Dei Dom von Kolberg

Dei Unabhängigkeitsdach in Polen

Dei 11.11.2010, erlääwt von Hans Jürgen Grebin

För Marschall Pilsudski wier in dei letzen Johr' in Kolberg ein Denkmal buucht worrn.

Dat Pilsudski-Denkmal in Kolberg

Slichte Symbolik: Pilsudski un dei polnische Adler sünd eens

"Christus vincit", Christus winnt, heit dat in't Tympanon von'n Domportal.
Blangen Christus dei Symbole för dei veer Evangelisten: Kind, Adler, Lööw, Stier.

Dei kunstvulle moderne Döör an'n Dom wiest Szenen ut dei Evangelien

Doch! Bi schöönst' Sünnenwäärer inn November güng ick in dei Richtung Dom und beträä' ganz jipern dei gewaltich Kark.

Natürlich harr ick mi dei Kark vull Minschen dacht, doch allens wier ganz anners. Dei Minschen stünnen bit tau dei groten Döörn! Ick drängelte mi bit ganz na vörn, denn ick wull je dei Mess' fotografiern. Nu harr ick oewer nich doran dacht, dat de Gläubigen miteis up de Knei fallen wüürn — un ick stah ganz allein mittenmang uprecht. Doch kein Minsch hett sick doran stüürt un mi böös' ankäken, alln's wier friedlich. So gelangte ick ümmer nääger nah dei Preisters un ehre Messdeiners ran.

Vörn inn' Altarruum stünnen inn Halwkreis de Fahnendrägers mit ehre Fahnen von dei Armee, Polizei, Solidarnosc, Marine, Parteien, Jugendvereins, ook von de Heimatarmee (AK). Up ein Fraach von mi späärer hett mi die AK-Fahnendräger secht, dat hei 1944 von dei Russen för twei Johr na Sibirien bröcht worrn wier. Ein schlimme un siehr schwere Tied wier dat wääsen, meinte hei.

Eucharistie in'n Kolberger Dom

Dei Geistlichen gahn rut, dat Militär an'n Altar övernimmt. Wier dat in Düütschland so möglich?

Na dat Abendmahl, wotau vääle Minschen na vörn' gahn wiern un wecke sick rünnerkneid' harrn, üm dat Abendmahl tau kriegen, güng'n de Kirchenlüüd dörch ein Siedendöör uut denn Karkenruum. Vörher gääw dat noch ein Iehrenbeteigung dörch dei drei Soldaten, dei mit ehr Fahn ganz vöörn stünnen harrn. Denn güng ein Offizieller inn swarten Antoch an dat Pult un höllt ein kotte Rääd. De gääw denn ook denn Befehl taun Uutmarsch von de drei Armee-Fahnendrägers, un de annern güngen hinnerher. Hei dankte un de "Kundgäbung" inne Kark wier vörbi.

Afmarsch...

...von dei velen Fahnen

Mi is upfallen, dat sick vääle Glööwich' ganz aktiv an de Gebää' un Lieder bit taun Enn bedeilicht hebben. De Lieder wüürn von ein Orgel begliedt. Dat all wirkte up mi siehr beindruckend. Dörch de Akustik in dat gewaltich Kirchenschipp wüür allns wuchtiger.

Fahnen-Prozession: Armee...

...noch welk...

...öllere Herrn, Veteranen...

...un dei Nawuss

An'n Denkmal: Symbole, Fahnen, Gefühle...

Buten vör de Kark harrn sich de Fahnendrägers upstellt un wüürn von ein Wachtoch Soldaten mit MPi un von ein lütte Musikkapell anführt. Dei Deilnähmers güngen in dei Richtung vonn Park an dei Straat "Armija Krajowe". Dor wier dat Denkmal för Pilsudski. Inn Halwrund von dei Anlaach nöhmen de Offiziellen Upstellung. De Anlaach wir mit rot-witten Fahnen schmückt. Vör dei Anlaach stünn dei Armee-Iehrenformation.

...Gefühle, Symbole, Fahnen. In Düütschland sünd wi da sachlicher, skeptischer. Mit Grund. Mit Recht?

Junge Minschen...

Sei aanterten miehrmals kott un zackich mit denn Namen von ehr Regiment. Ein lütte Flamm' wüür anzündt woorn. Üm dei herüm wüürn denn spärer na dei Räden dei Kränz' rünnerlecht. Disse wüürn von Jungs un Dierns in Marineuniform mit dei Offiziellen tausaamen dragen. Sei grüßten mit twei Finger an dei Schläf', wi dat hier in Polen Mod' is, un verlääten denn Platz.

...un olle Rituale

Wi sick dei Saaken doch ännern koenen! Wi künnen "wi" inn Osten dormals na denn 2. Weltkriech ook annähmen, dit polnisch-katholsch' instellte Minschenvolk wüür sick tau ein Ännerung von ehr ollen Instellung tau de Obrigkeit in Staat un Kark ook bloß ein bäten mitnähmen laaten?

Doch wer will datt hüüt verurdeilen, bärer weiten, wenn sick Minschen miehr denn Gloowen ass dei Vernunft verbunnen fäuhlten?

Dei Quittung kaem denn inn Loop von vier Johrteinten mit Solidarnosc un dat Enn' von dei "soschialist Gemeinschaft" inn Johr 1989 — Ostblock vonn "Westen" nöömt — un de hüüdige Mitgliedschaft inne Nato.

Dei Ierst in'ne Reihg süht ut as dei junge George W. Bush! Anklicken un kieken!

Wat blifft?: An't Denkmal dat rood-witte Blomenmeer...

Ass ick dei Soldaten inne Kark Iehrenwach' stahn seih, kaem mi so inn Sinn, worüm ick 1948 de Kark as Gemeinschaft "Adschüüs" secht heww. Beid Kirchen, dei Katholschen un dei Evangelischen (Protestantischen), hebben tau allen Tieden dei Soldaten un dormit ook denn Krieg säägend, in denn uns Väärer ehr Läben laten müssten. Hier in Kolberg, ann 11.11. 2010, denn Unabhängigkeitsdach Polens, wüür mi dat werrer düütlich vör Oogen führt.

...ein strahlen schöne Heimfahrt dörch grööngrieses Land...

Doch tau Iehren von Polen stell ick fast, dei hebbt ehr Truppen — nadem sei so dösich wiern, sei hintauschicken — intwischen uut denn Irak ruuthaalt. Man bloot woll, üm sei nah Afghanistan tau schicken, uut wecke Grünn' ook ümmer. Fazit: Ut dei Geschicht kannst liehren, awer: dat geiht langsam, langsam...

...un ein lierlüttje Kokarde, verloren in de polnischen Farven up dei dunkle Ierd.