Wiesbaden un nich Warschau

vun Heinz Tiekötter

Siet 1980 bedrifft Hans Mertens de Imkeree as sien Hobby. Un nu dat! An Dünnersdag harr he noch twintig Immen-Völker un an Freedag weern dree weg; se sünd em eenfach klaut worrn. Siene Immenkörv, dat sünd greune Segebarger Kunststoffbeuten, drägt all sienen Nomen as Brandteken un de Teken sünd licht to erkennen. "Ik heff nich slecht keken", säe Hans argerlich, "as ik blots noch de Steenplatten sehn heff, op de vörher de Körv stunnen."

Gröne Plastik-Immenkörv. Bild Uwe Mohr

He dinkt an sien Kunnenstamm, för de em nu gode fiefhunnert Glas Honnig fehlen ward. Un so'n Volk kost jo ok üm de 250 Euro.

Bild Anke Nissen

Bummelige 2.000 Euro sünd em dordörch afhannen komen. Grund noog för em, de Klaueree bi de Polizei kunnig to moken. Wat he denn en Verdacht harr, froog em de Udl op de Wach? "Na ja", säe Hans Mertens, "en Dörp wieder ward 'n Kinnergorrn buut un de mehrsten Arbeiters kümmt ut Polen. Mutt ik noch mehr seggen?" Wieder keem Hans nich. De Udl ünnerbreek em: "Wenn Se nix Genaueret weten, möten Se vörsichtig sien. Se erspoorn sik 'n Barg Arger!"

Liekers weer Hans sik seker, siene Immen geweuhnt sik grod an de Wischen in Polen un bi den Verfolgungsehrgiez vun de hiesige Polizei ward de Spitzboov bald 'n swunghaften Honnighannel hebben.

Bild Uwe Mohr

Eenmol in de Woch güng Hans op de Wach un hett froogt, wat se denn all wat rutfunnen harrn. Annerlest hett de Udl em düütlich seggt, dat se ok wat anneret to doon harrn as sik blots üm Hans siene Immmen to sorgen. "Jo", hett Hans seggt, "Fohrrööd seuken; obers de find ji ok nich. De sünd ok in Polen!"

De Immen drinkt poolsches Water. Bild Uwe Mohr

Uns Internet bringt di jo 'n Menge Informationen un Imkers söörft nich weniger as annere Lüüd. Hans hett in de neegste Tiet orrnlich op de passenden Sieden keken, üm ruttofinnen, wat dor villicht Kollegen ok beklaut worrn sünd. Du gläuvst nich, wat he veer Weken loter lesen kunn: In Wiesbaden harr 'n Muermann op en Areol, wat he demnächst herrichten wull, dree greune Immenkörv endeckt. He is no de Polizei gohn un hett dat meld. Biller vun de Körv hett he in dat Internet stellt un dor hett Hans se funnen. De Opnohmen weern so düütlich, dat he kloor sienen Nomen lesen kunn. Hans hett den Muermann anropen un vertellt, dat em de dree Völker klaut worrn sünd. De harr de Völker in dat Gewohrsam vun de Polizei geben. Hans weer 'n lüttbeten breeder in de Bost as sünst, wenn he op siene Wach den Udl vertell, wo de klauten Immen nu sünd un dat de Kolleeg in Wiebaden op den Anroop vun de örtliche Polizei täuvt.

Nanu, alle al lerrig?! Bild manfredrichter/pixabay

Leste Woch weer Hans in dat Nobordörp bi den Kinnergorrn. He hett 'n Kist Beer bi den Kapo — dat is so'n Ort Polier — henstellt. De weer fix verwunnert un wull weten, worüm dat denn. "Ooch", sä Hans, "dat is man blots, ik mach dat lieden, dat Se hier so flietig sünd!"

Woortwöörtlich immenflietig, sotoseggen! Bild Uwe Mohr