vun Behrend Böckmann

Uns Fautballspälers drömen gern
von't Fautballwunner einst in Bern.
Doch denn wür blot in sössdig Johr
dei Drom von'n Sieg noch dreimål wohr,
för dit Johr hemm's sik vörnåhmen
up 'n Platz ganz vörn tau kåmen.

Nå dat FIFA-Reglement
spält man up einen Kontinent:
dei Ball rullt inne USA,
in Mexiko un Kanada,
achtunvierdig Länner sünd dorbi
söss Wäken lang, dat geef't noch nie.

In Winston-Salem, North Carolina,
In't Graylyn State, blot åhn Marina,
läben uns Spälers gor nich schlecht,
denn Luxus pur is dor ansecht —
doch männigein is untaufräden,
will ganz giern noch mihr beläben.

In Houston gägen Curaçao —
sœben tau eins måkt Düütschland froh;
sülfststännig af tweidusendteihn
lött sik dor dei Fautball seihn,
doch Curaçao as Inselland
is bäder dörch Likör bekannt,
denn ut den blågen Likör
mit säuten Saft von gäle Klöör,
mixten Keeper, ümmer frisch,
den Party-Drink, dei "Gräune Wisch".

Den Curaçao jeder kennt,
dat Tüüch hett glatt 20 Perzent!
Dat Fautballteam wier nich so stark,
pfusch Düütschland gor nich dull in't Wark.
Wenn al dei Buddel Slagsiet hett,
winnt Düütschland ganz bestimmt, ik wett!

In Toronto willen's siegen,
in't Dur ganz väle Bäll rinkriegen
un daun so, as harrn's nich wüsst,
dat man dei ut'e Elfenbeinküst
up den afrikan'schen Kontinent
as gaude "Elefanten"* kennt.
Uns Mannschaft geiht dat gor nich gaut,
nå ein tau ein sinkt denn dei Maud —
ierst dörch't Nåspäl is man wiss,
dat Düütschland wull dei Sieger is.

As Sieger af in dat Quartier,
un denn wedder af von hier
un jubelnd in Nju Jork ankåmen...
Dor hett man sik ganz väl vörnahmen,
denn dat Team ut Ecuador
(so denken s') is kein Störfaktor,
dei willn s' dat Späl för recht vermiesen
un dei Fautballwelt denn wiesen:
wi, Düütschland, œwerraschen gern,
as vör Johren, einst tau Bern.

Doch Ecuador spält mit Talent,
so as man dat in'n Süden kennt,
un dei Düütschen daun nich winnen
un möten sik dormit affinnen:
Süll man sei noch einmål schlåhn,
ward dei Reis nå Hus hengåhn.

Fief Dåch hett dei Mannschaft Tiet,
denn is dat wedder mål so wiet:
in Boston gägen Paraguay
is dat Ei mit eins intwei:
drei tau vier hemm sei verluurn —
nu ståhn's dor mit rode Uhrn.

Nu seggen's "Tschüß Amerika" —
af geiht't nå Hus åhn grot Hurra,
doch dei Utfohrt däd sik lohnen,
denn dat blifft bi dei Milljonen.
Blot dei Trainerlopbåhn ennt,
wat man von'n Fautball is gewennt!

* Les Éléphants" — "Dei Elefanten", dat is dei
Mannschap von dei Elfenbeinküste