Sleit dat nu twölf, een orr dörteihn?

Wintertiet — Nu hebbt wi den Salot!

vun Silke Frakstein

Mööt wi nu Middageeten, wiel dat Klock Een is, orrer is dat noch Klock twölf?
En Drama, en richtiges Drama is dat. Tweemol in't Johr. Un — weetst wat? Nüms will dat hebben.

60 Länner mookt düssen Affenkroom mit. Un wat hett dat bröcht? NIX, rein gor NIX. De Lüüd ward dörchnanner bröcht. Also beter nich no'n Doktor gohn in de nächste Week. Un al gor nich op't Amt, dat geiht in de Büx.

Bi de Keuh süht dat beter ut. De ward een Week vörher suutje op de niege Tiet instellt. Jeedeen Dag 'n Veddelstünn. Bi de Bohn hett dat keen Malesche geben. De sünd nich an irgendenen Bohnhoff vörbi fohrt, so as männichmol in de letzte Tiet, ne, de hebbt de Töög eenfach een Stünn irgendwo henstellt.

Ok de Kukuuk weet nich mehr, wo faken he hier ropen schall

In'n Krankenhuus mookt dat allens de Technik — wüllt höpen.

Bi uns hier in't Quartier weern de Klocken al an'n Dünnersdag op de Wintertiet instellt. Dormit hebbt se mi ganz dörchnanner bröcht, vunwegen Middageeten un so.
In uns Wohnung sünd wi noch nich fardig mit de Klocken . Bi veele geiht dat jo över Funk. Ober bi den Rest liggen tweemol in't Johr de Nerven blank. PM — AM — 24 Stunden.

Bi dat veele Proberen is meist de Batterie leddig un de ganze Kladderadatsch fangt wedder vun vörn an.

"Bei uns machen das die Kinder." — Ach so, un wenn de nu in Urlaub sünd? Tja, denn, jo denn köffst di bi Karstadt ne Klock to'n optrecken. Dat liggt in'n Trend, seggt de Verkeupersch.

Dat best is de Klock ganz ahn Wiesers

Nu mien Vörslag: Wenn in 60 Länner de mehrsten düssen Quatsch nich wüllt, köönt wi doch över dat Handy all de Lüüd anpingeln de wi kennt un unsen Arger över den verdreihten Kroom Luft moken.

De NSA markt dat denn jo un schrifft dat allens op. Op de Oort kümmt dat bi de Böbersten op'n Disch un — to'n Verhandlung. Se köönt denn eenfach nich anners. Bi so veel Revolution mööt se dat abschaffen.

Russland hett al de Nees vörn, as jümmers.