vun Behrend Böckmann

Dei USA ünner Trump sünd nich miehr dat, wat sei fröher wiern — un väle Minschen un Poletikers klågen bitter doroewer. Dei USA sünd nich miehr dei "tauverlässige Partner" as dunntaumåls, dei jümmer Gewehr bi Faut stünn, wenn dat up dei Welt wat tau rägeln geef — tauminnst wenn jüm dat in'n Kråm pass. Wo sünd dei hin? As Europa noch dei natürliche Achterhoff von'e USA wier, wier dat doch eigentlich ganz komodig, un wi bruken kein Geld för Rüstung utgäwen… Hüt will Trump nicht mal miehr Europa schützen, nee, betahlen salln wi dorför! Wo sünd dei olen Tieden, as dei USA dei "Weltschandarm" wier?

Erinnern wi uns: Wiern dat wirklich so gaude Tieden? Hemm dei USA miehr Talent tau'n Schandarm wiest as anner Kandidaten up dei Weltbühn?

• As sik 1950 bet 1953 dei twei Koreas — dei sowjetisch-chinesisch Nuurden un dei amerikan'sche Süden — inne Plünnen krägen, denn dat Land wür äbenso as Düütschland nå'n 2. Weltkrieg deilt, also tau dei dore Tiet keem "Uncle Sam" den Süden äbenso tau Hülp as dei Chinesen den Nuurden. Dat wier dei Anfang von'n Kollen Krieg. Doch dei wier dunnemåls wiet wech un wi hemm' sungen: "Ein twei drei Korea, dei Krieg kümmt ümmer nea..."
• Drei Johr wür sik schlågen, un nådem vier Milljonen Minschen — dorünner Koreaner, Chinesen un Amerikaner — den Dod funnen harrn, geef dat 'n Waffenstillstand langs dei 248 km lange "Demarkationslinie" mit dei bekannte Brügg von Panmunjeon, dei Nuurd- von Südkorea trennen deit. Antaumarken blifft noch, dat dei Chinesen 1958 Nuurdkorea verlåten hemm', dei Amerikaner sik œwer noch hüt in'n Süden uphollen.
• As Frankriek den Indochinakrieg (1946-1954) gägen dei Ünnergrundkämpfer verluurn harr, willigen s' 1954 up dei Indochinakonferenz in, twei Vietnams tau grünnen, dei dörch den 17. Breitengråd as Grenz in'n kommunistischen Nuurden ünner dei Vi?t Minh un den westlich orientierten Süden deilt sünd.
• Un denn will dei Nuurden den Süden innähmen, dat kümmt von 1955-1975 taun Vietnamkrieg, dei "Vietcong" willen 'n einig Vietnam åhn Amerikaner. Up den Wech dorhen möten üm söss Milljonen Minschen starben. An'n Enn' möst Amerika taun iersten Mål lütt bigäben un tauseihn, woans sik Süd- un Nuurdvietman gägen den amerikan'schen Willen tausåmenschluten. So mösst dei Weltschandarn hier düchtig instäken, wür liekers nich insichtig un hett in'n Wettlop üm dei Vörmacht ümmer wedder Kåhlen in't Füer schmeten:
• An'n Hindukusch harr dei Sowjetunion versöcht, ehrn Achterhoff wat grötter tau måken. Dat kunnen dei USA nich ankieken. So hemm sei ein afsünnerliche Trupp, dei sik "Taliban" nömen dään un von mallbüdelige Ideen schnacken — düsse Trupp hemm sei ünnerstütt, föddert un ehr Geld un Kriegstüüch taustäken, denn dei kunnen dei sowjetischen Besatzers argern. Man so richtig harrn dei USA düssen Taliban nich up dei Räken. Huch — nu wiern mit eins dei taun echte Gefohr worden, dei in'n Kampf gägen dei rode Gefohr ünner dei Arm gräpen wür. Nicks mit Al-Qaida, Taliban, Dschihad.... disse Radikalen mit ehrn Allah möten nu wat vör't Latz kriegen. (So harrn dei Sowjets ok dacht, man wenn dei dat denken, is dat ja nich dat Glieke.)
• Œwer man schlööcht nich allein tau, man hålt dei ganze NATO mit in't Boot, ok dei Bundswehr is iewerig mit dorbi — un wedder gåhn twinnig sinnlose Johr dorhen, man treckt Hals œwer Kopp af, is noch gor nich ganz wech un dei Taliban billen al dei niege Regierung.Dei abendlännisch Demokratie hett an'n Hindukusch kein Glück, dorför sünd dusende up'e Flucht un gaut 241.000 Minschen hemm' hier in dei verläden twinnig Johr den Dod funnen. Ok 60 düütsche Suldaten.
• Wenn dat in Afghanistan nich so recht nå dei amerikan'schen Vörstellungen leep, denn möt man wat anners finnen — un söcht af 2003 mål fix nå Giftgasgranåten in'n Irak, finnt œwer nicks. Liekers möt Hussein afdanken un sik 'n Kopp körter måken låten, Krieg un Börgerkrieg toben wieder, un as 2011 dei Amerikaner endlich aftrecken, sünd twüschen 'n half un ein Milljon Iraker ümkåmen, denn man hett dei Lieken nich tellt. Ok knapp 5000 Soldaten vonne amerikan'schen Truppen würn dod nå Hus bröcht. In ein amerikan'sch Blatt stunn denn dei blamable Satz: "In den Krieg sturven 5000 Minschen un eine Milljon Iraker."
• Œwer so as dei Katt dat Musen nich lött, lött dei Weltschanddarm nich dorvon af, sienen Gägenspäler tau argern un mit Militärposten tau ümzingeln. As dei Präsidenten noch nich Trump heiten dään, hett 'n inne Ukrain Lüd funnen, dei sik up ehr Oort för amerikan'sche Intressen insetten dään, so as dörch Krieg in Korea, Vietnam, Afghanistan, Irak un annerswo dei abendlännisch Demokratie Faut fåten süll. Dat dat mål wedder scheif güng, is bekannt — dei Gägenspälers hemm nich einfach tauseihn, sünnern seihn dei Ukrain' as ehrn eigen Achterhoff.
• Un man hett ok all 'n niegen Spälplatz för olle un niege Waffen un Geschütze in Utsicht stellt: Wenn China up den Infall keem, mit Taiwan Waffenstriet antaufangen, denn, ja denn wier man wedder dicht bi Korea un Vietnam!

Un nu is Trump-Tied, un allens is anners. Trump secht ein na den annern Verbünnten dei Fründschåp af, beleidigt sogor dei Saudis un dei arååvschen Emirate, dei maleins dei dicksten Frünnen von'e USA wiern, un will dei Ukrain' nu al gor nich miehr wiederhelpen… Dei Welt bävert: Wat, wenn China nu wirklich Taiwan inkassiern will? Ünner Trump warrn dei USA keinen Finger krumm måken, disse Oewertügen licht al in dei Luft. Un wo düer denn dei Computerchips warrn! Johrenlang warrt nüms sik miehr ein niegen Computer leisten könen, nich mal miehr ein Handy!

Wiern dei olen Tieden wirklich bäter? Willn wi dei taurüch? Wenn Trump buten in dei Welt rümprüünt, måkt hei dat ja nich gråd anstellig, as'n an'e Strååt von Hormuz seihn kann. Sall Europa nich bäter wiesen, wat dat sülwst beschicken kann?

Villicht licht Trump mit sienen Kehrdiannix ja mål richtig? Un wat dei Ukrain' angeiht: Wier't nich gaud, wenn dei Ukrain so as dei Schwiez 'n neutraler Staat warden künn un dei Donbassrepubliken Donezk (mit binå soväl Inwåhners as Litauen) un Lugansk (mit mihr Inwåhers as Estland) äbenso as Nuurdmazedonien orrer Kosovo as sülfstännig Länner ehr Rull in Europa un inne Welt spälen künnen? Winnen kann dat Land ja doch nich gägen Putin.