Ik verstoh dat nich mit de Ümwelt!

vun Heinz Tiekötter


Woso koomt wi mit den Schutz vun uns Ümwelt nich vörran. Froogst du de Parteien, denn hollt de dat Thema för sünnerlich wichtig. Dat seggt se tomindst. Se weet nu all, woneem in föftig or hunnert Johrn uns Welt ünner Woter steiht. Se schnackt ok all vun de Dürre un dat Chaos, de dor op uns täuft. Dat heet, een vun de Parteien hett mit düt Thema nix an Hoot. De lett dat koolt. Se rekent in Perioden vun dusend Johrn, ok wenn jemmer leste bloots vun 1933 bit 1945 anduert hett.

Un wen ik doran dink, wat Aldi, Lidl, C&A und all de velen annern Händlers för jemmer Prospekte utgeevt, vermiss ik unsen Stoot. Uns Regierung fehlt för de Opklärung dat Geld. Werbung mookt se bloots, wenn Wohlen anstoht, man ninich, wenn dat dorüm geiht, de Minschen optorütteln. Hest du all mol wat in dien Breefkassen funnen öber Plastikmüll, öber Glyphosat un all den Schiet, de uns süük mookt?


Stapelwies Prospekte, to Dutzen in't Treppenhuus afleggt. Un denn ok noch in Plastik!!!

Mag sien, dat uns Regierung de Lüüd nich belehren will. Se gläuvt villicht, dat Volk kapiert dat doch nich. Kann dat sien, se hebbt dormit Recht?

Vele Minschen köfft sik 'n Illustrierte, denn se find de Sieden mit Sport un veel Jux interessant. Kiekt se bloots de Biller an, wenn de Norichten öber Kastrofen kümmt? Weten se ok nich, dat se mit elkeen Droppen Motoroil, den se still un heemlich in Wohld entsoorgt, dree Milljoonen Droppen Drinkwoter schietig mookt? De denn nich mehr drinkbor sünd. Solang nüms de Minschen kloormookt, dat se grod dorbi sünd, ehre Kinner un Enkelkinner een bitopulen, ballert de ehren Schiet in de Gegend. Dat Weten fehlt jem! Un dat Umweltsministerium un all de Behörden koomt nich an se ran. Se hebbt keen Ohnung vun Marketing un weet noch vun Breefkassen. Se weet ok nix vun Anzeigen un vun Prospekten.


De sprickwöörtlichen dree Apen — so benehmt wi uns!

Tweemol in de Week sünd bi uns de Breefkassen vull. De Prospekte vun Aldi, Edeka un Lidl un vun all de annern velen Händlers stopelt sik dorin. Un de bunten Biller sünd wirksom. Dat markt een denn, wenn he dor vör de Kass in een lange Slang steiht. Mit bunte Biller kannst wat bewegen. Besinn di mol op de Akschoon "Rauchen gefährdet deine Gesundheit"! Wenn du freuher in´n Kroog rinkeemst, kunnst du wegen luder Qualm den Tresen nich erkennen. Hüüt stoht villicht twee Mann vör de Döör un nuckelt an jemmer Zigarett.

Woans liggt dat nu, dat de Politikers keen Strateschie find, de Natur intakt to hollen? Orrer hebbt dor allwedder welk vun de Lobbyisten ehre Hannen in Speel?


5.1.2020


na baven