Ünner Verdacht

vun Heinz Tiekötter

Wat sünd wi doch bang vör de Anslääg vun Terroristen. An'n Flooghoben stoht nu mehr Udels rüm as bi 'n grotet Footballspeel. Un jemmer scharpen Blick entkümmst du nich. Se ward dat glieks gewohr, wenn een wat to verbargen hett. Un se weet allens öber kriminelle Tricks un Meuglichkeiten. Hest du dat wusst: Mit so'n Nogelknipser kannst du 'n bannigen Schoden anrichten un ne Teenpastatuuv, in de nu ober Sprengstoff un keen Teenpasta mehr in is, de langt all, üm 'n so'n Fleger in in'ne Luft ut'nanner to rieten. Also, wenn du mit'n Fleger ünnerwegens sien musst, denn bring Tiet mit. Du warst vörher gründlich kontrolliert.

Michel un siene Brigitte harrn wegen ehre güllene Hochtiet ne grote Reis vör sik. Se wulln mit den Fleger no de Kanaren un denn wieder mit 'n Musik-Damper. Vör fofftig Johrn harrn de beiden keen Vörstellung hat, dat se sik sowat mol leisten kunn'n. Dor weer domols nich an to denken. Ansünsten harrn se sik as Heirotstermin gewiss keen Ferienbeginn utsöcht.

In de grote Halle vun den Flooghoben weer'n Gedränge, as wenn dat Eten un Drinken ümsonst geev. Sünnerlich lang weer de Reeg an den Körperscanner. So'n Körperscanner sütt ut as 'n Dörenrohmen, wo se blots de Döör klaut hebbt. Ünnen gifft dat twee Footmatten, dor müsst di ropstellen. Wenn du richtig steihst, denn ritt'st du de Arms hooch, as wenn no Meddernacht dörch Billstedt löppst un een mit ne Kalaschnikov op di tokümmt. Ok bi den Scanner täufst du, wat passiert. Nu kiektde Scanner dörch diene Klamotten hendörch un sütt, wat du anhest un bi di dräägst un of dor wat is, wat dor nich hengeheurt. He sütt ok, wenn an dien Leibchen ne Sekerheitsnodel steekt, wiel dat di dor allwedder n'poor Knööp fehlt. Twee Oppasser kiekt jümmers mit. Wohrschienlich ward di dat unangenehm, wenn du di vörstellst, dat du grod dorbi büst, för de Wachlüüd so'ne Ort Table-Dancing to moken. Dorüm hangt dor ok'n Schild, dat du buten üm den Scanner rümgohn droffst, wenn di dat to schenierlich is. — Do dat blots nich!

Brigitte harr keen Lust op Table-Dancing. Se güng buten üm dat Gerät rüm. Harr se dat man blotsnich nich mookt. Fortsens keem een vun de Udels mit Kollegin op Brigitte hento un trocken ehr erst 'n beten glupsch an de Siet un denn in'ne lütte Komer rin. Brigitte müss sik uttrecken bit op de Ünnerbüx un den BH. Man ok dor weer de Beamtin mit ehr Hannen in un feuhl no, wat dor villicht 'n Revolver in de Dessous steek. Denn backten se Brigitte 'n Ploster op ehren Buuk. Dat reten se glieks wedder af. Nu kunnen de Udels faststellen, wat Brigitte Kontakt mit Drogen orrer Sprengstoff harr. Un se harr! De Apparoot fung an to piepen. Dor weer'n Spuren an to finnen.

Nu is dat opregend worrn. Dat geev 'n richtiget Verheur. Se wulln vun Brigitte weten, wat se för'n Bodyloschen nehm un wat se för 'n Deo harr. Brigitte vertell jem dat un denn hebbt de beiden Udels sik ankeken, nickköppt un sik tofreden geben. Se menen, in so'n Kroom kunn ok wat steken, wat bi jem Alarm utleust.

Ik warn di: Wenn du mit'n Fleger reisen wullt, go dörch den Scanner dörch. Sülmst denn, wenn du 'n Hartschrittmoker hest. Di wedder op de Feut to bringen, is lichter, as to bewiesen, dat du keen Terrorist bist. Ok denn, wenn du all mehr as söbentig Johr op'n Buckel hest un ünnerwegens op diene Güllen-Hochtiets-Reis bist.