Annersrüm in'n Vatikan

To'n CSD, vun Behrend Böckmann



Christopher Street Day överall! Dorbi höört wi op jeden Fall
bi de Parade kenen Toon vun de "gröttste Schwulen-Organisation"...

Wat 'n "Drag Queen" up'e Reperbåhn,
sünd Hillige in'n Vatikån,
denn lange Kleeder, rode Schauh
decken den Œteldœtel tau,
den Adam von Gottvadder kreech,
as hei inne Weich noch leech,
dei em wür as Spältüüch gäben
un nödig is för't Wiederläben.
So keem ok Moses up'e Welt,
dei as Prophet för väle gellt.


Un weer he ok noch beten lütt: Den Œteldœtel schafft Gott mit!

Doch vör gaut tweidusend Johr
måkt denn Gott 'n Wunner wohr:
hei schickt Engels, dei verkünnen,
sien Sœhn wier in'n Stall tau finnen
un alle Welt leet hei ok weiten:
Jesus süll dat Kinning heiten —
hei ward Heiland un sall ünnen
Minschen helpen, Heil tau finnen.
Un bald sünd ok in Gott sien'n Nåmen
twölf Apostels tau em kåmen,
dei mit em deilen Freud un Leid
as Anfang von dei Christenheit.

Dei Jünger gåhn up Schritt un Tritt
mit ehr'n Verkünner Jesus mit.
As sei bi't Åbendmåhl hemm' seeten,
hett ehr Jesus sik vergäten,
tauminnest dat 'nen Denker dücht,
dat sien Hand bi 'n Jünger licht,
äben gråd dor in den Schritt,
wo dei Œdeldœdel sitt.
Von ein Jüngersch will hei weiten —
Maria Magdalena hett sei heiten —,
dat sei all spälte ehre Rull
as Alice Schwarzer üm't Johr Null.

Ut't Testament in uns bekannt,
dat Petrus ut dat Hillig Land
den niegen Globen bröcht nå Rom,
wo hüt noch steiht dei Petersdom
un rundüm väle Preisters läben,
dei sik ehren Gott hengäben.
Doch ehr Gott bi'n besten Willen
kann nie nich den Jieper stillen,
un dei nich will'n einspännig trappen,
lött hei griepen nå 'n Rappen,
lött tau, dat jeder frame Mann
Hand bi'n annern anleggen kann.

Vier von fief, dei måken't so
un sünd dorœwer bannig froh,
dat Gottvadder gor nich schellt,
wenn sik dei Œteldœtel mellt,
wenn männigein spält åhn grot Bang
an'n annern sienen Klockenstrang.
Dat geef Vergäbung dörch dei Bicht,
kein'n Arger bi dat Jüngst Gericht,
doch endlich is't an't Licht nu kåmen,
dat sei sik hemm' ok Kinner nåhmen,
dat's sik an Kinner hemm' vergåhn
un väle grotet Leed andån.


Nu warrt dat langsam hässlich, denn bi Kinner is de Spaaß to Enn!

Dat Middelöller is vörbi,
alle Minschen denken frie,
Un Opfer mellen sik tau Wurt
in'n Kölner Dom, den Hillig Urt,
sei klågen an, will'n nich vergäben
dat biblisch Sodomiterläben,
un so weit nu alle Welt,
wat Gottesdeiner hemm' anstellt.
Ok Gottvadder is sik wiss,
dat hei 'n bäten schullig is,
denn as hei måkt ut Leihm den Mann,
kläwt hei ut den Rest em an,
wat œwerall in Stadt un Land
as Œteldœtel is bekannt.


Wenn's mihr weiten willen, denn läsen's dat Bauk "Sodoma" von Frédéric Martel (Johrgang 1967), studierter Sozioloog, Autor un Jounalist, 2001-2005 Kulturattaché an de französische Botschaft in Washington, rutkåmen up Franzöös'sch: Sodoma. Enquête au cœur du vatican, Robert Laffont, Paris 2019. Un up düütsch: S. Fischer Verlag (Hrsg.) Sodom. Macht, Homosexualität und Doppelmoral im Vatikan. Frankfurt am Main 2019.


25.7.2021


na baven