Woter, marsch!

vun Silke Frakstein

Nix dor. Ok hier geiht dat üm den Klimawandel, un, denk an Greta!
Dat heet, Woter vun Kantüffeln, Nudeln usw. kümmt in den Abfluss vun de Köök orrer Boodstuuv. Dennso bruukst keen "Abflussfrei".
Spöölmaschien spoort mehr Woter as mit de Hand to waschen. Un Duschen in'n Sommer mutt ok nich dreemol an'n Dag sien.

Koffi un'n scheun Tass Tee an'n Morgen, dat is wichtig. Ober af un an klappt ok dat nich.

Mien Putzfee weer fardig mit de Wohnung un seggt Adschüs. Ik weer ok fardig, denn wi deelt uns de Arbeit.
So, nun 'n scheun Tass Koffi. Keen Woter?? Nanu, bi uns in't Huus sünd doch gor keene Handwarkslüüd! Ober lever nochmol Kontrolle. Nee, de Ventile sünd all richtig stellt. Also Huusmeester anpingeln. "Nee", seggt he, he weet vun nix un de Heizung löppt ok.

Ik wedder inne Wohnung. Nee, keen Woter. Also Service vun Hamburg Wasser.
Nee, ok hier is nix bekannt. Ober he kiekt lever nochmol in den Computer: klack, klack, hmm, hmm. Ne allens allerbest.
"Das ist allerdings merkwürdig", seggt he.
Wi harrn nämlich mol so'n Klapskalli hier bi uns, de harr so'n Hauptslötel un dormit kunn he dat Hauptventil vun de Stroot dicht moken.
Tjä, wat nu, sprach der Chinese.

"Haben Sie alle Ventile im Haus und in der Wohnung noch einmal kontrolliert?", froog he.
"In't Huus jo, un inne Wohnung is allens so as jümmers."
"Machen Sie bitte noch einmal die Kontrolle!", seggt he ganz fründlich.

Na schön, bringt twoors nix, ober wenn he dat nu unbedingt will! Inne Köök is allens paletti un in dat WC……. Is dat Ventil todreiht!

Is dat nu 'n Droom orrer Wirklichkeit? Keen dreiht denn an dat Ventil? Dor weern doch blots ik un de Putzfee in't Huus. Un de hett dat WC gründlich mookt — un dat Ventil fein putzt, hett se noch seggt.

Woter marsch!