De Ünnerschicht

...bekeken vun H. Jürgen Grebin

Wo't ein Ünnerschicht inne Gesellschaft giwt, mütt dat ok ein Schicht doroewer gäben oder ok miehrere, heww ick mal so bi 't Läsen dacht.
Un ick heww ok wat funn und tworstens in den Rostocker Hanse-Anzeiger, nirgendwo anners. Is dat nich komisch un nahdenkenswiert? So ein lüttes Blatt — wi kriegen dei Zeitung ok noch ümsünst in't Hus bröcht. Keiner vermaud, dorin disse Verklorung tau finn'n.

De Oewerschrift heit: DREI-DRÜDDEL-GESELLSCHAFT — un werrer wie dat hüdigendags so Mod' is, ward de REFORM dormit inn Tausamenhang bröcht. Reformwillig Lüüd sünn befragt worn, ob sei dat sünd. Sei mütt je woll ganz willig wäsen sein, sünst harrn wi nicks tau läsen un tau hürn krägen.

Dei Soziologen, so heiten disse plietschen Lüüd, hemm nu nich blots twei Schichten rutfunn, nee väl miehr — un so moeten sich Ünnerschicht un Oewerschicht nich ängstigen. Sei hebben genuch minschlich-politisches Humankapital — so nennt sich inne Politik dit Klientel, mit dei sei sick beschäftigen, üm ehr nieges Indringen in die minschliche Seelenlag tau verkloren. Wägen dei Reform, dei je eigentlich wat Gaudes bedüden süll — "Verbäderung" süll dat bedüden, üm Gottes Willen keine Verslechterung. So ward dat taumindestens vonne Politik secht.

Sünst beschäftigt sick dei Verköper- un Köpergesellschaft mit ganz anner Indeilungen — taun Bispill mit Köperschichten, Dicke un Dünne un wat dat noch so all giwwt. De niegen Soziologen hebbt sick ne ganz anner Ort von Indeilung utdacht.

Wat hebben wi nu för ein Seelenlag in Düütschland?

Oewer die babelsten Schichten hett sich keiner utlaten, nur dei letzt Schicht hett in Düütschlands Landen för Uprägung sorgt. Dat sall dei Schicht sein, dei in ne Suppnkök Middach ät, dei von Pessimismus befallen is, nich arbeiden mach, up alln's teuwt, nich weit, wat sei will, inn Osten tau Hus is.

Ick mein, disse Lüüd hebben schon lang kein Arbeid miehr, obwohl sei giern arbeiden würn, oewer einfach kein Arbeid finn'n, dei von Amts wägen utspioniert ward'n, üm ehr noch weniger Geld taukamen tau laten.

Bi disse Gelägenheit denk ick an ein Utspruch von ein 80jöhrig Frau ut Westdüütschland — befragt na Änschi Merkel: "Dei sall man werrer trüch gahn inn Osten, wo sei herkamen is, in Düütschland wier dat noch niemals so schlecht wi hüdigendags!" — Ob dat helpt, dat dordöch dat Läben in Düütschland bärer ward?
Oewer dat is schon werrer ne Unterseukung wiert, mein ick.