|
Dor weer mol een Ball, un de Ball, de weer rund,
he föhl sick so eensom, dat weer nich gesund.
He drööm vun dat Lewen, he drööm vun een Speel,
he harr dor so'n Lengen ganz deep in de Seel:
Kehrvers:
Loot uns Football spelen mit Plie un Geschick,
loot den Football nu rullen, mit Lust un mit Glück!
De Ball güng op Reisen, keek hier un keek dor
un funn een poor Mannslüüd un funn ok een Tor.
He leep to de Jungs un he deen sick jem an
un trock jem ganz suutje in't Speel un in'n Bann:
Loot uns Football spelen mit Plie un Geschick,
loot den Football nu rullen, mit Lust un mit Glück!
Se wüssen toeerst nich, wo schall dat op rut,
doch weern bannig gau mit den Rundling vertruut.
Wenn een noh em pett, kreeg de Ball bannig Moot
un jump denn een'n annern op den sienen Foot:
Loot uns Football spelen mit Plie un Geschick,
loot den Football nu rullen, mit Lust un mit Glück!
So lehrn se dat Spelen bi Weder un Wind
un marken dat jem dat to Mannschaft verbindt.
Un speel'n s' gegen anner, denn kreeg dat mehr Dampf;
ut Daddeln un Dribbeln wörr sportliche Kampf:
Loot uns Football spelen mit Plie un Geschick,
loot den Football nu rullen, mit Lust un mit Glück!
De Ball harr jo dröömt vun een Speel, sacht
un sööt,
man nu weer he Opfer vun ruppige Fööt.
Du, Minsch stell di vör, du weerst sülben so'n Ball,
all wüllt se di petten — dat weer nich dien Fall!
Loot uns Football spelen mit Plie un Geschick,
loot den Football nu rullen, mit Lust un mit Glück!
|
