raadhusmarkt de liedenschapliche Reed vun de Melkbuursche, de in to Harten gahn Wies un Wöör klorstellt hett, wat för'n Gefohr de Afkamen för de Landweerschap in lütte Familienbedreven is — se warrt över de Kling springen, bloots de Agrarindustrie warrt TTIP överleven. Wieldat dat de Nohren en Punkt is, de all direkt bedrepen deit, leeg dor groot Gewicht op, so hebbt ok Buurn mit ehr Treckers den Demo-Toog anföhrt, as he sik so bi Klock een Richt Alster in Bewegen sett hett. — Good gefulln hett mi noch de Redner vun Greenpeace, de in sien Iever verspraken hett, "Zitip un Teta" to Fall to bringen (sünd dat noch twee Afkamen? Ik dach, wi harrn mit Titip un Zeta noog...)
De Lü vun Greenpeace harrn ok wedder Klabasterers mitbröcht, de twüschen de Pieler direkt vör't Raadhus en groot Transparent anbröcht hebbt. De offizielle Verantwoortliche müss ehr pro forma mehrmalen över Luudspreker beropen un seggen, dat weer nich inplaant, se schulln nu rünnerkamen; man nix da, se hebbt seelenruhig wiedermaakt. Dat leet, as weer dat stillkens en Övereenkamen. Nüms hett wat dorgegen daan, ok de Udels nich, de de ganze Akschoon afsekert hebbt. Se harrn wiss ehrn Spaaß un weern in't Hart ok bi de Demonstranten.
Se treckt dat Transparent op, de
Ruum ünner de Pielers Dat Ergeevnis is en duppelte Utsaag:
Mit de twee "Hannelsafkamen", sünnerlich mit CETA, warrt dat nu hoge Tied, dor noch en P dorvör to setten. De Argumenten mööt wi hier nich wedderhaaln, al vör Johren hefft wi gode Quelln dorto hier bi Plattpartu verlinkt. Dat geiht üm nich weniger as uns Demokratie gegen de Övernahm dör de Weerschap to verdeffendeern. Ganz sülvstlos wüllt de Grootkonzerne uns ok noch de letzten frien Entscheiden afnehmen! Mennig vun de Argumenten staht hier — un welk staht ok op de Plakaten op. Snaaksch is, dat vundaag masse Lü uns ach so sülvstbestimmte Levenswies gegen "Frömde", Migranten, Flüchtlinge verdeffendeern wüllt, de angeevlich bloots Kosten bringt un keen Stüern tahlt; dat avers de Profitgier vun internaschonale Konzerne, de narms Stüern tahlt, en veel grötter Bedrauhn ween kann, is ehr nich bewusst. — Man de Industrielobbies laat ja nich locker, as'n Hund, de sien Büüt nich ut de Fäng geven will. Dat neegst Afkamen, dat se versöökt, warrt TISA ween; dor geiht dat üm Deenstleisten. Weer dat nich schöön, wenn endlich ok uns öffentliche Waterversorgen privatiseert wöör un Nestlé orr RWE uns slechter Water to höger Priesen verköpen dä? Süh, dat kriegt wi mit TISA. Alternative: Hier. Un wählen. Un demonstreern.
Gau mitdoon köönt Se nu vör allen as Holsteenersch un Holsteener — bi "SH stoppt Ceta", de ganz fix 20.000 Ünnerschriften bruukt, de Landsregeern optofeddern, in'n Bundsraad gegen CETA to stimmen. Dor woorn ok flietig Ünnerschriften sammelt. Man toveel kann't gornich warrn!
18.9.2016 |
