Op blauen Dunst

vun Hannes Frahm

Wat seggst nu? Nu is dat rut! Amtlich! Sogor polietsch amtlich! Ik höör nu to de "Börgers twete Wahl"!

Woso? Ik bün twüschen 60 un 70 Johr oolt, anmellen to'n Impen dörf ik mi rechtlich eerst af den sössten Mai Tweedusenduneenuntwintig! Ik heff mi nich vördrängelt, dat is gegen dat Gesett! Un straafbor warr ik mi nich maken.

Aver wat heet straafbor maken?!? Is dat nu polietsch amtlich en ne'e Tugend?
Een reist na Mallorca oder to Wiehnachtfiern na Däänmark, kaamt wedder na Huus un mööt eerstmal all Lüüd begröten, in de Arms liggen un, so as de in Flensborg, ok noch de Amtlichen vun dat Gesundheitsamt anlegen, wo se in't Utland fiert hebbt. De hebbt keen Straaf kregen, ne, in Gegendeel!

Polietsch amtlich sünd de ja wedder gesund und warrt mit de, de nu al twee Sprütten kregen hebbt, gliekstellt! Ja, polietsch amtlich sogor, dat seggt dat Bunnsministerium för Justiz!
Dor büst du platt, wat?
Ik, de nix verbraken hett, is nu "Börger twete Wahl!"

Ik dörv mi nu, polietsch amtlich, af den 6. Mai 2021 üm en Imptermin bewarven!
Ik will nu ja nich Swart oder Root sehn, ne, dat will ik nich. Wenn dat in de neegsten twee Maanden glücken schull, denn warr ik in Juni impt un dree Maanden later noch eenmal, denn hebbt wi September, denn dörv ik ok reisen, dörv in't Lokaal … -
Dor seggst överhaupt wat! In'n September weer doch wat mit Lokaal?!? Ach ja, Wahllokaal, dat stimmt ja.

Wenn ik bet dorhen de twete Sprütt nu nich heff, denn dörv ik nich in dat Wahllokaal. Ik stell mi doch för de Parteien an den Dag eerst in de Slang to'n Soforttest un achterna in de Slang to'n Afgeven vun mien Stimm! Ik kann mi doch dor mit Covid-19 ansteken, un dat will ik nich, un ik will ok anner Lüüd nich ansteken!!!
Breefwahl!

Also tööv ik den amtlich polietschen Oproop för de Breefwahl af. Denn forder ik mien Breefwahlünnerlagen per Internett af. De kaamt denn mit de Post! Tja, wenn se kaamt. Dorto mutt een weten, dat ik in en Straat wahnen do, de för de Post as "Man kann oder ok nich"-Straat denen deit. Wi hebbt al beleevt, dat wi an een Dag in de Week de Post vun 10 Warkdaag kregen hebbt (krank, keen Lüüd, keen L…st). Wi reekt hier mit en Postlooptiet vun fief Warkdaag Minimum.

Also de Wahlünnerlagen mit den Wahlschien kummt an.
Weet ik nu, wokeen de Post inpackt hett, liggt dor en Nawies dorbi, dat de impt oder en Negativsoforttest hett? Ik weet doch nich, wokeen op düsse Ünnerlagen al roppruust hett? Ik will mi doch nich mit Covid-19 ansteken! Also…

De Post wannert för twee Weken in Quarantään, dat heet: Schuuflaad op, Post rin, Schuuflaad to, Indrag in'n Klenner.

Warrt de Stimmen vun Twete-Wahl-Börgers amtlich in't Ooltpapeer smeten?

Na veerteihn Daag, Schuuf op, Post rut un wählen. Ik seh aver jümmers noch nich Swart un Root; un wählen — op "blauen" Dunst al gor nich. Nu warrt studeert, de Krüzen sett, den Bipack ünnerschreven, allens topeekt, un denn ….. ik will je keeneen ansteken, so kummt dat wedder in de Schuuf för twee Weken!
Ik weet doch nich, ob de in dat Wahlamt de Post foorts apen maakt? Ik will doch düsse Lüüd nich ansteken! Ik nich!!!

Na de twee Weken geiht de Breef in den Breefkasten mit de Postlooptiet vun fief Daag!!!

Ik hoop ja blots, dat mien Wahlzeddel nich to laat to'n Uttellen kummt, ok wenn dat man blot de Stimm vun den Börger twete Wahl is.
Aver de mööt dat rechttiedig op den Weg bringen, nich ik, denn ik bün ja bloots …

...amtlich polietsch "twete Wahl"!