Ein Tyrann in'n Kreml sitt

vun Behrend Böckmann


So as Cäsar einst in Rom
sitt ok Putin up 'n Thron,
un so as Cäsar harr einst Recht,
ward ok dån, wat Putin secht,
denn Rägeln för't Tausåmenläben
hett't bi Tyrannen nie nich gäben.
Un so däd in disse Dågen
ein Ami in Kongress nåfrågen,
wo blot dei russ'sche Brutus* blifft,
dei den Dodesstoß em gifft,
denn man süll nix ünnerlåten,
so as Bin Laden em tau fåten.

Putin wünscht sik würklich sihr,
dat Russland wedder 'n Grotmacht wier,
un mit dei Tiet ward ut 'n Lenker
nå un nå 'n schäwig Henker,
dei sik Zoren mit grot Nåmen
hett taun Ogenspeigel nåhmen.

Un as man sik dat denken kann:
Mit den Iwan** fangt dat an,
un von weckern wi hüt weiten,
dat hei hett dei "Terribel" heiten,
un jeder Russ, dei Böses deit,
bi uns noch ümmer "Iwan" heit.
Annersrüm un sœben Frugen,
wull hei keinen Minschen trugen
un von "Opritschnikis"*** ümgäben,
bangten väle üm ehr Läben.
Kreech hei denn mål sienen Dullen,
leet dusendfach hei Köppe rullen.
Dor wunnert't nich, wenn ok ward secht,
hei hett denn eigen Sœhn ümlecht.

As Zor un ok as Timmermann
schickt sik dei grote Peiter**** an,
dor wo däd dei Newa münnen,
för sik 'n niege Stadt tau grünnen,
un woans wi all hüt weiten,
däd's "St. Petersburg" denn heiten.
Doch ihrer Nuurdvenedig stünn,
männig Minsch den Dod dor fünn:
Por hunnnertdusend hemm' ehr Läben
för den güllen Prunk hengäben.
Sankt Petersborg — oft ünnergåhn,
is ümmer wedder uperståhn,
in'n Milljonenstadt in all ehr Pracht
beläwt 'n dor dei witte Nacht.

As Prinzessin ut'n düütschet Land
ward Katharina weltbekannt.
Verdüwelt gaut up Leif instellt,
keem's jung in disse russ'sche Welt,
un as ehr Kierl dei Zor denn wier,
dunn wüsst sei all, sei künn noch mihr,
un korte Tiet hett dat blot duert,
dor hett dei Dod all up em luert.
Dornå wür sei inthronisiert
un hett ehr Russland reformiert,
däd as klauke Zorin läben
un Mannslüd sik giern hengäben,
reet as Zorin up'n Pierd
up ehr Sössdel vonne Ierd
un hett ümmer doran dacht,
dat Russland ward 'n Weltenmacht.

Doch denn keem dei ierste Wenn':
Dat Zorenriek, dat is an'n Enn',
Matrosen fangen an tau scheiten
un dat kümmt taun Blautvergeiten,
Kopp Lenin wull nu utprobiern,
woans Sowjets denn kœn'n regiern
un grünnt 'n roden Staatenbund,
den iersten up uns Ierdenrund —
un nå dissen roden Sieg
geef't hitten un ok kollen Krieg.

As disse Tiet ehr Enn' harr funnen
wür dei Bund ok œwerwunnen.
Ein Land, dat in'n Verbund grot wier,
is mit eins kein Sössdel mihr;
dei rode Fåhn mit Sicht****** un Håmer
keem in dei Effektenkåmer
un ünner Farwen witt-blåch-rod
kümmt Riekdom up un niege Not.
In't niege Russland fählen Denker
un man söcht nå einen Lenker,
bet denn endlich Putin kümmt
un dat Stüer an sik nimmt.
Hei wull nich demäudig läben,
sonnern kreech dat Grotmachtsträben —
dat Zorenriek süll nie entståhn
för den Bund, dei ünnergåhn.

Väl niege Wunner warden wohr
ünner Putin as den Zor,
denn nu gifft't för gaudet Geld
fienste Wor ut alle Welt
in't GUM, dor is dei Russe sik wiss,
dat noch lütt bäten grötter is
as't KDW Berlin Kuhdamm
un Lafayette Paris Haussmann.
Männig Rubel måkt nu "kling"
för Coca Cola, Burger King.
Von Minschen, dei mit Euros kåmen,
ward giern Kaviar mitnåhmen,
ok gauden Schuumwien vonne Krim
köpen Leckertähns giern in,
köpen Korden för't Bolschoi,
läsen Dostojewski un Tolstoi,
besäuken dat Vergnäugungsriek,
den Gorki Park, den Prater gliek.

Wat glücklich schlööch so männig Hart,
dat Russland nu weltåpen ward!
Man harr sik dat Verspräken gäben
in gaude Nåwerschapp tau läben,
doch dei Putin grünnt taugliek
Russland as nieget Zorenriek —
half Demokrat un ok half Zor
höllt man em för 'n grot Gefohr:
Dat Abendland rückt wieder vör
mit dei NATO vör sien Dör
un ward mit Geld un gauden Rad
'n Stütt för Minschen up'e Stråt.
Denn Putin möt 'n doch lütt kriegen,
wenn Frieheit sall in Russland siegen!
Blot Baikonur up jeden Fall
blifft nödig för dei Reis in't All.

As Putin denn dei Krågen platzt,
is dat Abendland vergnatzt,
man denkt sik väl Sankschonen ut,
schmitt dei Netrebko sogor rut...
Doch wecker is sik würklich wiss,
dat Frieheit ümmer Frieheit is?
Dat nich ümmer up uns Welt
dat Åbendland as Ramat gellt,
wo Minschen in den Globen läben,
Schamanen möt dat ümmer gäben,
dat dei Pill hett ok kein Oort,
denn dornå wasst 'n Männerbort?

Doch Demokraten sünd sik wiss,
dat Putin dei Tyrann hüt is,
un jederein, dei opponiert,
ward achteran dull malträtiert,
ok is dat för dei Medienwelt
in Russland nu ganz leech bestellt:
wat utposaunt, aflicht un schräben,
ward von'n Kreml rutergäben.

Doch wecker gaut mit Putin künn,
hürte tau den Kring von Frünn',
dei kreech Posten, harr väl Geld,
wier 'n rieker Mann von Welt.
As all noch Komsomolzen wiern
un lüchten däd dei rode Stiern,
dunn hett keinein nie nich an dacht,
dat sei mål kriegen soväl Macht.
So is't Chodorkowski******* ergåhn,
as hei up Putins Sied däd ståhn,
hei wür ein Oligarch wie wohr,
dei anner wür dei niege Zor.
Denn künnen's sik up eins nich lieden
un füngen an, düchtig tau strieden —
Chodorkowski nu in Ungnåd föllt
un nix mihr von Putin höllt
un is sik nåhst in London wiss,
dat Putin doch 'n Windhund is,
'n Schubberjack! Wie leech dat klingt,
wenn dat 'n Fründ von einsten singt.

Üm dei Fründschaft tau bekunnen
hett Joe in Polen sik infunnen
un wull an Murder Brutus dacht
as hei dit secht un schwiensplietsch lacht:
"Wecker kann all Putin lieden?
Disse Mann, dei dörp nich blieben!"


Sülvstgefällig: Cäsar

 

 

 


Benaut: Iwan dei Schreckliche
hett sienen Söhn moordt.
Gemälde vun Ilja Repin

 

 


Ok sülvstgefällig:
Zarin Kathrien vun Russland

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 


* Marcus Iunius Brutus Caepio (85 - 42 v. Chr.), oft kurz Brutus genannt, war ein römischer Politiker in der Zeit der späten Republik und einer der Mörder Gaius Iulius Caesars.
** Iwan der Schreckliche (1530-1584), Großfürst von Moskau, als 16-jähriger zum Zaren gekrönt, galt as cholerisch und sadistisch
*** Opritschnik - Leibwächter
**** Peter I. (1672-1725), auch Peter der Große war von 1682-1725 der Herrscher Russlands
***** Katharina die Große ( 1729-1795), als Prinzessin von Anhalt Zerbst in Stettin geboren, wurde sie 16jährig mit dem russischen Thronfolger Peter III. verheiratet und wird durch Intrigen 1762 zur Zarin Katharina II. von Russland
****** Sicht - Sichel
******* Der Oligarch Michael Borissowitsch Chodorkowski (Jahrgang 1963) war zu Sowjetzeiten ein guter Komsomolsekratär und nach dem Zusammenbruch als reichster Russe Vorstandsvorsitzender des Ölkonzerns Yukos. Wegen Steuerhinterziehung und Betrug verhaftet, begnadigt und nach London umgesiedelt, erneut wegen Mord an einem russischen Bürgermneister gesucht


2.4.2022


na baven