Wo sünd wi henkåmen?!

vun Behrend Böckmann

Dormit dei Tähn sünd witt un schön,
gifft dat hüt so männig Crem —
an hunnert Sorten heff ik tellt
in mien Diskaunter-Inkopswelt.

Un wenn ik denn so wieder gåh
un nu vör ein Salatbuurd ståh,
vör Wunnern mi dat Mul up blifft,
wat dat blot för Salaten gifft.

In'n anner Buurt up jeden Fall
gifft dat Kees von œwerall,
Frau Antje priest den Gouda an
un äbenso Old Amsterdam!

Ok hemm' wi mål Tieden hadd
dat dei Tee wier gräun un schwatt,
hüt gifft dat ojeminäh
hunnertfach Aromatee.

De Warenwelt, wenn man so will,
is anners nix as morgen Müll!

Ok dat Tütensuppenbuurd
is för mi son'n Wunnerurt:
ut alle Welt Supp inne Tüt
gifft dat hier, du miene Güt!

Un wedder blief ik wunnerd ståhn,
denn mi blennt dat Wurt "vegån":
vegane Wust, veganet Bier ——
wat gifft dat blot allens hier!

Un an den groten Wåderstand
gifft Wåder dat ut männig Land,
sülfst Buddels man bewunnern kann
von Perrier un Evian.

Dat düre Water karrt se ran
mit LKW un Iesenbahn.
Mehr öko, beter un nich düür
is uns Drinkwater vun hier!

Un kåm ik anne Brotthek ran,
man wedder düchtig wunnern kann,
Dreihunnert Sorten gifft in'n Schnitt
gägen einstens fien, grof, witt.

Schlüppergummi, Ies an'n Stäl —
von allens gifft dat väl tau väl,
wurlang möt sik dei Minsch noch quälen
ut Föftigdusend* uttauwählen?

Bi all dei välen Fardigäten
ward sülben kåken oft vergäten:
fief Minuten Mikrowell
un dat Äten is tau Stell!

Doch nu is dat so wiet kåmen,
dat dei Natur hett't œwelnåhmen,
un wi dörch unser asig Läben
nu dei Klimakris' beläben.

Woans dei Kris' nu œwerwinnen,
wo den rechten Utwech finnen,
dat dat Wåder nich mihr sticht,
uns Welt nich bald landünner licht?

* REWE hett 50.000 Artikel in't Sortiment